محرم الحرام ،ضابطہ اخلاق پر عمل کرایا جا رہا : ایوب بخاری
سیالکوٹ (نمائندہ دنیا )ایڈیشنل ڈپٹی کمشنر (جنرل) سید ایوب بخاری نے کہا ہے کہ ضلع بھر میں محرم الحرام کے ایام روایتی امن و امان سے گزر رہے ہیں اور اس میں ضلعی امن کمیٹی کا کردار انتہائی کلیدی ہے ۔
یہ بات انہوں نے ضلعی امن کمیٹی کے ایک وفد سے ملاقات کرتے ہوئے کہی۔ کوآرڈینیٹر ضلعی امن کمیٹی حافظ اصغر علی چیمہ، مفتی کفایت اﷲ شاکر، شیخ آصف، مولانا عبدالغفار، حافظ یامین اور ایوب اوپل کے علاوہ محکمہ اوقاف اور پولیس کے حکام بھی شریک ہوئے ۔ایڈیشنل ڈپٹی کمشنر (جنرل) سید ایوب بخاری نے کہا کہ تمام مجالس اور ماتمی جلوسوں کا انعقاد پر امن انداز سے جاری ہے اور ضابطہ اخلاق پر مکمل طور پر عمل درآمد کو یقینی بنایا جا رہا ہے ۔ انہوں نے کہا کہ مجالس کے ساتھ ساتھ ماتمی جلوسوں میں تمام مکاتب فکر سے تعلق رکھنے والے علما بھی شریک ہوئے جس سے مذہبی ہم آہنگی کو فروغ ملا ہے ۔ انہوں نے امن و امان برقرار رکھنے پر ضلعی امن کمیٹی کا انتظامیہ کی طرف شکریہ ادا کیا۔
