جناح ہال قلعہ کی عمارت کی بالائی منزل بدحالی کا شکار
واش روم اور کھڑکیاں ٹوٹ چکیں ،تار لٹک رہے ،حکام نوٹس لیں :شہری
سیالکوٹ (نمائندہ دنیا )میٹرو پولٹین کارپوریشن کی غفلت کے با عث کارپوریشن دفاتر کے بالمقابل تاریخی جناح ہال قلعہ کی عمارت کی بالائی منزل بدحالی کا شکار ہوگئی ، جناح ہال قلعہ جہاں درجنوں سرکاری تقریبات منعقد کی جاتی ہیں ضلع کے بیشتر افسر آ کر خطاب بھی کرتے ہیں اس بلڈنگ کی بالائی منزل میں بنائے گئے واش روم ٹوٹ چکے ہیں ، چھت جگہ جگہ سے ٹوٹ پھوٹ کا شکار ہو رہی ہے ، بجلی کے تار جگہ جگہ لٹک ر ہے ہیں کھڑکیاں ٹوٹ چکی ہیں ۔سیالکوٹ کے تاریخی قلعہ جہاں چیف ایگزیکٹو میٹرو پولٹین کارپوریشن کا عالیشان دفتر موجود ہے جو تحصیل سیالکوٹ کی بیوٹیفکیشن تزین و آرائش کے ذمہ دار ہیں انکے اپنے عالیشان دفتر کے سامنے جناح ہال قلعہ کی بالائی منزل کی بدحالی سی او کارپوریشن کی ناقص کارکردگی کا منہ بولتا ثبوت ہے ۔ شہریوں نے ڈپٹی کمشنر سیالکوٹ سے مطالبہ کیا ہے کہ جناح ہال قلعہ کی بالائی منزل جو تاریخی اہمیت رکھتی ہے کی طرف توجہ دیں ۔
Comments / رائے دیں
Share your thoughts. Comments are reviewed before they appear publicly.
Approved Comments