Published on:09 May, 2019
اسلام آباد: (دنیا نیوز) آئی ایم ایف سے سات سے آٹھ ارب ڈالر قرضہ، تین سالہ پروگرام پر معاہدہ آج طے پائے گا۔ یکم جولائی سے بجلی مہنگی، سات سو ارب سے زائد کے نئے ٹیکس بھی لگیں گے، ترقیاتی بجٹ گزشتہ سال کی سطح پر منجمد کرنے کا فیصلہ، خسارہ بھی کم کیا جائے گا، ذرائع نے تصدیق کردی۔
پاکستان اور بین الاقوامی مالیاتی فنڈ (آئی ایم ایف) کے درمیان قرض پروگرام کا مسودہ آخری مراحل میں پہنچ گیا ہے۔ دنیا نیوز ذرائع کے مطابق پاکستان اور آئی ایم ایف کے درمیان 3 سالہ پروگرام پر معاہدہ 10 مئی 2019ء کو طے پا جائے گا۔ پاکستان آئی ایم ایف سے سات سے آٹھ ارب ڈالر سے زائد قرض حاصل کرے گا۔
ذرائع کے مطابق یکم جولائی سے بجلی مہنگی ہوگی۔ بجلی کی قیمتوں میں اضافہ دو مراحل میں ہوگا۔ یکم جولائی سے 700 ارب سے زائد کے ٹیکس لگیں گے۔
اس کے علاوہ گیس کی قیمتیں دوسرے مرحلے میں بڑھائی جائیں گی۔ ترقیاتی بجٹ گزشتہ سال کی سطح پر منجمد کیا جائے گا۔ خسارے میں چلنے والے اداروں کی نجکاری کی جائے گی۔
ذرائع کے مطابق ایکسچینج ریٹ کو طے کرنے میں سٹیٹ بینک خود مختار ہوگا جبکہ بجٹ خسارہ کم کیا جائے گا اور مالی نظم وضبط پر سختی سے عمل کیا جائے گا۔
روزنامہ دنیا ایپ انسٹال کریں
سے اہم مضامین پڑھیئے 
