چینی شہریوں کا تحفظ اولین ترجیح،لازوال دوستی میں کوئی دراڑ نہیں ڈال سکتا:وزیر داخلہ
اسلام آباد ( خصوصی رپورٹر ، مانیٹرنگ ڈیسک ، آئی این پی)وفاقی وزیر داخلہ محسن نقوی نے کہا کہ پاکستان کی تعمیر و ترقی کیلئے کام کرنے والے چینی بھائیوں کا تحفظ حکومت کی اولین ترجیح ہے ،پاک چین دوستی لازوال، کوئی دراڑ نہیں ڈال سکتا ۔
وزیراعظم کا حالیہ دورہ چین سے دوستی کا رشتہ مضبوط ہوا ہے ، چین کے صدر، وزیراعظم اور اعلی ٰقیادت نے ہمیشہ پاکستان کا بھرپور ساتھ دیا، چینی شہریوں کی سکیورٹی کے لئے جامع اور موثر ایس او پیز بنائے ہیں، اسلام آباد میں غیر ملکی شہریوں کے لئے الگ فورس ایس پی یو بنائی جا رہی ہے ، وزیر داخلہ چینی سفارت خانے گئے ، چین کے سفیر جیانگ زی ڈونگ نے خیر مقدم کیا ،محسن نقوی نے چینی سفیر سے ملاقات کی ملاقات میں پاک چین تعلقات کے فروغ اور چینی شہریوں کی سکیورٹی کیلئے کئے گئے اقدامات پر بھی تفصیلی تبادلہ خیال ہوا۔ وزیر داخلہ نے اسلام آباد سمیت ملک بھر میں چینی شہریوں کی حفاظت کے لئے کئے گئے اقدامات سے آگاہ کیا اور سی پیک سمیت دیگر منصوبوں پر کام کرنے والے چینی انجینئرز اور عملے کے سکیورٹی پلان پر بھی بریف کیا، چینی سفیر نے سکیورٹی انتظامات پر اطمینان کا اظہار کیا۔اس موقع پر وفاقی وزیر داخلہ نے کہا کہ وزیراعظم کا حالیہ دورہ چین سے دوستی کا رشتہ مضبوط ہوا ، ان کا کہنا تھا کہ کوشش ہے کسی چینی شہری پر ذرہ برابر آنچ بھی نہ آئے ، پاکستان اور چین کی لازوال دوستی میں کوئی دراڑ نہیں ڈال سکتا، ایسی کسی سازش کو ہر گز کامیاب نہیں ہونے دیں گے ۔چینی سفیر جیانگ زی ڈونگ نے اس موقع پر گفتگو کرتے ہوئے کہا کہ پاکستان اور چین ہر موسم کے دوست ہیں ۔
