افغان سرحد پر دراندازی، 16 دہشتگرد ہلاک : شمالی وزیرستان کے علاقے غلام خان کلی میں فائرنگ کا تبادلہ، افغان حکومت دہشتگردی کیلئے اپنی سرزمین کا استعمال روکے : آئی ایس پی آر
راولپنڈی، اسلام آباد(دنیا نیوز، مانیٹرنگ ڈیسک، نامہ نگار)سکیورٹی فورسز نے پاک افغان سرحد پر خارجیوں کی دراندازی کی کوشش ناکام بنادی اور تمام 16 دہشت گردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق 22اور 23مارچ کی درمیانی شب، شمالی وزیرستان کے علاقے غلام خان کلی میں پاک افغان سرحد کے ذریعے دراندازی کی کوشش کرنے والے خوارج کے ایک گروہ کی نقل و حرکت کو سکیورٹی فورسز نے بروقت مانیٹر کیا۔ترجمان پاک فوج نے بتایا کہ شدید فائرنگ کے تبادلے کے نتیجے میں تمام 16 خوارج واصلِ ہلاک کر دئیے گئے ۔آئی ایس پی آر کا کہنا تھا کہ عبوری افغان حکومت سے توقع کی جاتی ہے کہ وہ اپنی ذمہ داریاں پوری کرے ، پاکستان کے خلاف دہشت گردی کے لیے افغان سرزمین کے استعمال کو روکے ۔ترجمان پاک فوج نے کہا کہ پاکستان کی سکیورٹی فورسز اپنی سرحدوں کے تحفظ اور ملک سے دہشت گردی کے خاتمے کے لیے پرعزم ہیں، ہر قیمت پر اس ناسور کو جڑ سے اکھاڑ پھینکنے کے لیے مکمل طور پر تیار ہیں اور دہشتگردی کا خاتمہ یقینی بنائیں گی۔
صدر مملکت آصف زرداری، وزیراعظم شہبازشریف اور وفاقی وزیر داخلہ محسن نقوی نے غلام خان کلے ، شمالی وزیرِستان میں فتنہ الخوارج کی افغانستان سے پاکستان در اندازی کی کوشش ناکام بنانے پر سکیورٹی فورسز کے افسروں و اہلکاروں کی پذیرائی کی ہے ۔ وزیراعظم شہبازشریف نے کہاکہ دہشتگردوں کے ناپاک عزائم کو کبھی کامیاب نہیں ہونے دیں گے ،مجھ سمیت پوری قوم پاکستان کی دہشتگردوں سے حفاظت کے غیر متزلزل عزم میں اپنی بہادر افواج پاکستان کے شانہ بشانہ کھڑی ہے ۔دوسری جانب وفاقی وزیرداخلہ محسن نقوی نے سکیورٹی فورسز کو خراج تحسین پیش کرتے ہوئے کہاکہ سکیورٹی فورسز نے بر وقت کارروائی کرکے خوارجی دہشتگردوں کی شمالی وزیرستان میں دراندازی کو ناکام بنایا،بہادر سکیورٹی فورسز نے دراندازی کرنے والے 16 خوارجی دہشتگردوں کو عبرتناک انجام تک پہنچایا۔ وزیر داخلہ محسن نقوی نے 16 خوارجی دہشتگردوں کو ہلاک کرنے پرسکیورٹی فورسز کی پیشہ وارانہ صلاحیتوں کو سراہا۔
