شہبا ز شریف سے بجلی مزید 6روپے سستی کرائینگے :فاروق ستار
کراچی(مانیٹرنگ ڈیسک)متحدہ قومی موومنٹ پاکستان کے سینئر رہنما فاروق ستار نے دعویٰ کیا ہے کہ ایم کیو ایم پاکستان کی کوششوں کے نتیجے میں وزیرِاعظم نے بجلی کے نرخوں میں 12 سے 17 فیصد کمی کا اعلان کیا جو عوام کیلئے ایک بڑا ریلیف ہے ۔
ایم کیو ایم پاکستان کے مرکز بہادرآباد میں پریس کانفرنس کرتے ہوئے فاروق ستار نے کہا کہ کراچی میں ایم کیو ایم کے جلسے میں وزیرِاعظم سے بجلی کی قیمت میں مزید 6 روپے کمی کا اعلان کروایا جائے گا۔ ڈاکٹر فاروق ستار نے کہا کہ ہم وزیرِاعظم شہباز شریف کا شکریہ ادا کرتے ہیں کہ انہوں نے ہمارے مطالبے پر یہ اقدام اٹھایا، ہم نے واضح طور پر کہا تھا کہ عید کے بعد وزیرِاعظم بجلی کی قیمت میں 5 سے 10 روپے فی یونٹ کمی کا اعلان کریں گے ،10 ہزار کے بجلی بل پر 1500 روپے تک کمی ملے گی،ہم نے آئی پی پیز کے معاملے پر بھی کافی جدوجہد کی۔انہوں نے کہاکہ26 کروڑ گیلن پانی کا منصوبہ یعنی کے فور کا پہلا مرحلہ اگلے سال تک مکمل ہو جائے گا، پیپلز پارٹی نے دریائے سندھ سے چھ کینال منصوبے پر دوغلی پالیسی اپنائی، پہلے صدر نے اس منصوبے کی حمایت کی اور اب عوامی دباؤ میں اس کی مخالفت کی جا رہی ہے ، صدر مملکت کو عوام سے معافی مانگنی چاہئے ۔
