برما ، کمبوڈیا جنگلات میں 10ہزار پاکستانی پھنسے ہیں،وزارت داخلہ
اسلام آباد (نیوز ایجنسیاں )قومی اسمبلی کی قائمہ کمیٹی برائے انسانی حقوق کے اجلاس میں وزارت داخلہ کے حکام نے بتایا کہ برما اور کمبوڈیا کے جنگلات میں 10 ہزار پاکستانی پھنسے ہوئے ہیں ۔
کمیٹی نے وزارت داخلہ اور وزارت خارجہ سے رپورٹ طلب کرلی۔کمیٹی کا اجلاس چیئرمین صاحبزادہ حامد رضا کی زیرصدارت ہوا، حکام وزارت داخلہ نے بتایا کہ ہمیں کوالالمپور سے اطلاع ملی ہے کہ برما اور کمبوڈیا کے جنگلات میں 10 ہزار پاکستانی پھنسے ہوئے ہیں۔ ایف آئی اے حکام نے کمیٹی کو بتایا کہ اس سال کشتی کے 3 حادثات ہوئے ، ہم نے ایف آئی اے کے 12 افسران کیخلاف مقدمات درج کیے ، ہیومن سمگلنگ روکنے کے لیے کافی اقدامات کیے گئے ۔ایف آئی اے کے مطابق ایجنٹس کے ایسے اکاؤنٹس منجمد کیے جو رشتہ داروں کے نام پر تھے ، اب ہم یورپی یونین اور دوسرے ممالک سے رابطے میں ہیں، یہ سب کارروائیاں ہیومن سمگلنگ روکنے کی کوششیں ہیں۔چیئرمین کمیٹی نے کہا کہ سوشل میڈیا پرشادی بیاہ کی ویڈیوز وائرل ہوتی ہیں، باہرسے لوگ شادیاں کرنے آتے ہیں۔ ڈالرز،پاؤنڈزکی بارش کی جاتی ہے ، یہ ویڈیوز ہمارے معاشرے میں زیادہ مایوسی پھیلا رہی ہیں جس پر ایف آئی اے حکام نے کہا کہ اگرکوئی شادی اورپیسوں کی ویڈیواپ لوڈ کرے تو قانونا ًہم کچھ نہیں کرسکتے ۔
