بھارت جان لے! کشمیر کبھی نہیں چھوڑینگے:فیلڈ مارشل عاصم منیر
راولپنڈی(خصوصی نیوز رپورٹر،دنیا نیوز)فیلڈ مارشل سید عاصم منیر نے کہا بھارت جان لے کشمیر کبھی نہیں چھوڑینگے ،معرکہ حق میں اللہ نے مدد کی ، پوری قوم آہنی دیوار بن جائے تو دنیا کی کوئی طاقت گرا نہیں سکتی،پانی پاکستان کی ریڈ لائن ہے ، 24 کروڑ پاکستانیوں کے بنیادی حق پر آنچ نہیں آنے دیں گے ۔
فیلڈ مارشل سید عاصم منیرکی آرمی آڈیٹوریم میں منعقدہ ہلال ٹاکس کے شرکا مختلف جامعات کے وائس چانسلرز، پرنسپلز اور سینئر اساتذہ کرام سے بات چیت ہوئی۔فیلڈ مارشل سید عاصم منیر نے کہا اساتذہ پاکستان کا سب سے بڑا سرمایہ ہیں، میں آج جو کچھ بھی ہوں، اپنے والدین اور اساتذہ کی وجہ سے ہوں، پاکستان کی اگلی نسلوں کی کردار سازی اساتذہ کی ذمہ داری ہے ۔اساتذہ نے پاکستان کی کہانی اپنی اگلی نسلوں کو بتانی ہے ، معرکہ حق میں اللہ تعالیٰ نے ہر طرح سے پاکستان کی مدد کی، جب پوری قوم آہنی دیوار بن جائے تو دنیا کی کوئی طاقت اُسے گرا نہیں سکتی۔ کشمیر کا کوئی بھی سودا ممکن نہیں، ہم کبھی بھی کشمیر کو نہیں بھول سکتے ، ہندوستان جان لے کہ پاکستان کشمیر کو کبھی نہیں چھوڑے گا۔ پاکستان ہندوستان کی اجارہ داری کبھی قبول نہیں کرے گا، بھارت نے کئی دہائیوں سے کشمیر کے مسئلے کو دبانے کی کوشش کی مگر وہ ناکام ہو چکا ہے ۔
بلوچستان میں دہشت گرد فتنہ الہندوستان ہیں، ان کا بلوچوں سے کوئی تعلق نہیں۔پاکستان کو ایسی مضبوط ریاست بنانا ہے جس میں تمام ادارے قانون کے مطابق کام کریں، جو کوئی بھی ریاست کو کمزور بنانے کا بیانیہ بنانے کی کوشش کرے اس کی نفی کریں۔سوال و جواب کے سیشن میں شرکا نے اپنے تاثرات کا اظہار کیا کہ یہ جو محفوظ دھرتی ہے ، اس کے پیچھے وردی ہے ، ہمیں پاکستان اور اپنی مسلح افواج پر فخر ہے اور ہم ان کے شانہ بشانہ کھڑے رہیں گے ۔آئی ایس پی آر کے مطابق ہلال ٹاکس کا مقصد بین الاقوامی، علاقائی اور قومی امور پر مبنی گروپ ڈسکشنز اور انٹرایکٹو سیشنز کے ذریعے پاکستان کی علمی و تعلیمی برادری کو ایک پلیٹ فارم پر اکٹھا کرنا ہے تاکہ خیالات کے تبادلے کو فروغ دیا جا سکے ۔ فورم میں ملک بھر سے تقریباً 1800 اکیڈمک شخصیات نے شرکت کی،اکثریت آن لائن ذرائع سے شریک ہوئی،فورم کا اختتام ایک متفقہ عزم کے ساتھ ہوا کہ سب مل کر ایک محفوظ، مستحکم اور خوشحال پاکستان کے لیے کام کرتے رہیں گے ۔
