محمودالرشید 33، یاسمین ، عمر چیمہ کو 10، 10 سال قید،تحریری فیصلہ
جرم ثابت نہ ہونے پر 23 ملزم بری ،محمود الرشید کو الگ الگ سکیشنز میں سزائیں چار رہنماؤں نے ملک میں جلاؤ گھیراؤ کے لیے عوام میں انتشار پھیلایا، پراسیکیوشن
لاہور (کورٹ رپورٹر ،دنیا نیوز)انسداد دہشت گردی عدالت لاہور نے نو مئی کے دو مقدمات کا تحریری فیصلہ جاری کر دیا جس میں محمود الرشید کو 33 سال، ڈاکٹر یاسمین، اعجاز چودھری اور عمر چیمہ کو دس دس سال قید کی سزا سنائی گئی۔عدالت نے میاں محمود الرشید کو مجموعی طور پر 33 سال قید اور چھ لاکھ روپے جرمانے کی سزا سنائی،یاسمین راشد ،عمر سرفراز چیمہ اور اعجاز چودھری کو دس دس سال قید کی سزا سنائی، میاں محمود الرشید کو الگ الگ سکیشنز میں سزائیں سنائی گئیں۔عدالت نے جرم ثابت نہ ہونے پر 23 ملزموں کو بری کردیا، یاسمین راشد ،اعجاز چودھری اور عمر سرفراز چیمہ دونوں کاسازش کی میٹنگ میں موجود ہونا ثابت ہوتا ہے ، عدالت نے رہنماؤں سمیت سات ملزموں کو جرم ثابت ہونے پر قید کی سزا سنائی۔فیصلہ دیا گیا کہ پراسیکیوشن کے مطابق ڈاکٹر یاسمین راشد سمیت چار رہنماؤں نے ملک میں جلاؤ گھیراؤ کے لیے عوام میں انتشار پھیلایا، پراسیکیوشن نے مختلف واٹس ایپ میسجز اور 70 سوشل میڈیا اکاؤنٹس کی تفصیلات فراہم کیں، فرانزک رپورٹس بھی کمرہ عدالت میں پیش کی گئیں۔فیصلہ کے مطابق جے آئی ٹی کی تفتیشی ٹیم نے ملزموں کو قصور وار قرار دیا، جے آئی ٹی کی رپورٹ کو کسی فورم پر چیلنج بھی نہیں کیا، ملزموں نے اپنے حتمی بیانات میں خود کو معصوم قرار دیا تاہم پراسیکیوشن اپنا کیس ثابت کرنے میں کامیاب رہی۔
