مذاکرات کا ماحول ، آفریدی لہجہ سخت نہ کریں:فواد
میرے خیال میں مذاکرات کے مثبت نتیجے کا بہت زیادہ امکان ہے مذاکرات کی کامیابی کیلئے کوٹ لکھپت سے رہنماؤں کو پیرول پر رہا کریں
اسلام آباد (این این آئی)تحریک انصاف کے سابق رہنما فواد چودھری نے کہا کہ میرے خیال میں مذاکرات کے مثبت نتیجے کا بہت زیادہ امکان ہے ۔ایک انٹرویومیں انہوں نے کہا مذاکرات کا ماحول بن رہا ہے ، سہیل آفریدی سے گزارش ہے اپنا لہجہ سخت نہ کریں، حکومت سے گزارش کی مذاکرات میں کامیابی کیلئے کوٹ لکھپت سے پی ٹی آئی رہنماؤں کو پیرول پر رہا کریں، حکومتی لوگوں سے بات کی تو انہوں نے بھی اتفاق کیا کہ پرانے لوگوں کو لانا چاہیے ۔سینئر سیاستدان نے کہاکہ تینوں فریق چاہیں گے تو ہی سیاسی درجہ حرارت نیچے آئیگا، تین سال سے ٹوئٹر پر بیٹھے لوگ اپنے نام بدل بدل کر ٹوئٹ کرتے ہیں، تین سال میں پی ٹی آئی کا انقلاب آجاتا تو بات چیت کی ضرورت ہی نہ ہوتی۔
فواد چودھری نے کہا کہ میراخیال ہے حکومت بھی چاہتی ہے کہ سیاسی درجہ حرارت نیچے آئے ، جب ہم نے بات چیت کی کوشش شروع کی توسب نے کہا موقع دینا چاہیے ۔جب ڈائیلاگ کمیٹی بنائی تو اچھی بات ہے پورے پاکستان میں اس پر بات ہورہی ہے ، یہ سب سے اچھا ہے کہ تحریک تحفظ آئین پاکستان مذاکرات کیلئے آگے آئی، تحریک تحفظ آئین پاکستان کامسئلہ یہ ہے کہ بانی کو اچھے سے نہیں جانتے ،بانی پی ٹی آئی سمجھتے ہیں پارٹی میں کوئی قابل نہیں اس لئے اختیار باہر کے لوگوں کو دیا، اسد قیصر اور تحریک تحفظ پاکستان کو کہا ہے کوٹ لکھپت کے لوگوں کوشامل کیا جائے ۔فواد چودھری نے کہا پی ٹی آئی کہتی ہے فواد چودھری، عمران اسماعیل یا کوٹ لکھپت والے آئے تو ہمارا کیا بنے گا، بات چیت کیلئے قدم بڑھانا بہت اچھا آغاز ہے ۔
