فیلڈ مارشل کیخلاف بیان دہشتگردی کے زمرے میں آتا،ٹیسوری
تحریک انصاف سے وہی رویہ اختیار کیا جائے جو ایم کیو ایم سے کیا گیا تھا:گورنر سندھ مذاکرات نہیں ہونے چاہئیں،پی ٹی آئی کارکن عوام کیلئے آواز بلند کریں:خالدمقبول
کراچی (این این آئی)گورنر سندھ کامران خان ٹیسوری سے گورنر ہاؤس کراچی میں ایم کیو ایم پاکستان کے چیئرمین و وفاقی وزیر ڈاکٹر خالد مقبول صدیقی نے ملاقات کی۔ لاقات میں ڈاکٹر فاروق ستار اور امین الحق بھی موجود تھے ۔ اس موقع پر کراچی کے لیے وفاقی ترقیاتی پیکیج اور ملک کی مجموعی سیاسی و قومی صورتحال پر تفصیلی تبادلہ خیال کیا گیا۔بعد ازاں ایم کیوایم رہنماؤں کے ہمراہ پریس کرتے ہوئے گورنر سندھ کامران ٹیسوری نے کہا کہ برطانیہ جیسے ملک میں ہمارے فیلڈ مارشل کے خلاف جو زبان استعمال کی گئی وہ دہشت گردی کے زمرے میں آتی ہے ، پی ٹی آئی بیرون ملک پاکستانیوں کو ورغلا رہی ہے ، لوگ اس بیانیے سے دور رہیں، یہ بیانیہ نہیں چلے گا۔انہوں نے کہا پی ٹی آئی کا برطانیہ میں مقابلہ کرنے کے لیے بھی تیار ہیں۔ کامران ٹیسوری نے کہا مذاکرات کے نام پر دکان کھول کر رکھی ہے ، پی ٹی آئی کے ساتھ وہی رویہ اختیار کیا جائے جو ایم کیو ایم کے ساتھ کیا گیا تھا، برطانیہ میں پی ٹی آئی کی جانب سے پاکستان اور فیلڈ مارشل کے خلاف دیا گیا بیان صریحاً دہشت گردی کے زمرے میں آتا ہے ۔ انہوں نے مطالبہ کیا کہ برطانوی حکومت پاکستان مخالف پروپیگنڈے میں ملوث عناصر کے خلاف فوری اور شفاف انکوائری کرے ۔گورنر سندھ نے کہا اوورسیز پاکستانیوں کو جان بوجھ کر گمراہ کرنے کی کوشش کی جا رہی ہے ، انہیں پاکستان دشمن بیانیے کا حصہ بننے سے اجتناب کرنا چاہئے ۔ خالد مقبول صدیقی نے کہا پی ٹی آئی سے مذاکرات بھی نہیں ہونے چاہئیں، پی ٹی آئی کارکنان کو شخصیت سے نکل کر عوام کے لیے آواز بلند کرنی چاہئے ۔انہوں نے کہا ہم نے لاپتا افراد کے لیے آواز اٹھانی ہے چاہے وہ کسی بھی پارٹی کے ہوں، ہماری مستقل کوششوں سے خطیر رقم لاپتا افراد کے گھرانوں کے لئے رکھی گئی ہے ، لوگوں کو لاپتا کرنے میں ملوث افراد کو سزائیں دلوانی چاہئیں۔
