کار میں سوئی خاتون کو سڑک پرلیٹا کر چور کار لے اڑے
امریکا میں ایک بوڑھی خاتون تھک کر جب اپنی کار میں سوئی تو کار چور ان کی کار لے کر غائب ہوگئے
نیویارک (نیٹ نیوز)امریکا میں ایک بوڑھی خاتون تھک کر جب اپنی کار میں سوئی تو کار چور ان کی کار لے کر غائب ہوگئے اور انہیں احتیاط سے سڑک کنارے سوتا چھوڑ گئے ۔یہ واقعہ امریکا کے شہر نیوجرسی کے علاقے ہملٹن میں پیش آیا ہے جہاں 80 سالہ خاتون کار پارکنگ میں سو رہی تھی ،بیدار ہونے پر ان کی گاڑی غائب تھی اورانہوں نے خود کو پارکنگ کے راستے پر لیٹا ہواپایا۔ پولیس کے مطابق خاتون رات نو بجے اپنی کار میں سورہی تھیں اور صبح چار بجے بیدار ہوئیں،ان کے چہرے پر کھرونچوں کے نشان تھے ۔ اس کے بعد جب پولیس کو اطلاع دی گئی تو اس نے کار کی تلاش شروع کردی اور خاصی بھاگ دوڑ کے بعد ٹرینٹن کے علاقے سے ان کی کار برآمد کرلی ،اب پولیس ان مجرموں کو ڈھونڈنے کیلئے کام کررہی ہے اور جلد ان کو دھر لیاجائے گا،ان کی گرفتاری کیلئے سی سی ٹی وی فوٹیج اور علاقے میں قائم مخبری نیٹ ورک سے کام لیا جارہاہے ۔خاتون کاکہناہے کہ وہ تھکی ہوئی تھیں اور کار میں بیٹھے ان کی آنکھ لگ گئی تاہم وہ اس بات کو ماننے سے انکاری ہیں کہ انہیں کوئی کارسے اٹھاکر باہر رکھے اوران کی آنکھ نہ کھلے ،لازمی طور پربے ہوشی کی دوا استعمال کی گئی ہوگی ۔
