پانچ کام جو ریاست ہی کر سکتی ہے

انسان سماجی جانور ہے۔ چوتھی صدی قبل مسیح کے یونانی فلسفی ارسطو نے یہ بات اپنی کتاب سیاست میں بڑی وضاحت سے لکھ دی تھی۔ اس نے لکھا کہ انسان اکیلا نہیں رہ سکتا۔ اسے اپنی بنیادی ضروریات پوری کرنے کے لیے گھل مل کر رہنا پڑتا ہے‘ اور سماج فرد سے مقدم ہے۔ مل جل کر رہنے کی خواہش نے انسانوں کو خاندان اور قبائل کی شکل میں متحد کیا۔ یہ سلسلۂ عمل تاریخ کے مختلف ادوار میں مختلف شکلوں سے گزرتا ہوا ریاست پر منتج ہوا۔ جس دن سے انسان ریاست کی عملداری میں آیا، اسی دن سے اس کا ریاست کے ساتھ تضاد بھی پیدا ہو گیا۔ یہ تضاد معاشی، سیاسی اور سماجی تھا؛ چنانچہ پہلے دن سے ہی ریاست اور فرد کے درمیان حقوق و فرائض کی بحث چل پڑی۔

ریاست اور فرد کا کیا تعلق ہے۔ انسانی حقوق کے باب میں ریاست کی کیا کیا ذمہ داریاں ہیں؟ دانشور اور فلسفی برسہا برس تک اس بحث میں الجھے رہے۔ پھر یہ بحث فلسفے کی دنیا سے نکل کر عام آدمی تک پہنچی۔ رفتہ رفتہ ریاستوں اور حکومتوں نے سرکاری سطح پر انسان کے بہت سارے سیاسی سماجی اور معاشی حقوق کو تسلیم کر لیا۔ عالمی سطح پر اس کا متفقہ اظہار اقوام متحدہ کی جنرل اسمبلی کی ایک قرارداد کے ذریعے ہوا۔ 10 دسمبر 1948کو اقوام متحدہ نے پیرس میں انسانی حقوق کا تاریخی اعلامیہ جاری کیا۔ یہ اعلامیہ معاشی و سیاسی نظریات کی بنیادوں پر تقسیم شدہ دنیا نے تقریباً متفقہ طور پر تسلیم کیا۔ اس اعلامیے کی ابتدا میں ہی تسلیم کیا گیا کہ انسان فطری وقار اور ناقابل انتقال حقوق رکھتا ہے۔ یہ حقوق آزادی، انصاف اور امن کی بنیاد ہیں‘ اور ان کی حفاظت قانون کی حکمرانی کے ذریعے لازم ہے۔ اعلامیے میں مانا گیا کہ ہر انسان اپنی زندگی، آزادی اور تحفظ کا حق رکھتا ہے۔ اس حق کی وجہ سے کسی کو غلام نہیں بنایا جا سکتا۔ کسی کو تشدد کا نشانہ نہیں بنایا جا سکتا۔ کسی کو غیر قانونی طور پر گرفتار، قید، جلاوطن نہیں کیا سکتا۔ ہر کسی کو ایک آزاد اور غیر جانبدار عدالت میں اپنے دفاع کا حق ہے۔ ہر کسی کو پُرامن جلسے، جلوس اور تنظیم سازی کی آزادی ہے۔ قانون کی نظر میں سب انسان برابر ہیں‘ اور قانون کی طرف سے مساوی تحفظ انسان کا حق ہے۔ آزادیٔ اظہارِ رائے، مذہبی آزادی، نقل و حرکت کی آزادی انسان کا حق ہے۔ اقوام متحدہ نے اپنی قراداد نمبر 217 کے تحت یہ اعلامیہ جاری کرکے وہ تمام حقوق تسلیم کر لیے، جس کے لیے بنی نوع انسان نے ہزاروں سال تک، خواب دیکھے تھے، جہدوجہد کی تھی۔ انسانی حقوق کے اس اعلامیے کے آرٹیکل نمبر 25میں یہ واضح کیا گیا تھا کہ ہر آدمی ایک ایسے معیارِ زندگی کا حق دار ہے، جہاں اس کو اور اس کے خاندان کو روٹی، کپڑا، مکان اور صحت کی سہولیات میسر ہوں۔ اس طرح اس اعلامیے کے معاشی حقوق کا کچھ حصہ اشتراکی ممالک اور سیاسی حقوق کا کچھ حصہ مغرب کی آزاد جمہوریتوں نے کسی نہ کسی شکل میں تسلیم کر لیا۔ یہ عام آدمی کی بہت بڑی کامیابی تھی۔ ایک سنجیدہ عالمی فورم پر دنیا بھر کی ریاستوں کے سرکاری نمائندوں نے ایک ایسی قرارداد کے حق میں ووٹ دیے، جس میں انسان کے معاشی، سیاسی اور سماجی حقوق کو اتنے واضح، واشگاف اور دو ٹوک انداز میں تسلیم کیا گیا تھا۔ آنے والے دنوں یعنی پچاس اور ساٹھ کی دھائی میں دنیا کی کئی ریاستوں نے انسانی حقوق کے اس عالمی منشور کی روشنی میں کئی اقدامات کیے۔ بدقسمتی سے پاکستان میں اس عرصے میں شخصی اور آمرانہ حکومتوں کی وجہ سے انسانی حقوق کے اس عظیم اعلامیے کو یکسر نظر انداز کیا جاتا رہا۔ آمریتوں کے بیشتر ادوار میں بنیادی حقوق معطل رہے۔ بالآخر طویل مدت بعد، پہلی منتخب عوامی حکومت نے 1973 کے آئین میں انسانی حقوق کے اس عالمی منشور کو بڑی حد تک جگہ دی‘ اور بیشتر بنیادی انسانی اور سیاسی حقوق‘ جو اس عالمی اعلامیے میں درج تھے، کو آئین میں شامل کر لیا گیا۔ معاشی حقوق آئین میں شامل تو نہ ہوئے، مگر ذوالفقار علی بھٹو نے ان کو عوامی نعرے کی شکل میں ملک کے طول و عرض میں متعارف کرا دیا۔ روٹی‘ کپڑا اور مکان کے نعرے کے پیچھے اگرچہ مارکسسٹ اور مائواسٹ فکر کار فرما تھی، مگر یہ نعرہ اقوامِ متحدہ کے اس اعلامیے کے آرٹیکل پچیس کی روح کے عین مطابق تھا۔ اس کے بعد آنے والی طویل آمریتوں کے دور میں بیشتر اوقات بنیادی انسانی حقوق اور شہری آزادیوں پر پابندی رہی۔ جمہوری اور سیاسی حقوق کو سلب کیا جاتا رہا۔ معاشی حقوق کو نظر انداز کیا گیا۔ اس عمل میں پاکستان معاشی پسماندگی اور سماجی فرسودگی کا شکار ہو گیا۔ یہاں طبقاتی تقسیم بہت گہری ہو گئی۔ ایک طرف بے تحاشا مال و دولت اور جاگیروں کا مالک طبقہ اشرافیہ ابھرا، اور دوسری طرف بھوکے، ننگے، بیروزگار بدحال عوام کا ایک ہجوم، جن کا کوئی پُرسان حال نہیں۔

پاکستان میں اگر اقوام متحدہ کے اس اعلامیے کے آرٹیکل پچیس کو بنیاد بنا کر معیارِ زندگی کا جائزہ لیا جائے تو نتائج زیادہ خوشگوار نہیں نظر آتے۔ انسان کی بنیادی ضروریات میں سرِ فہرست خوراک ہے۔ پاکستان میں قحط سالی نہیں، خوراک کی شدید قلت بھی نہیں۔ مگر دولت اور وسائل کی غیر منصفانہ تقسیم کی وجہ سے خوراک تک سب کی رسائی بھی نہیں۔ آبادی کا ایک حصہ ایسا ہے جسے ضرورت کی کم از کم خوراک بھی میسر نہیں، اور ایک حصہ فاضل پیداوار کا مالک ہے۔ اقوام متحدہ کی ایک رپورٹ کے مطابق پاکستان میں 37 ملین سے زائد لوگ غذائی قلت کا شکار ہیں۔ ان لوگوں کو پیٹ بھرنے کے لیے جو کچھ میسر ہے، اسے خوراک نہیں کہا جا سکتا۔ اب عالم یہ ہے کہ ایک طرف فاضل خوراک موجود ہے‘ اور دوسری طرف لاکھوں انسان ہیں، جو بھوک کا شکار ہیں، یا مضرِ صحت خوراک کھانے پر مجبور ہیں۔ غذائی قلت کی وجہ سے بڑے پیمانے پر بچے متاثر ہو رہے ہیں، اور عورتیں خون کی کمی کی وجہ سے کئی بیماریوں کا شکار ہو رہی ہیں۔ خوراک سے بھی زیادہ اہم اور ناگزیر ضرورت پانی ہے۔ سرکاری اعداد و شمار کے مطابق آبادی کی ایک بڑی اکثریت کو پینے کا صاف پانی میسر نہیں۔ آبادی جس تناسب سے بڑھ رہی ہے‘ اگلے دس سالوں بعد مسئلہ یہ نہیں ہو گا کہ پانی صاف ہے یا گندا، مسئلہ یہ ہو گا کہ پانی کہاں سے، کیسے، اور کس قیمت پر حاصل کیا جائے، یہ ایک خوفناک صورت ہو گی۔ پاکستان میں آبرودار رہائش یا محفوظ پناہ گاہ کا مسئلہ بھی کم گمبھیر نہیں۔ اقوام متحدہ کے اعداد و شمار کے مطابق اس وقت پاکستان میں تقریباً بیس ملین لوگ بے گھر ہیں۔ یہ وہ لوگ ہیں جو باقاعدہ بے گھر ہیں‘ لیکن ایسے لوگوں کی تعداد بھی لاکھوں میں ہے، جن کو بے گھر تو نہیں سمجھا جاتا، مگر وہ مضر صحت یا ناقابلِ رہائش جگہوں میں رہنے پر مجبور ہیں۔ ایسی رہائش گاہیں‘ جن میں باد کشی کا انتظام نہیں، اور طبی نقطۂ نظر سے جو قابل بود و باش نہیں۔

پاکستان میںصحت کا قصہ اس بھی زیادہ دردناک ہے۔ اس محاذ پر حکومتوں کی کارکردگی ناقص رہی ہے۔ صحت کے باب میں ملک کی کم خوش قسمت آبادی کو بہت بے رحمی سے نظر انداز کر دیا گیا ہے۔ غربت، بھوک اور بیماری کا آپس میں گہرا تعلق ہے۔ پاکستان میں 39 فیصد سے زائد آبادی غربت کی لکیر سے نیچے زندگی گزارتی ہے۔ اس طرح یہ تقریباً 60 ملین لوگ ہیں جو غریب ہیں۔ ان کی ایک بڑی تعداد دیہی علاقوں میں آباد ہے، جہاں ان کو صحت کی بنیادی سہولیات تک رسائی نہیں۔

اس طرح اقوام متحدہ نے کم از کم انسانی معیارِ زندگی کے لیے جن ضروریات کو لازمی قرار دیا ہے، پاکستان میں حکومتیں ان میں سے کوئی ایک بھی پوری کرنے میں نا کام رہی ہیں۔ ان حالات میں ضرورت ایک ایسی سیاسی قوت کی ہے‘ جو روٹی، کپڑا، مکان، صحت اور تعلیم جیسی پانچ لازمی ضروریات کو بنیادی انسانی حقوق میں شامل کرنے کا مطالبہ کرے۔ ان ضروریات کو بنیادی انسانی حقوق قرار دینے سے ریاست قانونی طور پر ان ضروریات کو پورا کرنے کی پابند ہو جاتی ہے۔ غربت و افلاس کے گرداب سے باہر نکلنے کا یہی ایک راستہ ہے۔