تبدیلی حقیقت کیسے بن سکتی ہے؟

دیوانگی کیا ہے ؟ البرٹ آئن سٹائن نے دیوانگی کی یہ تعریف کی تھی کہ آپ ایک ہی کام بار بار کر رہے ہیں، لیکن اس سے مختلف نتائج کی توقع رکھتے ہیں۔ حکمت کی یہ بات آئن سٹائن جیسا بڑا سائنس دان اور دانشور ہی کر سکتا تھا۔ نیا پاکستان بنانے والوں کو اس نابغہ روزگار آدمی کی بات پر غور و فکر کرنا چاہیے۔

موجودہ حکومت تبدیلی کا نعرہ لے کر آئی ہے۔ گزرے ہوئے سو دنوں میں ممکن ہے اپنی دانست میں اس نے کچھ نئے کام بھی کیے ہوں‘ مگر ایک ایسی حکومت ‘ جس کا وجود اور تشکیل ہی تبدیلی کے نعرے کی مرہون منت ہو، سے لوگ یہ توقع رکھتے ہیں کہ وہ کوئی ایسی تبدیلی لائے جو سامنے نظر آئے۔ یعنی اس کا کوئی ٹھوس مادی وجود ہو، جسے عام لوگ اپنی آنکھوں سے دیکھ سکیں، محسوس کر سکیں۔ گویا یہ محض اعداد و شمار کا گورکھ دھندہ نہ ہو۔ ماضی کی طرح صرف جمع تفریق نہ ہو۔

تبدیلی کے باب میں پوری دنیا کے تاریخی تجربات ہمارے سامنے ہیں۔ ان تجربات میں مشترکہ سبق یہ ہے کہ کسی بھی سماج میں کوئی قابل ذکر تبدیلی لانے کے لیے چند ایک بنیادی کام کرنے ضروری ہوتے ہیں۔ یہ کام کیے بغیر سماج میںکاسمیٹک یعنی حسن افروز ہیر پھیر تو ہو سکتا ہے‘ کچھ زیبائشی اور آرائشی اقدامات کیے جا سکتے ہیں‘ مگر کوئی ایسی حقیقی تبدیلی ممکن نہیں ہے، جس کا عوام کی زندگی پر کوئی گہرا اثر مرتب ہو۔ ان لازمی کاموں میں پہلا کام پیشہ ورانہ قواعد اور اخلاقی ضوابط میں تبدیلی لانا، اور ان ضوابط پر سختی سے عمل درآمد کرنا ہے۔

کچھ عرصہ پہلے میں نے یل یونیورسٹی کے تاریخ کے پروفیسر ٹیموتھی سنائڈر کی ایک کتاب پڑھی تھی۔ یہ کتاب جابرانہ نظام حکومت اور مطلق العنانیت پر ہے۔ پروفیسر نے بیسویں صدی کی پوری تاریخ کو نچوڑ کر اس سے بیس سبق نکالے ، اور اس کتاب میں پیش کر دئیے۔ ان اسباق میں ایک اہم سبق یہ ہے کہ پیشہ ورانہ اخلاقیات کو مت نظر انداز کریں۔ پیشہ ورانہ اخلاقیات کے باب میں پروفیسر لکھتا ہے کہ دوسری جنگ عظیم سے پہلے ہینز فرینک نامی ایک آدمی ہٹلر کا ذاتی وکیل تھا۔ سال انیس سو انتالیس میں جرمنی نے پولینڈ پر حملہ کیا، تو فرینک مقبوضہ پولینڈ کا گورنر بن گیا۔ پولینڈ نازی جرمنی کی نوآبادی بن گیا۔ اس قبضے کے دوران فرینک کی سرپرستی میں لاکھوں یہودی اور دوسرے بے گناہ پولش شہری قتل کر دئیے گئے۔ اس نے بڑے فخر سے کہا کہ پولینڈ کے پاس اتنے درخت نہیں ہیں، جن سے اتنے کاغذ بنائے جائیں کہ ہر پھانسی کا اشتہار چھاپا جا سکے۔

فرینک کی دلیل یہ تھی کہ قانون برتر جرمن نسل کی خدمت کے لیے بنایا گیا ہے، اور جو جرمن نسل کے لیے اچھا ہے، وہی قانون ہے۔ اس طرح کی دلیل دہرا کر جرمن وکلا اپنے آپ کو قائل کرتے تھے کہ تمام قانون اور قاعدے محض فاشسٹ جنگ اور تباہی کے منصوبے پورے کرنے کے لیے ہیں، ان سے روکنے کے لیے نہیں۔ پولینڈ کے بعد آسٹریا کو فتح کرنے کے لیے ہٹلر نے جس آدمی کا انتخاب کیا، وہ بھی وکیل تھا۔ آرتھر نامی اس شخص نے بعد میں نیدرلینڈ پر بھی خونیں حملہ اور قبضہ کیا، جس میں ہزاروں قتل ہوئے۔ ہٹلر کی بدنام زمانہ سپیشل ٹاسک فورس میں بھی وکیلوں کی بڑی تعداد موجود تھی۔ اس ٹاسک فورس نے یہودیوں، خانہ بدوشوں، کمیونسٹوں اور سماج کے معزور افراد کو چن چن کر قتل کیا۔

ہٹلر کے اذیت خانوں میں بھیانک طبی تجربات ہوئے۔ ان تجربات میں باقاعدہ لائسنس یافتہ اور پیشہ ور ڈاکٹروں نے حصہ لیا۔ نازی سوچ کے حامل کاروباری طبقات نے نازی کیمپوں کے مزدوروں اور جنگی قیدیوں سے زبردستی بیگار لی۔ جرمنی کے سول سرونٹ نا صرف خاموشی سے یہ تماشا دیکھتے رہے، بلکہ اس عمل میں معاونت کی۔

مقدمہ چلائے بغیر کسی کو سزا نہ دینے کا اصول طویل عرصے سے پوری دنیا میں مسلمہ ہے۔ یہ اصول اس وقت بھی موجود تھا۔ اگر جرمن وکلا اس اصول کی پاسداری کرتے، تو کیا آج ہم ایک صدی بعد ان نازی مظالم پر ماتم کر رہے ہوتے۔ دنیا بھر میں طب کی دنیا کا یہ مسلمہ دستور ہے کہ کسی کی مرضی کے بغیر اس کی سرجری نہیں کی جا سکتی۔ یہ اصول جرمنی کی طبی دنیا میں موجود تھا۔ کیا جرمن ڈاکٹر اس اصول کے پابند نہیں تھے؟ جان بچانے اور جان نہ لینے کا حلف اٹھا کر انہوں نے زندہ انسانوں پر ایسے بھیانک تجربات کیے، جن کی اذیت ناک یاد رہتی دنیا تک رہے گی۔ اسی طرح اگر جرمنی کے کاروباری لوگ اور سول سرونٹ، غلامی کی ممانعت اور بیگار کے خلاف تسلیم شدہ اصولوں پر قائم رہتے، تو کیا نازی جرمنی میں وہ سب کچھ ہو سکتا تھا؟

اگر پیشہ ور اصولوں کی پاسداری لازم ٹھہرے، تو پھر ہر حالت میں اہل اقتدار کا حکم ماننا لازم نہیں ہوتا۔ بلکہ یہ پیشہ ورانہ اصول ایک پیشہ ور آدمی کو مجبور کرتے ہیں کہ وہ کوئی ایسا حکم ماننے سے انکار کر دے جو پیشہ ورانہ اخلاقیات کے خلاف ہو۔

ہمارے ہاں کبھی کبھار کوئی اچھا پولیس آفیسر اگر اپنی پیشہ ورانہ اخلاقیات کی پاسداری کرے، اہل حکم کے کہنے پر نہتے عوام پر گولی چلانے سے انکار کر دے تو وہ شخص محض اپنی ذمہ داریاں پوری کر رہا ہوتا ہے‘ مگر ہم اسے ہیرو بناتے ہیں‘ کیونکہ ایسا ہمارے ہاں عام طور پر ہوتا نہیں کہ کوئی اپنی پیشہ ورانہ اخلاقیات پر چلے۔ اسی طرح سالوں میں کوئی خبر ہمارے میڈیا کی زینت بنتی ہے کہ ہمارے کسی میڈیکل ڈاکٹر ، کسی وکیل، کسی جج نے اپنی پیشہ ورانہ اخلاقیات کی پاسداری میں کوئی بڑا قدم اٹھایا۔

ترقی یافتہ اور کامیاب ممالک میں یہ معمول ہے۔ یہاں یہ کوئی خبر نہیں ہے کہ کسی نے اپنے پیشے کے اصولوں کا احترام کیا، اور کوئی غلط یا غیر قانونی حکم ماننے سے انکار کر دیا۔ یہاں خبر اس وقت بنتی ہے جب کوئی ان اصولوں کو توڑتا ہے۔

پیشہ ورانہ اخلاقیات کو مکمل طور پر اپنائے بغیر، اور اس پر سختی سے کاربند ہوئے بغیر ان مسائل سے چھٹکارا نہیں پایا جا سکتا، جو ستر سال کی غفلت، لا پروائی، لالچ اورخوف سے سماج میں جڑیں پکڑ چکے ہیں۔

انصاف کی فراہمی حکومت کا بنیادی فریضہ ہے۔ یہ ایک پرامن اور خوشحال سماج کی تعمیر کی پہلی اینٹ ہے۔ اس کے بغیر کوئی شعبہ بھی درست نہیں کیا جا سکتا۔ نظام انصاف میں تبدیلی ناگزیر ہے۔ وکلا کے پیشہ ورانہ قواعد و ضوابط اور پیشہ ورانہ اخلاقیات میں بنیادی تبدیلی کے بغیر نظام انصاف میں تبدیلی نا ممکن ہے۔

اس وقت جس طریقے سے ہمارا نظام کام کر رہا ہے، اس میں وسائل اور اچھے منتظم کی کمی ایک بڑی وجہ ہے، مگر جو کچھ دستیاب ہے، اس کو اگر پیشہ ورانہ اخلاقیات کے سخت دائرے میں لایا جائے تو نظام میں موجود پچاس فیصد مسائل یک دم حل ہو سکتے ہیں۔ لاکھوں مقدمے التوا میں جانے سے بچ سکتے ہیں۔ انصاف کی تلاش میں مارے مارے پھرنے والے لا چار لوگ لوٹ مار سے بچ سکتے ہیں۔ اور نظام انصاف کے بجٹ میں ایک روپے کا اضافہ کیے بغیر ایسی تبدیلی لائی جا سکتی ہے، جو واضح طور پر نظر آئے۔

پیشہ ورانہ اخلاقیات میں فقدان والی بات ڈاکٹروں اور سول سرونٹ پر بھی صادق آتی ہے۔ مانا کہ ہمارے اکثر مسائل کی وجہ وسائل کی کمی ہے، مگر یہ بھی درست ہے کہ نظام کے بنیادی کرداروں کا رویہ اور کردار درست کیے بغیر اربوں روپے بھی لگائے جائیں تو خاک ہو جائیں گے۔ نتائج کچھ نہیں ہوں گے۔

حاصل کلام یہ ہے کہ اگر پیشہ ور لوگ اپنے اپنے فرائض منصبی اخلاص سے ادا کریں۔ اہل اقتدار کے غیر قانونی، غیر آئینی اور غیر اخلاقی احکامات ماننے سے صاف انکار کر دیں، تو دنیا سے فاشزم اور آمرانہ نظام کا خطرہ ٹل سکتا ہے۔ فاشسٹ اور آمریت پسند آج بھی ہمارے ارد گرد مختلف شکلوں میں موجود ہیں۔ یہ ہر عہد میں نئے روپ دھار کر آتے رہتے ہیں۔ ان کو شکست دینے کا ایک طریقہ قانون کی حکمرانی اور پیشہ ورانہ اخلاقی ضابطوں کی سخت پابندی بھی ہے۔

روزنامہ دنیا ایپ انسٹال کریں