عورت۔۔۔۔۔صرف سرخی پاؤڈر؟

عورت وہ ماں ہے جس کے پیروں تلے جنت ہے، وہ بیٹی ہے جو مرتے دم تک باپ کو بابل سمجھتی ہے، وہ بہن ہے جو بھائی پر قربان ہو جاتی ہے، وہ نرس ہے جو گندے ذہنوں ، پراگندہ سوچ ، مکروہ آنکھوں کی پروا کیے بغیر رستے زخموں اور پیپ زدہ جسموں سے گند صاف کرتی ہے۔ وہ لیڈی ڈاکٹر نہیں مسیحاہے، ایسے وقت میں جب ہر باعزت شخص زچہ کو ہسپتال پہنچاتا ہے اور چاہتا ہے عورت کو عورت ہاتھ لگائے۔ وہ عورت ہی ہے جو اپنے جسد روح اور جگر کے اندر ہمیں تخلیق کرتی ہے۔

اللہ تعالیٰ کی آخری کتاب قرآن حکیم کی سورہ بقرہ میں آیت نمبر 223‘ آیت نمبر 282‘ سورہ آل عمران 195‘ سورہ نسا کی آیت نمبر 1‘ سورہ نسا کی آیت نمبر 34‘ سورہ نسا 128,129سورہ توبہ کی آیت نمبر 172‘ نحل کی آیت97‘ سورہ روم کی آیت نمبر 21‘ سورہ فتح کی آیت نمبر 6‘ سورہ نسا کی آیت نمبر 19میں عورتوں کے ساتھ حسنِ سلوک ، ان کی نسوانیت کے تحفظ اور ان کے مقام اور مرتبہ کے بارے میں کھلے احکامات دیے گئے ہیں ۔سورہ توبہ کی آیت نمبر 72 عالم ِ انسانیت میں عورت کے سماجی رُتبے اور خدا کے ہاں مقام کو یوں بیان کرتی ہے:

ترجمہ: ''خدا نے مومن مردوں اور مومن عورتوں سے بہشتوں کا وعدہ کیا ہے جن کے نیچے نہریں بہہ رہی ہیں (وہ) ان میں ہمیشہ رہیں گے اور بہشت ہائے جاودانی میں نفیس مکانات کا (وعدہ کیا ہے) اور خدا کی رضا مندی تو سب سے بڑھ کر نعمت ہے یہی بڑی کامیابی ہے‘‘۔

محسنِ انسانیت حضرت محمدﷺ کے دربار میں اس صنفِ نازک کی نسوانیت کتنی اہم تھی‘ صحیح مسلم شریف میں اس کا ذکر یوں آیا ہے۔ ایک مرتبہ ایک انتہائی سریلی آوازوالا بدوقافلے کے اونٹوںکو ہانک کر لے جا رہا تھا جس میں عورتیںشامل تھیں۔ صحرا کی روایت کے مطابق خوش گُلوآواز سن کر اونٹ مست ہو جاتے ہیں لہٰذا تیزچلنا شروع کر دیتے ہیں ۔ قافلے میں محترم خواتین تھیں ؛ چنانچہ آپﷺ نے ارشاد فرمایا: تمہارے ساتھ شیشے ہیں، انہیں احتیاط سے لے کر جاؤ کیونکہ خواتین مردوں اوراونٹوںکی رفتار سے نہیں چل سکتیں۔ اس لیے آپﷺ نے عورتوں کے ادب میں دھیمی اور آہستہ رفتار سے چلنے کی ہدایت فرمائی۔

حضورمحترم ﷺخواتین کے مسائل اور مقدمات کی سماعت خود فرمایا کرتے تھے اور ان کی مشکلات ذاتی طور پر سن کر حل فرماتے تھے ۔ یہ آپ ﷺ ہی تھے جنہوں نے دنیا کی قوموں کی تاریخ میں عورتوں کو بطور انسان اہمیت دلوائی ۔1973 ء کا آئین اسی اسلامی اصول کے مطابق عورتوں کو ہر شعبہ ِزندگی میں سوسائٹی کے فعال رکن کی حیثیت دیتا ہے ، ہر طرح کے استحصال کا راستہ روکتا ہے۔ مثال کے طور پر آرٹیکل 25کے ذیلی آرٹیکل 3میں کہا گیا ہے کہ خواتین اور بچوںکو تخفظ فراہم کرنے کے لیے ریاست خصوصی قانون بنائے ۔اسی تناظر میں آئین کا آرٹیکل 32بھی بہت اہم ہے جس میں ریاست کے رہنما اصول کے طور پر یہ طے کر دیا گیاکہ بلدیاتی اداروں میں کسانوں اور مزدوروں کے علاوہ خواتین کو خصوصی نمائندگی دی جائے گی۔ یہ دوسری بات ہے، پاکستان کی جمہوریت کے رکھوالے کہلانے والے اپنی کابینہ میں خواتین وزیر نہیں بٹھاتے۔ اس کا جواب وہی دے سکتے ہیں کہ 52 فیصد آبادی کو نظر اندازکرنے کاقانونی جواز کیا ہے؟ہو سکتا ہے گلو بٹ برانڈ جمہوریت خواتین سے شرماتی ہو یا پھر خواتین سے ڈرتی ہوکیونکہ اکثریت تو انہی کے پاس ہے۔

پاکستان کا آئین دستور سازی کی تاریخ میں اس لیے بھی ممتاز ہے کہ اس میں ایک علیحدہ آرٹیکل 34کا عنوان ہی اس کا متن اور نفسِ مضمون ہے۔

Article 34:(Full participation of women in national life. "steps shall be taken to ensure full participation of women in all spheres of national life")

یعنی قومی زندگی میں خواتین کی بھرپور نہیں مکمل شرکت (full participation) چاہیے۔ پاکستان کی خواتین نوٹ کر لیں، ان کا آئین ان کی ریاست اور حکومت دونوں کو پابند بناتا ہے کہ وہ عملی اقدامات کے ذریعے گارنٹی فراہم کریں، وہ یہ کہ قومی زندگی کے ہر شعبے میں خواتین بھرپور طریقے سے اپنی کارکردگی دکھاسکیں۔اسی آئین کے آرٹیکل 35 میں خاندان کے تخفظ کی گارنٹی بھی شامل ہے۔

Article 35:(Protection of family, etc ."The state shall protect the marriage ,the family ,the mother and the child")

آئین کا تقاضا ہے کہ ریاست ہر حال میں شادی، خاندان، ماں اور بچے کو عملی اقدام اٹھاکر محفوظ بنائے۔

اس ہفتے ملک کے سب سے بڑے صوبے کے سب سے بڑے خادم نے قومی زندگی کے سب سے بڑے شعبے سیاست ،ریاست، سلطنت اور حکومت کے امور میں خواتین کی بھرپور شرکت کو طعنہ بنا کر پیش کیا ۔ اور اصلی شیرکی طرح بہو ، بیٹیوں کو للکارتے ہوئے یہ بھی فرما دیا '' سر خی پاؤڈر باقی نہیں بچے گا‘‘ یادش بخیر۔۔۔۔۔! خادمِ اعلیٰ کے پسندیدہ وزیرذاتی اطلاعات اور سرکاری نشریات نے بھی کچھ ماہ پہلے ''غُلیل‘‘ والوںکو دھمکی دے کر ڈرایا تھا۔ اب ملکی آبادی کی واضح اکثریت کو بازآ جانے کادوسرا سرکاری حکم دیا ۔ پنجاب سرکار کے ہر حکم کی طرح، خواتین کو جلسوں میں جانے سے ڈرانے کا فوری نتیجہ نکل آیا۔ اس دھمکی کے چوبیس گھنٹوں کے اند اندر بھکر ،میانوالی اور کالا باغ کی عورتوں نے شہید بی بی کے جلسوں کی یاد تازہ کر دی۔ میانوالی میں میرے قبیلے کے لوگ ہی نہیں بلکہ رشتہ دار بھی رہتے ہیں۔ اس علاقے میں خالص قبائلی ڈسپلن پایا جاتا ہے جس کے مطابق خواتین کو چھت پر چڑھنے کی بھی اجازت نہیں ہوتی۔ میانوالی کی ہزاروں خواتین جن میں سے اکثریت باپردہ تھیں نے دھمکی دینے والوں کے منہ پر سرخی پاؤڈر مل دیا۔ اب وہ چاہیں تو فوراً سرخی پاؤڈر دھو ڈالیں اور اگر دیوار پر لکھا پڑھ لیں تو نسوانیت کی توہین اور آئین کی تذلیل پر مبنی بیان کو عیدکی چھٹیوں کے دوران خاموشی سے واپس لے لیں ۔

پاکستان میں عورت کی شرکت کے بغیر نہ سیاسی تاریخ مکمل ہوتی ہے نہ ہی جمہوری جدوجہد۔ یہ تاریخ میرے پیدا ہونے سے بہت پہلے شروع ہو گئی تھی جس کا اولین روشن چہرہ بانی پاکستان حضرت قائداعظم کی فاطی اور ہم سب کی مادرِ ملت محترمہ فاطمہ جناح ہیں۔ فاطمہ جناح اور تحریک پا کستان لازم و ملزوم تھے۔ اگر محترمہ فاطمہ جناح قائداعظم کے ساتھ نہ ہوتیں تو پاکستان کا نقشہ شاید نقشہ ہی رہتا کیونکہ قائداعظم کے بقول مسلم لیگ کی جھولی کھوٹے سِکّوں سے بھری ہوئی تھی ۔اسی لیے بنیادی جمہوریت کے خادم اول ایوب خان نے جوانوں پرگولیاں برسائیں تو حبیب جالب نے وہی کہا جو میں آج کہہ رہا ہوں :

بچوں پہ چلی گولی

ماں دیکھ کے یہ بولی

یہ دل کے مرے ٹکڑے

یوں روئیں میرے ہوتے

میں دُور کھڑی دیکھوں؟

یہ مجھ سے نہیں ہو گا

میں دُور کھڑی دیکھوں؟

اور اہلِ ستم کھیلیں

خوں سے میرے بچوں کے

دن رات یہاں ہولی۔۔۔۔