اہلیت بذریعہ نااہلی

فنِ حکمرانی کا بنیادی تقاضا توازن ہے ۔ انسانی سوچ ، رویّے ، برتائو، فیصلہ سازی سے لے کر کردار سازی اور معاشرہ سازی تک توازن ہمیشہ سے بنیادی نکتہ چلا آتا ہے۔

میں کل سے الف لیلیٰ کی داستان کے اس شہزادے کو یاد کر رہا ہوں جو ہر نیا واقعہ دیکھ کر پہلے روتا تھا پھر ہنس دیتا تھا۔ ہزار داستان والا شہزادہ آپ کو یاد آئے یا نہ آئے لیکن یہ اختیار آپ ہی کے ہاتھ میں ہے کہ آپ اس واقعہ پر پہلے ہنس دیں یا پہلے رو دیں۔ پھر میں آپ کو پوٹھوہار میں لے آئوں گا جہاں پرانے وقتوں میں چور پکڑنے کے لیے ''پگڑ وال نیاں‘‘ اور کھوجی بلائے جاتے تھے۔ سپریم کورٹ آف پاکستان کے چیف جسٹس جناب ثاقب نثار صاحب نے وکیلِ صفائی سے سوال پوچھا: کیا چور کو پارٹی کا سربراہ بنایا جا سکتا ہے ؟ فاضل کونسل کا جواب بعد میں، پہلے گئے وقتوں کے پگڑ وال نیاں کی کارروائی دیکھنے کے لیے آئیے پوٹھوہار چلیں‘ جہاں ایک غریب آدمی کا مقدمہ چل رہا ہے۔ علاقے کے سرپنچ نے پگڑ وال نیاں کرانے کے لیے نمبردار ، چوکیدار اور ذیلدار کو ابرق لگا شملہ پہنایا اور ساتھ تین چار مشتبہ بیٹھا دیئے۔ سب کے کپڑے اور دستاریں ایک جیسی بنائی گئیں۔ گلی کے دوسرے سرے میں کالی پگڑی سے سر اور منہ ڈھانپے شامیں اور کوکے لگا ہوا ٹیڑھا ''کھونڈا‘‘ دونوں ہاتھوں میں پکڑے ہوئے ایک صحت مند نوجوان برآمد ہوا ۔ اس نے پگڑ والوں کو مخاطب کیا اور زوردار للکارا مار کر کہا ''اوے چورا میں نے تمہیں پہچان لیا ہے، پگ اتار کر نیچے رکھو ، اور ہاتھ ہوا میں بلند کر دو ورنہ اس کھونڈے سے تیرے مغز کا دہی بنا دوں گا"۔ یہ کہہ کر نوجوان نے پگڑ وال نیاں یا جرگے کی طرف تیزی سے دوڑنا شروع کر دیا۔ ابھی وہ مشکل سے چند قدم ہی دوڑا تھا کہ ایک آدمی نے دستار اتار کر دور پھینکی ، ہاتھ ہوا میں بلند کیے اور کہنے لگا چوری کی سزا موت تھوڑی ہی ہے ۔ اب کیا میری جان لو گے ۔ یوں پگڑ وال نیاں میں چور پکڑا گیا۔

عدالت عظمیٰ میں اٹھائے گئے سوال کا جواب نون لیگ کی بے تاج بادشاہ خاتون کے ٹویٹر اکائونٹ سے کل سامنے آیا ۔ محترمہ نے فرمایا: یہ ریمارکس دیکھ لو ، یہ ریمارکس ہمارے خلاف اور بغض پر مبنی ہیں۔ جن سے سماجی رابطے کی دنیا میں ایک لطیف اور مزے دار سوال پیدا ہوا ۔ اور وہ یہ کہ عدالت میں ایک اصولِ قانون کے بارے میں پوچھا گیا تھا‘ کوئی چور جو چوری میں پکڑا جائے اور کورٹ آف لاء اسے خائن کہہ کر نااہل ڈیکلیئر کر دے تو کیا وہ سیاسی پارٹی کا سربراہ بن سکتا ہے۔ لیکن عدالتی ریمارکس کے ان لفظوں میں کسی کو اپنا نام شامل کیسے نظر آ گیا۔ اس سوال نے بھی سوالات کا پنڈورہ باکس کھول کر رکھ دیا‘ جن میں سے کچھ ممکنہ سوال یہ بھی ہیں۔

اوّلاً، جو شخص کسی عہدے کے لیے خود ہی اہل نہیں۔ کیا وہ کسی ایسے ایوان کے ارکان کو ٹکٹ جاری کر سکتا ہے، جس میں داخلے کی پہلی شرط ایسا حلفیہ بیان ہو جس میں لکھا ہے میں آئین کے آرٹیکل 62,63 کی رو سے نااہل نہیں ہوں اور نہ ہی میں جھوٹا یا بے ایمان شخص ہوں۔

سوالِ ثانی یہ ہے کہ اگر ایسی آئینی نااہلی کی زد میں کسی سیاسی پارٹی کا سربراہ آ جائے جو خود الیکشن لڑنے کے لیے آئینی اہلیت نہ رکھتا ہو تو اس کے جاری کردہ ایوانِِ نمائندگان کے ٹکٹ آئینی طور پر مؤثر ہوں گے یا کالعدم۔

یہاں یہ بات مدِ نظر رہے پانامہ کیس میں سپریم کورٹ آف پاکستان کے 5 رکنی بینچ سے نااہلی کی سزا پانے کے بعد نااہل شریف نے نواز لیگ کے سینیٹ امیدواروں کو چاروں صوبوں، فاٹا اور آئی سی ٹی میں اپنی ذات کی نااہلی کے باوجود اہلیت کے پارٹی ٹکٹ جاری کر رکھے ہیں۔

محض علمی تناظر کے لیے یہ جان لیجئے کہ ''جنرل کلازز ایکٹ‘‘ کے قانون کی رو سے کسی پرائیویٹ آدمی کے اقدامات کو مؤثر بہ ماضی کوئی تحفظ حاصل نہیں ہے۔ تیسرا سوال یہ ہے ، کیا 20 کروڑ پاکستانیوں کو 22 کروڑ عوام کہہ کر ان کی خدمت کا سب سے بڑا مدعی ملکی قانون کے علاوہ کسی اخلاقی ، پارلیمانی، جمہوری اور روایتی شرافت کے ضابطے کا بھی پابند ہے یا مُنکر۔ ان سوالوں کا سینیٹ الیکشن کے مستقبل پر کیا اثر ہو گا یا کچھ نہیں ہو گا۔ اس سوال کا جواب سپریم کورٹ کے روبرو زیر تجویز مقدمے کے فیصلے کے بعد ہی سامنے آئے گا۔ اسی حوالے سے ایک اور اہم سوال بھی الیکشن کمیشن سمیت متعلقہ آئینی اداروں کے سامنے منہ کھولے کھڑا ہے۔ یہی کہ جس طریقے سے قانون ، ضمیر ، انصاف ووٹوں کی خرید و فروخت کے نیلام عام میں شریک ہو رہے ہیں‘ اسے فیئر ، فری، ٹرانسپیرنٹ ، آئین کے مطابق ، قانون کے ماتحت یا جمہوریت اور انتخابی اخلاقیات کے کسی بھی ضابطے کے تحت جمہوریت کہا جا سکتا ہے؟ اس سوال کا جواب یقینا نفی میں ہے۔ بالکل نہیں کہا جا سکتا۔ تو پھر کیا اسے آئینی الیکشن کہا جائے گا یا سٹیٹس کو کے بازار حصص میں نوٹوں کے عوض اپنی مرضی سے ضمیر خریدنے اور ضمیر بیچنے کا مکروہ دھندہ۔

نااہلی کے پیروکار آج کل سیاسی اخلاق، آئین اور قانون کے خلاف نئے چورن پروموٹ کر رہے ہیں۔ جس بے ذائقہ چورن کو بیچنے کے لیے پنجاب اور وفاق کی بولیاں کھل گئی ہیں وہ ہے نااہل شریف کی پذیرائی کا دعویٰ ۔ لفافے کی ملاوٹ والی اس چورن میں لودھراں الیکشن کا مصالحہ بھی ڈالا جا رہا ہے ۔ چورن فروش یہ تو بتائیں ق لیگ کے اقتدار میں نون لیگ نے کتنے ضمنی الیکشن جیتے تھے؟ ساتھ کوئی چورن فروش یہ بھی بتا دے کہ سرکاری کونسلر ، وائس چیئرمین ، چیئرمین ، ایم پی اے، پٹواری، گرداور، ای ڈی او کے ماتحت ٹیچر، ڈی سی او، ڈی پی او، آر پی او مل کر جو ''منصفانہ‘‘ الیکشن جیتیں گے‘ اگر یہ مقبولیت کا معیار ہے تو پھر نااہل شریف اور حسنی مبارک دونوں کو پاپولیرٹی مبارک ہو ۔ یادش بخیر پچھلے دورِ حکومت میں جن سیٹوں پر حکومتی امیدوار ضمنی الیکشن میں کامیاب ہوئے تھے‘ عین انہی نشستوں پر 2013ء کے عام انتخابات میں بیچاروں کی ضمانتیں بحقِ سرکار ضبط ہو گئی تھیں۔ ساتھ ساتھ آزادانہ سروے کرنے والے آزاد ماہرین کو بھی مبارک ہو ان کے سروے کے ساتھ پھر جمشید دستی ہو گیا یا پھر ہلری کلنٹن ۔