نااہلی کے قوانین

آج کل ہر جگہ خاص طور پر ٹی وی مذاکرات میں نااہلی کے قوانین پر بحث جاری ہے ۔اس بحث نے سیاسی اہمیت حاصل کر لی ہے کیونکہ عدالت عظمیٰ میں تین مرتبہ منتخب وزیر اعظم کے خلاف نااہلی کے مقدمات زیر التوا ہیں ۔ان مقدمات کے بارے میں کوئی رائے زنی جو قانونی دائرہ کار کے اندر ہو ‘کی جاسکتی ہے مگر اس کے میرٹس پر بحث مباحثہ ہر گز مناسب نہیں ۔عدالت عظمیٰ آئین اور قانون کے مطابق معاملات کا جائزہ لے رہی ہے اور تمام لوگوں کو فیصلہ آنے تک بردباری اور تحمل کا مظاہرہ کرنا چاہیے۔الزام تراشی برائے الزام تراشی اور عدالت کی کارروائی پر اثر انداز ہونے کی کوئی بھی کوشش انتہائی غیر مناسب ہے جو کہ مسلسل جاری ہے۔عوام کو ان قوانین کے بارے میں آگاہی ہونی چایئے مگر مناسب انداز میں اور قانونی حدود کے اندر رہ کر ۔

انتخابات میں حصہ لینے والے امیدواریا منتخب شدہ امیدوارکے لیے آئین پاکستان کے آرٹیکل 62اور63میں اہلیت اور نا اہلیت کے بارے میں تفصیلاً قانونی شرائط درج ہیں۔ پاکستانی شہریت کا حامل کوئی بھی امیدوار انتخابات میں حصہ لے سکتا ہے۔اپنے کاغذات نامزدگی میں اس کو اس بات کاحلفاً بیان دینا پڑتا ہے کہ وہ آئین پاکستان کے آرٹیکل62اور63پر پورا اترتا ہے ۔ہر امیدوار کے لیے لازم ہے کہ وہ اچھی شہرت کا حامل ہو ۔ایماندار اور راست باز ہو ،صادق اور امین ہو ۔مگر یہ شرائط جن کا ذکرآرٹیکل 62(1) میں ہے خود بخود نافذالعمل ہیں کیوں کہ ان تمام خصوصیات کے نہ ہو نے کا کوئی عدالتی حکم موجود ہونا چاہیے۔ وزیر اعظم پاکستان پر ان الزامات پر کہ وہ صادق اور امین نہیں کیونکہ ان کے اسمبلی کے اندر اور باہر بیانات میں تضاد ات ہیں،ان کے وکیل کا موقف ہے کہ انہوں نے جھوٹ نہیں بولا اور ان کے صادق اور امین نہ ہونے کے خلاف کوئی عدالتی فیصلہ موجود نہیں ۔مزید یہ کہ ان کو آئین کے آرٹیکل 66کے تحت استثنیٰ حاصل ہے ۔پی ٹی آئی کا موقف ہے کہ اس قسم کا استثنیٰ بدعنوانی کے الزامات کے لیے نہیں ہوتا۔غلط بیانی کے بارے میں آرٹیکل 62واضح ہے اور اور آرٹیکل 66اس کو ختم نہیں کر سکتا۔اس بات کا حتمی فیصلہ تو عدالت عظمیٰ ہی کرے گی۔

سپریم کورٹ نے اپنے ایک حالیہ فیصلے (سول اپیل نمبر 532/2015)رائے حسن نواز بنام حاجی ایوب وغیرہ میں تفصیل سے اس امر کا ذکر کیا ہے کہ ہر امیدوار کو اپنے اثاثوں، آمدنی اور اخراجات کا مکمل حساب دینا ہو تا ہے۔اور جہاں بھی اثاثوں کو چھپانے کے لیے مختلف طریقے (اگرچہ قانونی ہی کیوں نہ ہوں)استعمال کیے جائیں ،یہ الیکشن ٹربیونل کا فرض ہے کہ وہ اس کی مکمل تفتیش کرے ۔عدالت عظمیٰ نے ری رپریزنٹیشن آف پیپل ایکٹ 1976ء کے سیکشن12(2)کا حوالہ دیتے ہوئے اس بات پر زور دیا کہ الیکشن ٹریبیونل کو اسی قانون کے سیکشن 76اے کے مطابق یہ اختیار حاصل ہے کہ وہ کسی بھی معلومات کے نتیجے میں کسی بھی منتخب امیدوار کے اثاثوں کے چھپائے جانے کے بارے میں از خود تحقیقات کرے اوراگر جرم ثابت ہو جائے تونا اہلی کا حکم صادر کرے ۔عدالت عظمیٰ نے اس مقدمہ میں ٹرسٹی اور بے نامی اثاثہ رکھنے کا جرم میں کامیاب امیدوار کو نااہل قرار دینے کا فیصلہ بر قرار رکھا۔

اگر پاناما لیکس کے بعد الیکشن ٹریبیونل نے از خود کارروائی کا آغاز کیا ہوتا تو عدالت عظمیٰ کے پاس مقدمات کے آنے کا موقع نہ آتا۔موجودہ وزیر اعظم کے خلاف نااہلی کے مقدمات کے گہرے سیاسی مضمرات ہیں کیونکہ اس سے قومی اور بین الاقوامی سطح پر پاکستان کے خلاف منفی تاثر پیدا ہوا ہے۔ دوسری طرف وزیر اعظم کو آرٹیکل 10-Aکے مطابق منصفانہ سماعت کا حق حاصل ہے۔بدقسمتی سے صبح شام مختلف ٹی وی چینلز پر یہ تاثر دیا جاتا ہے کہ جیسے ان کے خلاف تمام الزامات ثابت شدہ ہیں ۔ان کو پہلے ہی سے سزا یافتہ قرار دینا جمہوری لحاظ سے ناپسندیدہ عمل ہے۔قانونی پہلوئوں پر بحث اور ناہلی کے بارے میں لوگوں کی آگاہی کا مقصد بہتراور اچھے امیدواروں کے انتخاب کے متعلق ہو نا چاہیے نہ کہ وزیر اعظم کو بغیر الزامات کے ثابت ہوئے سزا یافتہ قرار دینا ۔اصل بدقسمتی کی بات یہ ہے کہ ہمارے محکمے جیسے کہ نیب ،ایف بی آر ،ایف آئی اے اور الیکشن کمیشن امیدواروں اور منتخب نمائندگان کے اثاثوں، آمدنی اور اخراجات کی تفتیش کرنے میں ناکام ہو چکے ہیں۔زیادہ تر اثاثہ جات اور انکم ٹیکس کے ڈیکلیریشنز اور اخراجات ان کے رہن سہن سے میل نہیں کھاتے۔وہ صرف معمولی آمدنی ظاہر کرتے ہیں اور رہن سہن

انتہائی شاندار ۔بڑی بڑی گاڑیاں ،ملازمین کی بڑی تعداد اور عیش و عشرت ۔کیا اس صورتحال میں ہمیں صرف موجودہ وزیر اعظم کے بارے میں تفتیش کرنی چاہیے یا سب کو بارے میں جن کا نام کسی بھی آف شور کمپنی میں ہے۔اس سے پہلے عدالت عظمیٰ محمد صدیق بلوچ بنام جہانگیر ترین (P2D 2016 SC 97)میں کہہ چکی ہے کہ کوئی بھی منتخب نمائندہ جو کہ بد دیانت ہو یا غلط بیانی کا مرتکب ہے وہ کسی بھی طرح سے ریاستی امور چلانے کا اہل نہیں ہو سکتا۔مگر اس مقدمہ میںیہ صراحت کے ساتھ بیان کر دیا گیا ہے کہ کسی بھی الزام کے لئے ناقابل تردید ثبوت ہو نا چاہیے۔ہمیں اپنی سیاست اور حکومتی نظام کوجمہوری بنانے کے لیے شفافیت کا مکمل اہتمام کرنا ہو گا ۔یہ عمل امیدواروں کی مکمل چھان بین اور پھر منتخب اراکین کے اثاثوں ،آمدنی اور اخراجات کے بارے میں قریبی نظر رکھنے سے ممکن ہو سکتا ہے۔یہ کام الیکشن کمیشن کو دوسرے محکموں (ایف بی آر ،ایف آئی اے اور نیب )کی مدد سے کرنا ہو گا۔یہ انتہائی اچھا شگون ہے کہ اس عمل کا آغاز عدا لت عظمیٰ میں پاناما کیس سے ہو چکا ۔اس مقدمہ میں فیصلہ ہمارے جمہوری نظام کو استحکام اور ترقی دینے میں بہت معاون ثابت ہو گا۔ٖٖفیصلہ کسی کے بھی حق میں ہو ،عدالت عظمیٰ کے طے شدہ اصول آنے والے دنوں کے لیے مشعل راہ ہوں گے۔