آزاد کشمیر اور وفاقی حکُومت

گزشتہ دِنوں آزاد جموں و کشمیر کے سیاسی حالات غیر معمولی کشیدگی کا شکار رہے۔وجہ اِس کی آزاد کشمیر میں موجودہ برسرِ اقتدار پارٹی۔ پاکستان پیپلز پارٹی اور پاکستان میں برسرِ اقتدار سیاسی جماعت ، پاکستان مُسلم لیگ (ن) کے کارکنوں کے درمیان 13فروری کو کوٹلی کے علاقہ نکیال میں تصادم تھا ۔

اپنے ایک کارکُن کی ہلاکت پر آزاد کشمیر پیپلز پارٹی نے سخت ردِ عمل کا اظہار کیا۔ ریاست میں تین دِن سوگ منانے کا اعلان کیا۔ قومی اسمبلی میں پیپلز پارٹی سے تعلق رکھنے والے ممبران نے بھی آزاد کشمیر میں اپنے ساتھیوں کی حمایت میں بازوئوں پر سیاہ پٹیاں باندھ کر اور اسمبلی سے واک آئوٹ کر کے احتجاج کیا۔ پیپلز پارٹی نے حالات کی خرابی اور تصادم کی ساری ذمہ داری پاکستان مُسلم لیگ سے تعلق رکھنے والے وفاقی وزراء برجیس طاہر، پرویز رشید اور وزیراعظم کے سیاسی مشیر آصف سعید کرمانی پر ڈال دی اور الزام لگایا کہ وفاقی حُکومت کے اِن رہنمائوں نے اشتعال انگیز تقاریر کے ذریعے نہ صرف حالات کو خراب کیا، بلکہ اپنے کارکنوں کو تشددّ پر اُکسایا جِس کی وجہ سے یہ افسوس ناک واقعہ پیش آیا۔

لیکن دوسری طرف وفاقی وزراء نے اپنے اُوپر الزامات کی تردید کرتے ہوئے آزاد کشمیر کی موجودہ حُکومت کو موردِ الزام ٹھہرایا۔ اُن کے بیانات کے مطابق وزیراعظم آزاد کشمیر چودھری عبدالمجید کی پاکستان کی وفاقی وزراء کے خلاف اشتعال انگیز تقریروں سے لیگی کارکُن مشتعل ہُوئے جِس کے نتیجے میں تصادم کا واقعہ پیش آیا۔ آزاد کشمیر کی حکومت نے اِس واقعہ کی تحقیقات کے لئے ایک عدالتی کمیشن کے قیام کا اعلان کیا ہے جو تصادم کی وجوہات معلوم کر کے، ذمہ دار فریقین کی نشاندہی کرے گا لیکن جُون میں ہونے والے لیجسلیٹو اسمبلی کے انتخابات کیلئے اِس واقعہ نے ایک انتہائی ناخوشگوار کیفیت پیدا کر دی ہے جو نہ صرف آزاد کشمیر کے عوام بلکہ کشمیر کاز کیلئے بھی نقصان دِہ ثابت ہو سکتی ہے۔

اِس کی وجہ یہ ہے کہ پاکستان اور بھارت کے درمیان تنازعہ کشمیر کے مخصوص سیاق و سباق میں، آزاد کشمیر کو ایک خصوصی حیثیت حاصل ہے۔ اِسے آزاد کشمیر کے آئین میں بھی تسلیم کیا گیا ہے۔ اِس کے پیش نظر حکُومت پاکستان اور پاکستان کی سیاسی پارٹیوں کو آزاد کشمیر کے بارے میں محتاط روّیہ اختیار کرنا چاہئے کیونکہ آزاد کشمیر میں ہر سیاسی اقدام پر بھارت کی نظر ہے اور جہاں کہیں اِسے جھول نظر آئے گی، بھارتی حکُومت اِس سے فائدہ اُٹھانے کی کوشش کرے گی۔

اِس امکان کے باوجود پاکستان کے حکمرانوں نے تقریباً ہر دور میں آزاد کشمیر کے عوام کے بنیادی حقوق اور مفادات کے بارے میں مجرمانہ غفلت کا ثبوت دِیا ہے۔ مثلاً بہت کم لوگ اِس حقیقت سے واقف ہوں گے کہ آزاد کشمیر کے عوام اپنے ایک بنیادی جمہوری حق یعنی بالغ رائے دہی کی بنیاد پر اپنے نمائندوں کو براہ راست چننے کے حق سے 1970ء تک محروم رہے۔ 1968-70ء میں ایوب خان کے صدارتی نظام کے خلاف جب مُلک گِیر عوامی احتجاجی تحریک کے نتیجے میں 1973ء کے آئین کے تحت پاکستان میں پارلیمانی نظام بحال ہُوا، تو آزاد کشمیر میں بھی 1974ء میں پارلیمانی نظام حکُومت رائج کر دیا گیا۔ اُس وقت سے آزاد کشمیر لیجسلیٹو اسمبلی کے اراکین کا انتخاب براہ راست بالغ رائے دہی کی بنیاد پر ہوتا ہے۔ وزیراعظم کو اسمبلی کے اراکین منتخب کرتے ہیں اور وہ ریاست کا چیف ایگزیکٹو جبکہ صدر محض رسمی اختیارات کا مالک ہے۔ ایوب خان نے پاکستان کی طرز پر آزاد کشمیر میں بھی صدارتی نظام حکُومت رائج کر دیا تھا جِس کے تحت صدر کا انتخاب بنیادی جمہوری اداروں کے ممبران کے ذریعے عمل میں آتا تھا۔

پاکستانی موقف کے مطابق چونکہ مسئلہ کشمیر ابھی تک تصفیہ طلب ہے اور اِس کی وجہ سے آزاد کشمیر کی قانونی حیثیت ابھی حتمی نہیں ، بلکہ عارضی ہے، اِس لئے ایک عرصہ تک آزاد کشمیر کی سیاست کو پاکستانی سیاست سے علیحدہ رکھا گیا۔ اِس پالیسی کے تحت کافی عرصہ تک پاکستان میں سرگرم سیاسی پارٹیوں کو آزاد کشمیر میں کام کرنے کی اجازت نہیں تھی۔ مُسلم کانفرنس کے سابق رہنما اور آزاد کشمیر میں صدر اور وزیراعظم کے عہدوں پر کئی بار فائز رہنے والے کشمیری لیڈر سردار عبدالقیوم اِس اصول کے بڑے حامی تھے کہ آزاد کشمیرکی سیاست کو پاکستانی سیاست سے الگ رکھا جائے ۔ بصورتِ دیگر اُن کے خیال میں کشمیر کاز کو نقصان پہنچنے کا امکان تھا۔

آزاد کشمیر کی سیاست پر آہستہ آہستہ اُن سیاسی پارٹیوں کو بالادستی ہو رہی ہے، جن کی جڑیں آزاد کشمیر کی بجائے پاکستان میں ہیںمثلاً 2011ء کے اسمبلی انتخابات میں پی۔پی۔پی اور ن لیگ کی بالترتیب 30اور 11نشستوں کے مقابلے میں مسلم کانفرنس صرف 5نشستیں حاصل کر سکی تھی۔ پاکستان میں مقیم اِن سیاسی پارٹیوں کی قیادت آزاد کشمیر میں سرگرم اپنی پارٹیوں کو کنٹرول کرتی ہے۔ دوسرے الفاظ میں آزاد کشمیر کی سیاست خصوصاً انتخابی سیاست کو اسلام آباد ، لاہور یا کراچی سے ریموٹ کنٹرول کے ذریعے چلایا جا رہا ہے۔ 13فروری کو نکیال میں جو حادثہ ہُوا، وہ اِسی سیاست کا شاخسانہ ہے۔

مُسلم لیگ (ن) گزشتہ اسمبلی

انتخابات میں گیارہ نشستوں کے ساتھ پیپلز پارٹی کی 30نشستوں کے بعد دوسرے نمبر پر تھی۔ اِس دفعہ ن لیگ کا خیال ہے کہ اُس کا پہلا نمبر ہو سکتا ہے کیونکہ وزیراعظم چودھری عبدالمجید کی حکُومت اپنی نااہلی اور کرپشن کی وجہ سے غیر ہر دلعزیزی کی اتھاہ گہرائیوں تک گِر چُکی ہے اور مرکز میں برسرِ اقتدار ہونے کی وجہ سے وہ حسبِ دستور آزاد کشمیر کی سیاست پر بآسانی اثر انداز ہو سکتی ہے لیکن ن لیگ کو اصل خطرہ پیپلز پارٹی سے نہیں بلکہ عمران خان کی پی ٹی آئی کی اُبھرتی ہوئی قوت سے ہے۔ اِس اُبھرتی ہوئی قوت کا مظاہرہ گزشتہ برس میر پور کے ضمنی انتخاب میں ہُوا تھا، جِس میں پی ٹی آئی کے امیدوار بیرسٹر سلطان محمُود نے اپنے مدِمقابل چودھری محمد اشرف کو 3000ووٹوں سے شکست دی تھی حالانکہ چودھری محمد اشرف کو پیپلز پارٹی اور پاکستان مُسلم لیگ (ن) دونوں پارٹیوں کی حمایت حاصل تھی۔ غالباً اِسی وجہ سے ن لیگ کی اعلیٰ قیادت نے دو وفاقی وزراء اور ایک مشیر پر مشتمل لڑاکا دستے کو آزاد کشمیر فتح کرنے کیلئے بھیجا تھا۔ لیکن میرے خیال میں یہ ایک فاش غلطی تھی۔ کاش وفاقی حکُومت ہمسایہ مُلک بھارت اور خُود مقبوضہ کشمیر کے سیاسی حالات سے سبق سیکھنے کی کوشش کرتی ۔ گزشتہ برس بہار میںبی جے پی کی شکست کی سب سے بڑی وجہ یہ تھی کہ ریاست میں انتخابی مہم کی باگ ڈور بہار سے باہر کے لوگوں کے ہاتھ میں تھی۔ مقبوضہ کشمیر میں سیاسی حالات اُس وقت خراب ہونا شُروع ہوئے جب اندراگاندھی کے زمانے میں کانگرس نے ریاست کی سیاست میں بالادست ہونے کی کوشش کا آغاز کیا ۔ پاکستان کے حکمرانوں کو اگر آزاد کشمیر کے عوام اور کشمیر کاز سے ہمدردی ہے تو اُنہیں ریاست کی سیاست کو باہر سے کنٹرول کرنے کی کوشش ترک کر دینی چاہئے۔