لگے رہو طاہر بھائی!

دو سال قبل ایشیا کپ میں جب شاہد آفریدی نے میزبان بنگلہ دیش کی ٹیم کے خلاف بیٹ کو بُغدے کی طرح پکڑ کر قصائی کا کردار ادا کرنا شروع کیا تھا تب پورے اسٹیڈیم کو سانپ سونگھ گیا تھا۔ بنگلہ دیش کی ٹیم میچ جیتنے کی پوزیشن میں تھی۔ ایسے میں شاہد آفریدی کا اچانک اپنی جَون میں آ جانا اور قیامت ڈھانے پر تُل جانا اِس قدر shocking تھا کہ بنگلہ دیشیوں کے لیے اپنے جذبات پر قابو پانا انتہائی ناممکن ہوگیا تھا۔ جس شاہد آفریدی کی وجاہت پر دنیا بھر میں لڑکیاں فِدا ہوتی ہیں اُسی شاہد آفریدی کے چوکوں اور چھکوں نے کئی بنگلہ دیشی لڑکیوں کو خون کے آنسو رونے پر مجبور کردیا! اُس میچ کی وڈیو کلپس دیکھ کر اندازہ لگایا جاسکتا ہے کہ شاہد آفریدی نے اپنے بیٹ کو کس سَفّاکی سے استعمال کیا اور کس طور بنگلہ دیش کی تمام امنگوں اور امیدوں کو ٹکڑے ٹکڑے کر ڈالا۔

میچ پر رننگ کمنٹری کرنے والے بھی شاہد آفریدی کے سِحر میں مبتلا ہوئے۔ بیشتر چھکے اور چوکے اتنے بے ساختہ تھے کہ کمنٹیٹرز تعریف کرتے وقت جذباتی سے ہوگئے۔ ایک مرحلے پر شاہد آفریدی کے کسی چھکے پر خواتین روئیں تو ایک کمنٹیٹر نے کہا محترمہ! ابھی آنسو نہ بہائیں، ابھی تو بہت کچھ ہونا ہے کیونکہ شاہد آفریدی نے ابھی اپنا کام ختم نہیں کیا ہے!

یہ تاریخی الفاظ ہمیں اِس لیے یاد آئے ہیں کہ طاہر شاہ نے ایک بار پھر اپنی پٹاری کھولی ہے۔ اور یہ کیا؟ اِس بار وہ پٹاری سے سانپ کے بجائے اژدہا نکال بیٹھے ہیں!

طاہر شاہ کو آپ بھول گئے؟ یہ وہی طاہر شاہ ہیں جنہوں ڈیڑھ دو سال قبل ہمیں یاد دلایا تھا کہ ہمیں جو آنکھیں ملی ہیں وہ صرف دیکھنے کا کام نہیں کرتیں بلکہ انہیں گیت کی شکل میں پیش کرکے مفت کی شہرت بھی بٹوری جاسکتی ہے! جی ہاں، طاہر شاہ کے گائے ہوئے انگریزی گانے ''مائی آئیز، یور آئیز‘‘ نے ایسی دھوم مچائی تھی کہ ہر طرف اُنہی کی جے جے کار سنائی دے رہی تھی۔ مگر یہ چند روزہ معاملہ تھا۔ جیسے ہی لوگوں کو اپنی حماقت کا اندازہ ہوا، انہوں نے طاہر شاہ کے آئٹم پر غور کیا اور اپنے کیے پر نادم ہوئے یعنی یہ سوچ کر دل جلاتے رہے کہ طاہر شاہ کو کس بے ڈھنگے آئٹم پر کتنا کھل کر سراہا!

لوگ جب جذبات کی رَو میں بہہ جاتے ہیں تو ایسا ہی ہوتا ہے۔ طاہر شاہ کو خود بھی اندازہ نہ تھا کہ اُن کا تیار کیا ہوا ایک عامیانہ سا آئٹم اس قدر ہٹ ہوجائے گا کہ ہر طرف آنکھیں ہی آنکھیں اور آنکھوں ہی کی باتیں ہوں گی! یہ چند روزہ غلغلہ تھا اور پھر لوگوں کو ہوش آگیا۔ جب اندازہ ہوا کہ آنکھوں والے گانے کا سراہنا حماقت کے اظہار کے سوا کچھ نہ تھا تو لوگ تائب ہوئے اور ''مائی آئیز، یور آئیز‘‘ کو آنکھیں دکھاتے ہوئے اپنے ذہنوں سے کھرچ کر پھینک دیا۔

مگر خیر، طاہر شاہ کے لیے عوام کے مزاج کا تبدیل ہونا کوئی خسارے کا سودا نہ تھا۔ جو کچھ ہونا تھا وہ ہوچکا تھا یعنی طاہر کو بھرپور شہرت مل چکی تھی۔ بحث اس امر پر نہیں کہ لوگ سراہ رہے تھے یا کوس رہے تھے، اصل نکتہ یہ ہے کہ چند روز تک دنیا بھر میں طاہر شاہ کا نام لاکھوں افراد کی زبان پر رہا! وہ اس پر بھی بہت خوش تھے۔ یعنی ع

بدنام اگر ہوں گے تو کیا نام نہ ہوگا؟

طاہر شاہ ایک بار پھر میدان میں ہیں بلکہ اس بار تو وہ کچھ زیادہ ہی میدان میں ہیں یعنی لوگ بھی لنگوٹیں اور کمر کس کر میدان میں آگئے ہیں۔ ''مائی آئیز، یور آئیز‘‘ کے وقت لوگ زیادہ تیار نہ تھے۔ جب تک طاہر شاہ کو رگیدنے تک نوبت پہنچی، وہ شہرت بٹور کر ایک طرف ہٹ چکے تھے!

طاہر نے پھر انٹری دی ہے۔ چند روز قبل انٹر نیٹ پر انہوں نے اپنا نیا ''آئٹم‘‘ پیش کیا ہے۔ بس یہ سمجھ لیجیے کہ ''اینجلز‘‘ پیش کرکے طاہر شاہ نے خود کو بھوکے شیروں کے آگے ڈال دیا ہے! پچھلی بار جو لوگ چُوک گئے تھے وہ اب کوئی رسک لینے یا تساہل برتنے کے لیے تیار نہ تھے۔ جیسے ہی طاہر شاہ نے اپنا آئٹم انٹرنیٹ پر اپ لوڈ کیا، دنیا بھر میں اُن پر تنقید کا سلسلہ شروع ہوگیا۔ ہمیں یقین ہے کہ اتنی بھرپور تنقید دیکھ کر ''داعش‘‘ والے بھی کچھ دیر کو شرمندہ ہوگئے ہوں گے! سوشل میڈیا کی مشہور ویب سائٹ ''ٹوئٹر‘‘ پر طاہر شاہ کے آئٹم کو اس قدر تنقید کا نشانہ بنایا گیا کہ مزیدار جملے پڑھنے والوں کے تو مزے ہوگئے۔ اور جس طور شکر خوروں کو کسی نہ کسی شکر مل ہی جایا کرتی ہے، ہم جیسے کالم نویس بھی طاہر شاہ پر کی جانے والی تنقید سے مستفید ہوکر بہت کچھ پاگئے۔ کئی شاہکار جملے طاہر شاہ کو ہدف بناکر لکھے گئے مگر ہم جیسوں تک پہنچے اور طبیعت کو ہشّاش بشّاش کرگئے!

گیہوں کے ساتھ گُھن کا پِس جانا تو آپ نے سُنا ہوگا۔ اب کے گُھن کے ساتھ گیہوں پِس گیا ہے۔ طاہر شاہ نے جب سے اپنا دوسرا آئٹم (یعنی گانا) اپ لوڈ کیا ہے، دنیا بھر میں لوگ اُن کے ساتھ ساتھ پاکستان کو بھی آڑے ہاتھوں لے رہے ہیں! بھارت، امریکا اور دوسرے بہت سے ممالک سے لاکھوں افراد نے اپنے جلے کٹے کمنٹس میں طاہر شاہ کو رگیدنے کے ساتھ ساتھ پاکستان کی بھی دُھنائی کر ڈالی ہے!

طاہر شاہ نے اب کے خیر سے ایسی اعلٰی درجے کی جَھک ماری ہے کہ لوگ اِسے پاکستان کی طرف سے متعارف کرائی جانے والی دہشت گردی کی کوئی قسم قرار دینے سے نہیں چُوک رہے! جس طور بہت سے گیت دلوں کے تار چھیڑتے ہوئے گزر جاتے ہیں، ''اینجلز‘‘ نے محض چُھونے پر اکتفا نہیں کیا۔ یہ تو لاکھوں، بلکہ کروڑوں دماغوں کے تاروں کو جھنجھوڑتا ہوا گزر رہا ہے!

بہت سے امریکیوں نے بھی موقع غنیمت جان کر پاکستان کو لتاڑنے میں کوئی کسر اٹھا نہیں رکھی۔ تبصرہ کیا ہے کہ پاکستانی ڈبل گیم کھیلنے سے باز نہیں آئیں گے یعنی میوزک کے بھیس میں بھی دھماکا ہی کریں گے!

جس وڈیو سانگ نے پوری دنیا کو ہلاکر رکھ دیا ہے اور ذہن ماؤف کردیئے ہیں اُس میں طاہر شاہ فرشتے کے روپ میں ہیں۔ اور انہوں نے تنہا قیامت ڈھانے پر اکتفا نہیں کیا بلکہ ایک عدد ''فرشتی‘‘ کا بھی اہتمام کیا ہے! یہ صرف طاہر شاہ کا خاصہ ہے کہ انہوں نے ثابت کیا کہ فرشتے ہٹے کٹے بھی ہوسکتے ہیں! اور یہی نہیں، اُن کے ساتھ وڈیو میں جلوہ گر ہونے والی ''فرشتی‘‘ بھی چوہدریوں کے گھرانے کی معلوم ہوتی ہے!

معاملہ یہیں ختم نہیں ہوتا۔ طاہر شاہ نے دو ننھے فرشتوں کو متعارف کراکے فرشتوں کے خاندانی نظام کا تصور بھی پیش کیا ہے! یہ بھی طاہر شاہ کی مہربانی اور ''کامیابی‘‘ ہے کہ اُن کے ''فن‘‘ کی بدولت ایک بار پھر پاکستان انتہائی خبروں میں ہے!

ہم اکیسویں صدی کے انسان ہیں۔ اور اکیسویں صدی کے انسان کا بھی کیا نصیب ہے، کیا کیا دیکھنا اور جھیلنا پڑ رہا ہے! ایسا لگتا ہے کہ اب دنیا کے خاتمے تک سب کچھ اوٹ پٹانگ ہی چلتے رہنا ہے۔ ایک دور تھا کہ لوگ ذرا سی شہرت اور کامیابی کے لیے برسوں ریاضت کا حق ادا کرتے تھے۔ خون اور پسینہ ایک پیج پر آتا تھا تب کہیں جاکر ہنر مندی کی منزل تک پہنچنا نصیب ہوتا تھا۔ زمانے نے ایسی سنگ دلانہ کروٹ بدلی ہے کہ لوگ بے ڈھنگی چیز پر بھی شہرت بٹور لیتے ہیں، توجہ کا مرکز بن جاتے ہیں!

ہم یہ سطور لکھ ہی رہے تھے کہ مرزا تنقید بیگ لائے۔ ہم نے اپنا لکھا اُن کے گوش گزار کیا تو اُنہوں نے ایک ایسی بات کہی کہ ہم سُنّ رہ گئے۔ اُن کی ماہرانہ رائے یہ تھی : ''پہلے بھی کئی بار ایسا ہوچکا ہے۔ 'جینیس‘ جو کچھ کرتے ہیں وہ کم ہی لوگوں کی سمجھ میں آتا ہے۔ طاہر شاہ پر تنقید کرنے والے محتاط رہیں۔ ہوسکتا ہے کہ طاہر شاہ کی کاوش اپنے زمانے سے سو سال آگے کی ہو! کہیں ایسا نہ ہو کہ سو سال بعد کے لوگ ''اینجلز‘‘ کو دیکھ کر سو سال پہلے کے تم جیسے لوگوں کو جاہل قرار دیں!‘‘

مرزا جب بھی آتے ہیں کوئی نہ کوئی ایسی بات ضرور کہہ جاتے ہیں جو ہمیں خوفزدہ کردیتی ہے۔ مرزا کی بات سن پر ہم ''اینجلز‘‘ کے حوالے سے مخمصے کا شکار ہوگئے۔ ایسے میں ہم یہی کہتے ہیں کہ لگے رہو طاہر بھائی!