معراج النبیﷺ (حصہ اول)

معراج النبی ﷺرسولِ اکرم ﷺ کا سب سے'' مُحَیِّرُالْعُقُوْل‘‘ یعنی انسانی عقلوں کو حیرت زدہ اور دنگ کرنے والا معجزہ ہے۔ اصطلاحِ شریعت میں ''معجزہ‘‘ سے مراد ''مدعیِ نبوت کی ذات سے کسی ایسے امر کا صادر ہوناہے، جس کی نظیر پیش کرنے سے انسان عاجز آجائیں‘‘۔قرآن مجید میں ''معجزے‘‘ کے لئے ''آیۃ‘‘،''بَیِّنَۃ‘‘ اور''بُرھان‘‘ کے کلمات آئے ہیں۔معجزہ کا لفظ ہمارے ''علم الکلام‘‘کی اصطلاح ہے۔ معجزہ اسے کہتے ہیں ، جس کے ذریعے کسی سچے ـ''مُدّعِی نبوت‘‘ نے اپنے عہد کے کفار کے ساتھ ''تَحَدِّی‘‘ کی ہو،یعنی منکرین کو مقابلے کاChallengeدیا ہو، جیسے قرآن مجید معجزہ ہے، جب کفارِ مکہ نے اسے ''کلام اللہ‘‘ اور ''وحیِ ربانی‘‘ ماننے سے انکار کیا ، توقرآن نے اُن کے دعوے کو اِن کلمات میں بیان فرمایا:

''اور کافروں نے کہا: یہ قرآن تو صرف من گھڑت بات ہے، جس کو اِس (رسول) نے (اپنی طرف سے) گھڑلیا ہے اوراس پردوسرے لوگوں نے ان کی مدد کی ہے، سو ان کافروں نے ظلم کیا اور جھوٹ بولا۔ اور انہوں نے کہا:(یہ )گزشتہ لوگوں کے (قصے) کہانیاںہیں،جن کو اِس (رسول) نے لکھوا لیا ہے، جوان پر صبح وشام پڑھی جاتی ہیں،(الفرقان:4-5)‘‘۔پھر اللہ تعالیٰ نے قرآن مجید میں انہیں کئی مراحل میں چیلنج دیا کہ جب تمہارے دعوے کے مطابق یہ قرآن اللہ کاکلام نہیں ہے، بلکہ (معاذاللہ!)اس نبی کا خود ساختہ کلام ہے، توتمہیں اپنی فصاحت وبلاغت پر بڑا ناز ہے، پس تم اس کے مقابلے میں ایسا ہی کلام بنالاؤ، اﷲتعالیٰ نے فرمایا: (۱)''کیا وہ کہتے ہیں کہ انہوں نے (یہ قرآن) توخود گھڑ لیاہے؟، آپ کہیے!پھر اس جیسی دس سورتیں گھڑی ہوئی تم (بھی) لے آؤ اور اللہ کے سوا (اپنی مدد کیلئے) جس کو بلا سکتے ہو ، بلالو، اگر تم سچے ہو، (ہود:13) ‘‘ ۔ (۲):''اور جو کلام ہم نے اپنے خاص بندے پر نازل کیا ہے، اگر تمہیں اس (کے کلام اللہ ہونے) کے بارے میں کچھ شک ہے، تو اس کی مانند کوئی (چھوٹی سی) سورت تم بھی بنا کرلے آؤاور اللہ کے سوا اپنے (تمام) مدد گاروں کو بھی بلالو، اگر تم (اپنے دعوے میں) سچے ہو،(البقرہ:23-24)‘‘۔

پھر قرآن نے فیصلہ کن بات ارشاد فرمائی:''آپ کہہ دیجئے ! اگر تمام انسان اور جِنّ مل کر (بھی) اِس قرآن کی مثل لاناچاہیں، تو وہ اس کی مثل نہیں لاسکیں گے ، خواہ وہ ایک دوسرے کے مدد گار بن جائیں،(الاسراء:88)‘‘۔ اس کے بعد کفار مکہ نے کٹ حجتی کا سلسلہ شروع کیا اور فرمائشی معجزات کا مطالبہ کیا، اللہ تعالیٰ نے فرمایا:''اور انہوں نے کہا:اِس رسول پر فرشتہ کیوں نہیں نازل کیا گیا اور اگر ہم فرشتہ نازل کرتے ، تو ان کاکام پورا ہوچکاہوتا، پھر انہیں مہلت نہ دی جاتی(یعنی اتمامِ حُجت کے بعد وہ عذابِ الٰہی کے حق دار قرار پاتے)اور اگر ہم اس رسول کو فرشتہ بنادیتے، تب بھی اس کو (صورۃً) مرد (ہی)بناتے، توہم ان کو اسی اشتباہ میںڈال دیتے، جس میں اب مبتلاہیں،(الانعام:8-9)‘‘۔

یعنی اصل ملکی صورت میں تو وہ فرشتے کو دیکھ نہ سکے اوروہ بشری صورت میں آئے ،تو ان کا اعتراض پھر قائم رہے گا کہ یہ تو ہم جیسا بشر ہے۔ کبھی ان کفارِ مکہ کا مطالبہ یہ ہوتا کہ ہمارے مرے ہوئے آباء واجداد آکر ہمیں برزخ وآخرت کے حالات بتائیں تو ہم تب مانیں گے، اﷲتعالیٰ نے فرمایا:''اور اگر ہم ان کی طرف فرشتوں کو بھی نازل کرتے اور مردے اُن سے باتیں کرتے اور ہم ہر چیز کواُن کے سامنے جمع کردیتے، تب بھی وہ ایمان نہ لاتے ، (الانعام:111)‘‘۔اس کے باوجود کفارِ مکہ کا طرح طرح کے فرمائشی معجزات کا مطالبہ جاری رہا، اللہ تعالیٰ فرماتا ہے: ''اور انہوں نے کہا:ہم آپ پرہرگز ایمان نہیں لائیں گے حتی کہ آپ ہمارے لئے زمین سے کوئی چشمہ جاری کردیں یا آپ کے لئے کھجوروں اور انگوروں کا کوئی باغ ہو، پھر آپ اُن کے درمیان سے بہتے ہوئے دریا جاری کردیں یا جس طرح آپ کہتے ہیں ، ہم پر آسمان کو ٹکڑے ٹکڑے کرکے گرادیں یا آپ اللہ کو اور فرشتوں کو ہمارے سامنے(بے حجاب) لے آئیں یا آپ کے لئے سونے کا کوئی گھر ہو یا آپ (ہمارے سامنے) آسمان پر چڑھ جائیں اور ہم (محض) آپ کے (آسمانوں پر) چڑھنے پر(بھی) ہر گز ایمان نہیں لائیں گے حتی کہ آپ ہم پر کتاب نازل کریں ، جس کو ہم پڑھیں ، (اے رسول!)کہہ دیجئے! (میں کوئی شعبدے باز نہیں ہوں ) میرا رب پاک ہے، میں تو صرف ایک بشر ہوں ، جس کو رسول بنایا گیاہے،(بنی اسرائیل:90-93)‘‘۔

الغر ض قرآن مجید رسول اللہ ﷺ کا سب سے بڑا معجزہ ہے۔ جیساکہ ابتدا میں بیان کیا گیا ہے کہ قرآن مجید کی اصطلاح میں معجزے کے لئے ''اٰیۃ‘‘ کا کلمہ آیا ہے، جس کے معنی ہیں :''نشانی اور دلیل‘‘ اور قرآن مجید کے ایک جملے کو بھی آیت کہتے ہیں ، اس معنی کے اعتبار سے قرآن کریم کی ہر آیت اپنی جگہ ایک معجزہ ہے۔ چونکہ اللہ تعالیٰ کی حکمت کے مطابق دیگر انبیائے کرام علیہم السلام کی شریعت محدود مدت کیلئے تھی، اس لئے ان کے معجزات بھی آج اپنی اصل شکل میں باقی نہیں ہیں اور ختم المرسلین ﷺ کی شریعت چونکہ قیامت تک کیلئے ہے، اس لئے قرآن مجید کی صورت میں آپ کا معجزہ بھی قیامت تک اپنی حقیقی صورت میں کسی تحریف اور تغیُّرو تبدُّل کے بغیرقائم ودائم رہے گا۔ قرآن اللہ تعالیٰ کا کلام اور اس کی صفت جلیلہ ہے۔

قرآن کریم نے معراج النبی ﷺ کو''اِسراء(رات کی سیر کرانے)‘‘سے تعبیرکیا ہے اور یہ سورۂ بنی اسرائیل کی پہلی آیتِ مبارَکہ کے کلمہ ''اَسریٰ بِعَبْدِہٖ‘‘ سے ماخوذ ہے۔ احادیثِ مبارَکہ میں اسے ''معراج النبی ﷺ‘‘ کا عنوان دیا گیا ہے اور یہ حدیثِ مبارَک کے کلمات ''ثُمَّ عُرِجَ بِیْ‘‘ سے ماخوذ ہے ،یعنی پھرمجھے مسجد اقصیٰ سے بلندی کی طرف لے جایا گیا‘‘ ۔ ''معراج‘‘ کے معنی ہیں: بلندی کی طرف جانے کا آلہ یا سیڑھی ، جسے آج کل ''Elevator‘‘کہتے ہیں ،اسی طرح چاند تک یا خلائی سفر پر جانے کے لئے طاقت ورراکٹ سے خلائی جہاز کو روانہ کیا جاتا ہے ۔ بعض محدثینِ کرام نے اس بے مثال سفر کو تین مراحل میں تقسیم کیا ہے۔ ''اسراء‘‘ مسجد حرام سے ''براق‘‘ کے ذریعے مسجد اقصیٰ تک کا سفر، ''معراج‘‘ مسجدِاقصیٰ سے ''سِدْرَۃُ الْمُنْتَہیٰ‘‘ تک کا سفر اور ''اِعراج‘‘ سدرۃ المنتہیٰ سے لامکاں تک یعنی حضوریِ بارگاہِ رب العٰلمین تک کاسفر، جس کے لئے احادیث میں ''رَفْرَفْ‘‘ کا نام بھی آیاہے۔ مجموعی حیثیت سے اہلِ سیرت اور محدثینِ کرام اس واقعے کو ''معراج النبی‘‘ سے تعبیر کرتے ہیں ۔

معراج النبی ﷺ کا ذکر قرآن مجید میں نہایت صراحت ووضاحت کے ساتھ سورۂ بنی اسرائیل کی پہلی آیتِ مبارَکہ میں آیاہے اور یہ مسجدِحرام سے مسجدِ اقصیٰ تک کے سفر اور اس کی حکمتوں کا بیان ہے،اس مرحلۂ معراج کامُطلَق انکار کفر ہے، کیونکہ یہ براہِ راست قرآن کا انکار ہے۔ اور اس کے علاوہ ''سورۃ النجم‘‘ کی ابتدائی اٹھارہ آیاتِ مبارَکہ میں اشارات و کنایات کے ساتھ آسمانوں اور اُن سے ماوراء مشاہدۂ قدرت، آیاتِ کُبریٰ، قُربِ باری تعالیٰ اور براہِ راست وحیِ ربانی کا بیان ہے۔

معراج النبی ﷺ کا واقعہ کتبِ احادیث میں ایک ترتیب کے ساتھ بیان نہیں ہوا بلکہ ایسا معلوم ہوتاہے کہ رسول اللہ ﷺ نے اس سفر کے مختلف مراحل کو مختلف مجالس میں بیان فرمایا اور صحابۂ کرام نے جس طرح سنا اُسے اپنی یاداشت میں محفوظ کرلیا۔ اُس دور میں واقعات کو تاریخی اور واقعاتی ترتیب کے ساتھ مرتب ومدوّن کرنے کا رواج بھی نہ تھا بلکہ اصل مقصد اِبلاغ تھا کہ جو بات یا واقعہ رسولِ اکرم ﷺ کی زبانِ مبارک سے سنا ہے،اُسے لفظ بہ لفظ محفوظ کرلیا جائے اور اس کا ابلاغ ہوجائے ۔پس رسول اللہ ﷺ نے اپنی حکمت ِمبارکہ کے تحت مختلف مواقع پر اسے بیان فرمایا، کیونکہ آپ کا بنیادی مقصد بھی ابلاغ اور ہدایت تھا۔ صحابۂ کرام کا معمول یہ تھا کہ جو بات انہوں نے سنی اور جس طرح سنی اُسے بیان کردیا۔ معراج کی ایک حکمت خود قرآن نے بیان فرمادی:''اور ہم نے جو مشاہدہ(شبِ معراج)آپ کو دکھایا تھا، وہ لوگوں کے لئے ایک آزمائش تھا(کہ کون کسی تردد کے بغیر تصدیق کرتاہے اور کون اسے عقل کی میزان پر پرکھ کر رد کردیتاہے)، (بنی اسرائیل:60)‘‘۔

واقعۂ معراج تیس سے زائد صحابۂ کرام سے مروی ہے اور حدِّشہرت کو پہنچا ہواہے ۔ میں نے تفسیر اور حدیث وسیرت کی کسی کتاب میں اس واقعے کا بیان اتنا مربوط نہیں دیکھا جتنا کہ عظیم مفسرومحدّث علامہ غلام رسول سعیدی نے اپنی تفسیر تبیان القرآن ، جلد:6، ص:615-643اور شرح صحیح مسلم جلداول صفحات 671تا 778میں تمام تر تفصیلات کے ساتھ بیان کیا ہے۔ پورے واقعے کوتمام کتب احادیث کی روایات کو مربوط کرکے انہوں نے واقعاتی اور معنوی ترتیب کے ساتھ شرح صحیح مسلم، جلد:1 ، صفحات 716تا732میں بیان کیا ہے اور حدیث کی جس کتاب کا جو حصہ جہاں جہاں واقعاتی مناسبت کے ساتھ بیان کیا ہے، اسی مقام پر اصل ماخذ کے حوالہ جات بھی دے دئیے ہیں اورماشاء اللہ یہ ایک تفردّ وامتیاز ہے، جس کی سعادت سے اﷲعزوجلّ نے انہیں بہرہ ور فرمایاہے۔ اس علمی، تاریخی ، فکری اور نظریاتی کاوش کی صحیح قدر دانی وہی صاحبانِ علم کر سکتے ہیں ، جو تقابلی مطالعے کا ذوق رکھتے ہیں۔ دیگر متعلقہ ابحاث یہ ہیں :(۱)معراج کا جسمانی اور بیداری کی حالت میں ہونا اور اس کے دلائل(۲)شقِّ صدر کا واقعہ (۳)رُؤیتِ باری تعالیٰ کے بارے میں مختلف موقِف اور رُؤیتِ عینی کی بابت ترجیحی دلائل(۴)نمازِ پنجگانہ کی فرضیت اور اس کی تفصیلی بحث(۵)عہدِ صحابہ میں معراج کے مقام کے آغاز کے بارے میں مختلف اقوال اور ان میں تطبیق (۶)بیت المقدس میںانبیائے کرام کی امامت ، قبرمیں موسیٰ علیہ السلام کی زیارت ، آسمانوں پر مختلف انبیائِ کرام سے ملاقاتیں اور انبیائِ کرام کا متعدد مقامات پر موجود ہونا(۷)نمازوں میں تخفیف ، اُس کی حکمت اوردیگر مسائل ،الغرض عظمت و محبتِ مصطفی ﷺ کے جذبات سے معموربہت سی ایمان افروز مباحث ہیں اوریہ ایک نادر شاہکار ہے۔