پاکستان کے بین الاقوامی معاہدات

اسلام ایفائے عہد کی تعلیم دیتا ہے ‘ ارشادِ باری تعالیٰ ہے(1) ''اور وعدے کی پاسداری کرو ‘بے شک وعدے کے بارے میں باز پرس ہوگی ‘(بنی اسرائیل:34)‘‘۔(2)سورۂ بقرہ ‘ آیت 177میں نیکی کی جامع خصوصیات بیان کرتے ہوئے فرمایا: ''اور جب وہ عہد کرلیں ‘تو اپنے وعدوں کی پاسداری کرتے ہیں ‘‘۔(3)اسی طرح سورۂ المؤمنون میں فلاح یافتہ اہلِ ایمان کی متعدد صفات بیان کرتے ہوئے فرمایا: ''اور وہ لوگ جو اپنی امانتوں اور عہد کی پاسداری کرنے والے ہیں‘ (المومنون:8)‘‘۔

عہدِ رسالت مآب ﷺ میں مشرکین سے کھلی جنگ تھی ‘ اس دوران رسول اللہ ﷺ نے اُن سے معاہدات بھی کیے ‘وہ معاہداتِ بینَ الاقوام تھے ۔اُن میں سے ایک معاہدۂ حدیبیہ تھا ‘ جس کی بعض شرائط پر صحابہ کرام کو اضطراب بھی تھا ‘لیکن رسول اللہ ﷺ نے اُن شرائط کی پاسداری کی۔معاہدۂ حدیبیہ میں ایک تکلیف دہ شرط یہ تھی:''قریش کا جو فرداپنے ولی کی اجازت کے بغیر سیدنا محمد رسول اللہ ﷺ کے پاس آئے گا‘ اگرچہ وہ دینِ محمد پر ہو ‘اُسے واپس اُس کے ولی کے پاس لوٹادیا جائے گااور جس شخص نے محمد رسول اللہ ﷺ کی اتباع کی ہو ‘اگر وہ قریش کے پاس آئے گا ‘تو قریش اُسے واپس نہیں لوٹائیں گے‘‘ ۔

ابھی معاہدے پر دستخط ہوئے ہی تھے کہ ابوجَندَل مسلمانوں کے پاس پہنچے‘ اُن کے باپ سہیل نے انہیںبیڑیاں پہناکر قید کر رکھا تھا‘ وہ قید خانے سے نکل کر بچتے بچاتے حدیبیہ پہنچے ۔مسلمان اُن کو خوش آمدید کہنے کے لیے کھڑے ہوئے ‘جب اُن کے باپ نے انہیں دیکھا تو اٹھ کر انہیں لاٹھیوں سے مارنے لگا اور گلے سے پکڑکر کہا: اے محمدؐ!میںیہ پہلا مقدمہ آپ کے سامنے پیش کر رہا ہوں‘ اِسے واپس لوٹادیجیے ۔ رسول اللہ ﷺ نے اس انتہائی تکلیف دِہ صورتحال میں فرمایا:'' ہم عہد شکنی نہیں کریں گے ‘‘۔اس دوران صحابہ ابوجندل کو پناہ دے چکے تھے ‘ ابوجندل نے کہا: میں مسلمان ہوکر آیا ہوں ‘کیااب مجھے بے یارومددگار کر کے مشرکوں کی طرف لوٹادیا جائے گا‘یہ اذیت ناک لمحہ تھا ۔ رسول اللہ ﷺ نے فرمایا: اے ابوجندل! صبر کرو ‘ اجر پائو گے ‘ کیونکہ اللہ تعالیٰ تمہارے اور تمام بے بس لوگوں کے لیے مشکل سے نجات کی صورت مقدر فرمائے گا۔ ہم نے ایک قوم سے معاہدہ کرکے شرائط طے کرلی ہیں ‘ہم دھوکا نہیں دیں گے‘ (سبل الھدیٰ والرشاد‘ ج:5ص: 55-56)‘‘۔الغرض رسول اللہ ﷺ نے یک طرفہ طور پر اس معاہدے کو نہ توڑا ‘پھر مشرکوں نے عہد شکنی میں پہل کی تو رسول اللہ ﷺ نے پہلے اُن کو وارننگ دی اور فرمایا: اب ہم پر اس عہد کی پاسداری لازم نہیں رہی اور آپ فتحِ مکہ کے سفر پر روانہ ہوگئے ‘ اللہ تعالیٰ نے آپ کو تاریخی فتح عطا فرمائی‘ اس کا ذکر قرآنِ کریم میں موجود ہے۔

نوہجری کوحج فرض ہوا‘ مسلمان حضرت ابوبکر صدیقؓ کی امارت میں حج کے لیے مکۂ مکرمہ تشریف لائے ۔پھر حضرت علیؓ رسول اللہ ﷺ کے نمائندۂ خاص کے طور پر سورۂ براء ت کی ابتدائی آیات کا اعلامیہ جاری کرنے کے لیے آئے اور میدانِ عرفات سے تاجدارِ ختمِ نبوتﷺ کی طرف سے یہ اعلامیہ جاری ہوا:

''اللہ اور اس کے رسول کی طرف سے اُن مشرکوں سے بے زاری کا اعلان ہے‘ جن سے تم نے معاہدہ کیا تھا ‘ سو (اے مشرکو!) اب تم چار ماہ چل پھر لو اور یقین رکھو کہ تم اللہ کو عاجز نہیں کرسکتے اور یہ کہ اللہ کافروں کو رسوا کرنے والا ہے اور اللہ اور اس کے رسول کی طرف سے حجِ اکبر کے دن تمام لوگوں کے لیے اعلانِ عام ہے کہ اللہ اور اس کا رسول مشرکوں سے بریُ الذّمہ ہیں‘‘ ‘پھر آگے چل کر فرمایا:'' ماسوا اُن مشرکوں کے جن سے تم نے معاہدہ کیا تھا ‘پھر انہوں نے( اُس عہد کی پاسداری میں )تمہارے ساتھ کوئی کمی نہیں کی اور نہ تمہارے خلاف کسی کی مدد کی ‘ سو اُن سے کیے گئے معاہدے کی مدت پوری کرو ‘بے شک اللہ تعالیٰ متقین کو پسند فرماتا ہے ‘ (التوبہ:1-4)‘‘۔واضح رہے کہ ایک ایسے وقت میں جب مسلمان فتحِ مکہ کے بعد مکمل طور پر غالب آچکے تھے اور مخالفین نیست ونابود ہوچکے تھے‘ قرآنِ کریم نے مسلمانوں کو تاکید کی کہ یک طرفہ طور پر معاہدے کونہ توڑا جائے ۔ آج صدرِ امریکہ عالمی معاہدات کو یک طرفہ طور پر توڑ رہے ہیں ‘ یہ قانون کی بے حرمتی اور اخلاقی زوال کی انتہا ہے۔

اندازہ لگائیے کہ حالتِ جنگ میں بھی اسلام نے عہد کی پاسداری کی تعلیم دی اور رسول اللہ ﷺ نے معاہداتِ بینَ الاقوام کے ایفا کی شاندار روایات قائم فرمائیں ۔پس جو دین حالتِ جنگ میں بھی عہد شکنی کی اجازت نہ دے ‘ وہ حالتِ امن میں اِسے کیسے گوارا کرسکتا ہے۔یہ تمہیدی کلمات میں نے اس لیے لکھے کہ بلوچستان میں رکوڈک کے سونے کے ذخائر کے بارے میں غیرملکی کمپنی ٹیتھیان سے معاہدہ ہوا تھا‘لیکن سپریم کورٹ آف پاکستان کی مداخلت کی بنا پر وہ معاہدہ منسوخ کرنا پڑا ۔ حال ہی میں عالمی عدالت نے یک طرفہ طور پر معاہدہ توڑنے کی بنا پر پاکستان پر بھاری جرمانہ عائد کیا ہے ۔ یہ صورتحال ہمیں اس لیے پیش آتی ہے کہ ہماری حکومتیں عالمی معاہدات کرتے وقت انتہائی عجلت میں ہوتی ہیں اور قانونِ بین الاقوام کے ماہرین سے اُن معاہدات کی شرائط کا تجزیہ نہیں کراتیں اور اُس کے نتیجے میں وہ معاہدے گلے کا طوق بن جاتے ہیں ۔

یہی غفلت انتہائی منفعت بخش ادارے پی ٹی سی ایل کی نجکاری کے موقع پر ہوئی۔ اتصالات سے معاہدہ کرکے 26فیصد کی ادائیگی پر پورا انتظامی کنٹرول انہیں دے دیا گیا ۔ حکومتِ پاکستان نے وعدہ کیا کہ پی ٹی سی ایل اپنی تمام املاک کی ملکیت اور قبضہ اتصالات کے حوالے کرے گی ۔ہمارے ہاں سرکاری املاک سے ناجائز قبضے واگزار کرنادشوار ہوتا ہے ‘ کیونکہ قابضین کی طرف سے مزاحمت پر حکومت کے خلاف طوفان اٹھ کھڑا ہوتا ہے ۔اب حکومت بے بس ہے‘اتصالات نے تقریباً 80کروڑ ڈالرکے بقایا جات ادا نہیں کیے‘ پاکستانی کرنسی میں اس کی موجودہ مالیت تقریباً ایک سو دس ارب روپے ہے ‘وہ اِس عرصے میں بے تحاشا نفع کماکر لے گئے‘ پی ٹی سی ایل کے ڈویژنل دفاتر میں کیا کرّوفر ہوتا تھا‘ جب کہ آج یہ دفاتر یتیم خانے کا منظر پیش کر رہے ہیں‘سنا ہے کئی عالی شان دفاتر کو کرائے پر دے کر پی ٹی سی ایل کے بعض دفاتر کو فلیٹس میں منتقل کردیا گیا ہے۔

اسی طرح پاکستان سٹیل کی نجکاری اکیس ارب میں ہونا قرار پائی تھی‘ مگر سپریم کورٹ آف پاکستان نے اِسے روک دیا ‘اس کے بعد پاکستان سٹیل ملز ایک مفلوج ادارہ بن چکا ہے اوراب تک دسیوں ارب روپے تنخواہوں کی مد میں سرکاری خزانے سے ادا کیے جاچکے ہیں ۔لیکن اگر وہ نجکاری ہوچکی ہوتی ‘تو پاکستان سٹیل کی کھربوں روپے کی زمینی جائیداد خریدار کمپنی کے ہاتھ آجاتی اور وہ اُسے اوپن مارکیٹ میں بیچ کر غائب ہوجاتے ‘نجکاری کے بعد کئی صنعتوں کا یہ حشر ہوا ۔

پراپرٹی ڈویلپر جب کوئی ہائوسنگ سکیم لانچ کرتے ہیں ‘تو ماحول انتہائی زرق برق ‘ لش پَش اور چکاچوند سے معمور ہوتا ہے۔ پلاٹوں یافلیٹوں کے خریدارمعاہدۂ خریداری کی دستاویز کو پڑھے اور سمجھے بغیر دستخط کردیتے ہیں اور جب وہ قسطیں ادا نہیں کرپاتے اور معاہدۂ خریداری کو منسوخ کرنے کے لیے ڈویلپر سے رابطہ کرتے ہیں تو پتا چلتا ہے کہ ساری شرائط ڈویلپر کے حق میں ہیں ‘ وہ چند قسطیں ادانہ کرنے پر یک طرفہ طور پر معاہدہ منسوخ کرکے ادا کردہ اقساط کو ضبط کرلیتاہے ‘ خریدار کے حقوق کے تحفظ کی کوئی شِق اُس معاہدے میں نہیں ہوتی ‘لیکن :'' اب پچھتائے کیا ہووَت‘جب چڑیا ں چگ گئیں کھیت‘‘ کا منظر ہوتا ہے‘ یہی حال ہمارے نظامِ حکومت کا ہے ۔

چند سال پہلے ایک کانفرنس میں قانونِ بین الاقوام کے ماہر جناب احمر بلال صوفی نے ہمیں بتایا تھا کہ پاکستان پر تقریباً نو ہزارملکی اور تیرہ ہزاربین الاقوامی قوانین حاکم ہیں ۔ جب عالمی اداروں میں یہ قوانین بن رہے ہوتے ہیں ‘ تووہاں ہماری نمائندگی نہیں ہوتی یا جو نمائندہ بن کر جاتے ہیں ‘ وہ ان بے رونق اجلاسوں میں شرکت کے بجائے سیر وتفریح کر رہے ہوتے ہیں ‘ جب کہ اس کے برعکس بیدارمغز قوموں کے نمائندے قانون کے ایک ایک لفظ اور ایک ایک شق پر طویل بحثیں کرتے ہیں ۔ اِسی صورتحال کا سامنا ہمیں ہندوستان کے ساتھ سندھ طاس معاہدے میں درپیش ہے ‘ ہندوستان معاہدے میں خلا سے فائدہ اٹھا کرڈیم پہ ڈیم تعمیر کررہا ہے ‘ اس کے نتیجے میں پاکستان خطرناک حد تک قلتِ آب کے خطرے سے دوچار ہے ‘پاکستان کو عالمی عدالت سے کوئی تحفظ نہیں مل رہا ‘ کیونکہ معاہدہ کرتے وقت ہم نے اُس کی شقوں کا بغور جائزہ نہیں لیا تھا اورقانونِ بینَ الاقوام کے ماہرین سے رہنمائی حاصل نہیں کی تھی‘ جس کا خمیازہ ہمیں اب بھگتنا پڑ رہا ہے۔ اسی طرح سی پیک سے متعلق معاہدات کا بھی کسی کو علم نہیں ہے ‘ حالانکہ یہ معاہدات اشخاص کے درمیان نہیں ہوتے ‘ بلکہ اقوام اور ممالک کے درمیان ہوتے ہیں ‘ ایل این جی کا معاہدہ بھی مستور ہے۔

ہمارے سِول حکمران دبائو پرخصوصی فوجی عدالتوں کے حق میں تو آئینی ترامیم منظور کرلیتے ہیں ‘ لیکن از خود کوئی ایسی آئینی ترمیم اتفاقِ رائے سے لانے کے لیے تیار نہیں ہیں کہ ہمارے عالمی معاہدات کا طریقۂ کار کیا ہو ‘ ملکی اور قومی مفادات کا تحفظ کس طرح کیا جائے اور اس کے لیے آئینی اور قانونی چیک لسٹ کیا ہونی چاہیے ۔ماضی کی تلافی تو اب ممکن نہیں ہے ‘ لیکن آئندہ کے لیے ہمیں کوئی پیش بندی ضرور کرنی چاہیے ۔نوٹ: یہ کالم اپریل 2017میں طبع ہوا تھا‘ لیکن 10جنوری 2018کے اخبارات میں شہ سرخی کے طور پر جناب چیف جسٹس آف پاکستان کا بیان چھپا ہے ‘جس میں انٹر نیشنل پاور پروجیکٹس کو گلے کے پھندے سے تعبیر کیا گیا ہے ‘ کیونکہ ان کی شرائط یک طرفہ ہیں‘ ہماری باوقار عدالتِ عظمیٰ کو محض آبزرویشن یا ریمارکس دینے کے بجائے اپنے فیصلے میں آئندہ بین الاقوامی معاہدات کے بارے میں واضح گائیڈ لائن دینی چاہیے جو ہر حکومت کو بعض اصولوں کا پابند کرے۔ لیکن یہ امر بھی ملحوظ رہے کہ ہم لینے والے ہیں‘دینے والے نہیں ہیں اور لینے والا ہاتھ دینے والے کے آگے مجبور ہوتا ہے‘ یہی وجہ ہے کہ ہر نیا آنے والا حکمران بڑے طمطراق کے ساتھ ایوانِ اقتدار میں داخل ہوتا ہے ‘ لیکن پھر کانِ نمک میں نمک بن جاتا ہے۔

روزنامہ دنیا ایپ انسٹال کریں