اعلانِ جنگ اور آئین

میرے خیال میں چار اپریل کو ذوالفقار علی بھٹو کی چالیسویں برسی کے نام پر بلاول بھٹو کی زبانی اور اپنی نگرانی میں لکھوائی گئی تحریر کے ذریعے آصف علی زرداری نے گڑھی خدا بخش کے میدان سے ریاست کو کھلی دھمکی دلواتے ہوئے اعلان جنگ کرنے کا اشارہ دیا ہے۔ جب بھٹو شہید کی یہ برسی منائی جا رہی تھی اور بلاول سمیت اس کی بہنیں اور آصف زرداری اور فریال تالپور‘ بھٹو شہیدکی قبر پر پھولوں کی چادریں چڑھاتے ہوئے تصویریں بنوا رہے تھے ‘تو میرے ساتھ بیٹھے ہوئے استاد محترم گوگا دانشور کہنے لگا کہ ان کی آنکھیں ‘وہ منظر دیکھنے کونہ جانے کب سے ترس رہی ہیں ‘جب بلاول‘ آصفہ اور بختاور اپنے دادا حاکم علی زرداری اور محترمہ فریال تالپور اور ان کے بھائی آصف علی زرداری اپنے باپ اور ماں کی قبر وںپر اسی طرح پھولوں کی چادریں چڑھاتے ہوئے ان کی برسیاں منااور دعائیں مانگ رہے ہوں گے۔

بلاول بھٹو‘ گڑھی خدا بخش میں للکارتے ہوئے جب جنرل ضیا الحق کی قبر کا بھٹو شہید کی قبر سے موازنہ کر رہے تھے‘ تو میرے سامنے ان کے دادا مرحوم حاکم علی زرداری کی وہ تصویر آ گئی‘ جس میں ذوالفقار علی بھٹو کی پھانسی کے بعد نواب شاہ دورے کے دوران وہ جنرل ضیاالحق کو سندھی اجرک پہنا رہے تھے ۔انہی حاکم علی زرداری کے پوتے بلاول بھٹو زرداری کہہ رہے تھے ''اگر کسی نے ان کے نا نا اور ماں بے نظیر بھٹو کے آئین میں ہلکی سی بھی ترمیم کرنے کی کوشش کی‘ تو اس کے ہاتھ توڑ دیںگے‘‘۔بلاول نے ایک جانب اشارہ کرتے ہوئے کہا '' ہم جانتے ہیں کہ اٹھارہویں ترمیم کی سب سے زیا دہ تکلیف کن کو ہے ‘لیکن اس ترمیم کو چھیڑا گیا تو پھر دما دم مست قلندر ہو گا‘ جو سب کچھ بہا لے جائے گا‘ اس وقت پھر ہمیں کوئی کچھ بھی نہ کہے۔ یہ سمجھنے کے لیے کہ ان کا شارہ کس طرف تھا‘ ذہن پر زیادہ زور دینے کی ضرورت نہیں پڑے گی۔قارئین کرام ! ذراآصف زرداری صاحب کا طرز ِ عمل دیکھئے کہ گزشتہ گیارہ برس سے ان کے ہاتھوں لٹے پٹے سندھ اور سندھیوں کی بھوک کا ذمہ دار‘ اس اسلام آباد کو ٹھہرا یا جا رہا ہے‘ جسے اقتدار میں آئے ابھی آٹھ ماہ ہوئے ہیں۔

پی پی پی اور مسلم لیگ نون سمیت مولانا فضل الرحمان کی جانب سے آئین کی حفاظت اور اس سے وفاداری کی باتیں تو بہت کی جاتی ہیں اور ہر کوئی اس آئین کی بے حرمتی کرنے والوں کوغداری کے جرم میں سنگین سزا دینے پر تلا ہوا ہے‘ تو کیوں نہ تاریخ اور حقائق کی روشنی میں دستاویزی ثبوتوں کو سامنے لاتے ہوئے جائزہ لیا جائے کہ 1973ء کے آئین کی چیر پھاڑ کس کس نے اور کس طرح کیا؟1973ء کے آئین کے خالق ذوالفقار علی بھٹو ‘جنہیں دنیا کے پہلے سویلین مارشل لاء ایڈمنسٹریٹر ہونے کا اعزاز حاصل ہے‘ ان کی سربراہی میں اپریل1973ء میں پاکستان کی مجلس قانون ساز کے ارکان نے اتفاق رائے سے ان کے دیئے گئے آئین کو قبول کیا اور یہ متفقہ آئین14اگست1973ء کو نافذ ہو ا‘ جو ایک تاریخی لمحہ تھا‘لیکن ابھی اس تاریخی لمحے کو گزرے صرف چار گھنٹے گزرے تھے‘ ابھی اس آئین کے ہاتھوں میں مہندی لگائی جا رہی تھی کہ شام چار بجے ذوالفقار علی بھٹو نے وزیر اعظم کی حیثیت سے اپنی ہی حمایت سے نامزد کیے ہوئے پاکستان کے صدر فضل الہٰی چوہدری سے ایک صدارتی فرمان پر دستخط کروالیے‘ جس میں لکھا تھا کہ ''آئین کے حصہ دوم کے باب اوّل میں جوبنیادی حقوق دیئے گئے ہیں اور جن کی اس صدارتی فرمان میں تشریح و توضیح ہو سکتی ہے اور اس کی رو سے عدالتوں میں ہونے والی کوئی بھی ایسی کاروائی جو نافذ ہونے کیلئے یا اس میں کسی ایسے سوال کاتعین کرنا ہو‘ جیسے بنیادی انسانی حقوق کی خلاف ورزی ‘تو ایسی صورت میں آئین کے حصہ دوم کے باب اوّل میں بنیادی حقوق کے نفاذ کیلئے کسی بھی عدالت کا کارروائی کرنے کا حق اس عرصے تک معطل رہے گا ‘جب تک آج کا یہ صدارتی فرمان موثر بہ عمل رہے گا‘‘۔ یوںاس صدارتی فرمان کے ذریعے شہریوں کو حاصل دس بڑے بنیادی حقوق سے اس وقت محروم کر دیا گیا‘ جب انہیں یہ حقوق ملے ابھی صرف چار گھنٹے ہی گزرے تھے۔کیا یہ آئین کی چیر پھاڑ نہیں تھی؟

اس صدارتی فرمان کے جاری ہونے کے بعد اگلے ہی دن پیپلز پارٹی نے اپنے متعدد سیا سی مخالفین کو گرفتار کر کے مختلف الزامات کے تحت ملک بھر کی جیلوںکی کال کوٹھریوں میں پھینک دیا اور ان میں سے کئی لوگ اس وقت تک قید میں رہے‘ جب تک جنرل ضیا الحق نے اسی متفقہ آئین کو معطل کرتے ہوئے ملک کی باگ ڈور نہیں سنبھال لی ۔ان میں اوجڑی کیمپ کی جیل اور لاہور کا شاہی قلعہ لوگوں کو ابھی تک یاد ہے۔ جناب ذوالفقار علی بھٹو کی پیپلز پارٹی 2000دنوں تک بر سر اقتدار رہی۔ ان کی حکومت نے اپنے دیئے گئے متفقہ آئین میں یک طرفہ طور پر سات ترامیم کیں۔ مجلس قانون ساز کے قوانین کے قواعد و ضوابط کو معطل کیا گیا۔ کسی بحث اور سوچ بچار کے بغیر ہی ترمیمی بل پارلیمنٹ میں پیش کیے گئے‘ جبکہ بعض اوقات تو چند گھنٹوں کے وقفے سے ترمیمی بل پیش کیے جاتے رہے۔ با وجود اس کے کہ اس وقت پارلیمنٹ کا اجلاس جاری تھا۔ اس بات کی تصدیق اس امر سے کی جا سکتی ہے کہ پیپلز پارٹی نے219 آرڈیننس (اپنے دو ہزار دنوں کے اقتدار میں ہر دس روز میں ایک) نافذ کر نے کے علا وہ100کے قریب صدارتی فرمان جاری کیے۔ بھٹو صاحب کی حکومت ختم ہوئی تو جنرل ضیا الحق کی ڈکٹیٹر شپ آئی تو انہوں نے آئین میں جو آٹھویں ترمیم پیش کی‘ اس پر لگاتار چھ ماہ تک مجلس شوریٰ کے اندر اور باہر بحث ہوتی رہی‘ پھر کہیں جا کر یہ ترمیم پاس ہوئی۔ محمد خان جونیجو وزیر اعظم بنائے گئے ‘تو انہوں نے آئین کی نویں ترمیم پاس کرانے کی سر توڑ کوشش کی‘ لیکن کامیاب نہ ہوسکے‘ لیکن ان کے دور میں آئین میں دسویں ترمیم پاس کی گئی۔

1988ء میں ہونے والے عام انتخابات کے نتیجے میں جب محترمہ بے نظیر بھٹو بر سر اقتدار آئیں‘تو وہ صرف ایک گیارہویں ترمیم کا سامنا کرتے ہوئے جو پاس نہیں ہو سکی‘ اپنا اقتدار ختم کر بیٹھیں ۔ان کے بعد نواز شریف بر سر اقتدار آئے‘ جو آئین میں ترمیم کے حوالے سے خاصے کامیاب ثابت ہوئے۔ ان کے دورحکومت1990-93ـء میں تمام قواعد و ضوابط معطل کرتے ہوئے بارہویں ترمیم پیش کی گئی ۔اس ترمیم کا تعلق خصوصی عدالتوں اور ان میں زیر سماعت مقدمات کے فوری فیصلوں سے متعلق تھا۔ ان کے دوسرادور حکومت جو 1997-99ء تک ہے‘ اس میں یکم اپریل1997ء کو ان کی طرف سے آئین میں 13ویں ترمیم پیش کی گئی ‘ جس میں جنرل ضیا الحق کی طرف سے آئین میں کی گئی آٹھویں ترمیم میں مزید ترمیم لائی گئی اور حیران کن حد تک قومی اسمبلی کے تمام ضوابط کو معطل کرتے ہوئے‘ اسے ایک ہی دن قومی اسمبلی اور سینیٹ میں پیش کرتے ہوئے دونوں ایوانوں نے اِسے اُسی روز پاس بھی کرو الیا گیا۔اب کہا جاتا ہے کہ آمر آئین توڑتے ہیں ‘وہ آئین توڑنے کے جرم میں غدار کہے جا رہے ہیں؛ اگر آمر غدار ہیں ‘تو پھر آپ کیا ہیں؟آپ کے آئین کو مسخ کرنے کے ثبوت عدلیہ سمیت سب کے سامنے ہیں‘ تو کیوں نہ پھر آپ پر بھی آئین کے آرٹیکل6 کے تحت کارروائی کی جائے؟