لندن پلان(2).....

بات ہو رہی تھی لندن پلان کی ،جو دو طرح کے ہیں۔تاریخی طور پر دونوں طرح کے پلان کا نتیجہ ہمیشہ ایک ہی نکلا۔خواہ وہ نو آبادیاتی نظام کے ذریعے امریکہ کے وائٹ ہاؤس کو نذرِ آتش کرنے کا ہو‘افریقہ ،ایشیاء ،کو کالونی بنانے کا یا پھر جنگ ِافیون کے ذریعے چین کو تاراج کرنے کا۔

آپ پوچھیں گے کون سے پلان کا کیا نتیجہ...؟مگر اس سوال کے جواب سے پہلے یہ تو جان لیں کہ ہمارے لندن والے'' آف شور ‘‘ پی ایم ہاؤس والے دنوں میں کون سا پلان بنا۔جس کے لیے کئی گورے اور بہت سے رنگ دار حامد کرزئی سمیت دور دیس کے ملکوں سے لندن پہنچے۔ جن کے لیے ایک ہی اکاؤنٹ سے ائیر ٹکٹ خریدے گئے ۔پلان کا ایک حصہ آپ بھی سن لیں جو ایک دیسی سہولت کار کی زبانی یوں ہے۔

''گریٹر افغانیہ کا نعرہ‘‘ اسے یواے ای یا پھر ریاست ہائے متحدہ کی طرز پر اکٹھا کرنے کا کام تین عدد حکومتی امدادیوں نے حال ہی میں شروع کیاہے۔

لندن جانے سے کچھ دن پہلے میں عبدالرحمن کے بالغانہ قومی شناختی کارڈٖ کے لیے پارلیمینٹ ہاؤس میںواقع نادرا کے سہولت سینٹر گیا۔ساتھ پانچ چھ وکیل حضرات بھی تھے۔ہمارے کام کے دوران مولانا شیرانی صاحب چیئرمین اسلامی نظریاتی کونسل بھی تشریف لے آئے۔ان سے پرانی یاداللہ ہے۔میں نے ان کا آبائی گھر اور گاؤں شیرانی بھی دیکھا ہوا ہے۔بلکہ ان کے بالا خانے پر فرشی ناشتہ کرنے کی سعادت بھی حاصل کی۔شیرانی صاحب نے ڈیورنڈ لائن اور ہندوستان کے بٹوارے کے حوالے سے زبردست سوالات اٹھائے ۔میں نے ان کی جرح کے جواب میں جو کچھ کہا وہ ان سے اجازت لے کر وکالت نامہ میں پورا مکالمہ لکھوں گا۔چونکہ یہ ذاتی گفتگو تھی اس لیے شیرانی صاحب سے پوچھ لینا اخلاقی تقاضا سمجھتا ہوں۔البتہ ان کا فوری جواب نہ آیا تو میں اسے'' ہاں‘‘ سمجھ لوںگا۔

اس طرح کی'' ہاں‘‘ہیر سیال سے بھی کروائی گئی تھی۔جو'' وارث شاہ‘‘نے پنجابی اور عالمی لٹریچر میں ایک ''لیجنڈ‘‘بنا دیا۔ہیر وارث شاہ والی ہاں میںایک قاضی صاحب کا خاصا ذکر موجود ہے۔ہیر وارث شاہ کا یہ حصہ پنجابی زبان میں لکھی گئی بہترین ہجو ہے۔اسی موضوع پر بلھے شاہ اورعلامہ اقبال نے بھی کوئی کم شاہکار نہیں لکھے۔چلتے چلتے پوٹھوہاری وسیب کا ایک قصہ سن لیں۔گاؤں کے مولوی صاحب کے گھر میں کوئی بھولی بھٹکی ککڑی (مرغی) گھس آئی۔مولوی صاحب نے اسے ٹوکری میں قید کر دیا۔شام کو مولوی صاحب کی بیگم نے کہا آج کیا پکانا ہے۔مولوی صاحب نے جواب دیا مرغی پکا لو۔سمجھدار بیوی نے کہا وہ تو کسی اور کی ہے ہم اس کے مالک کی اجازت کے بغیر مرغی کیسے ذبح کر لیں۔مولوی صاحب بولے یہ بے چاری لاوارث ہے ۔میں حجرے کی چھت پر چڑھ کر تین دفعہ آواز لگاؤں گا۔ کسی نے مرغی کی ملکیت کا دعویٰ نہ کیا تو پھر اس''حلال مال ‘‘کو کھانا جائز ہو گا۔ورنہ اسے رات کوئی گیڈر یا جنگلی بلا کھا جائے گا۔ چھت پر گیازور دار آواز یوں لگائی...

''ارے...اوئے کسی کی...پھر بولے بیگم چھری لاؤ حلال مال ذبح کرتے ہیں۔بیگم بولی اعلان میں آپ نے مرغی کاتونام ہی نہیں لیا...؟گھا گ مولوی نے یہ کہہ کر بیگم کو لاجواب کر دیا۔''مرغی ‘‘کا نام میں نے دل میں لیا تھا۔باقی اعلان واضح کر دیا...بات لندن پلان سے گھومتے پھرتے لاوارث مرغی کی طرف نجانے کب مڑ گئی۔

واپس مارننگٹن چلتے ہیں۔ویسٹ منسٹر کا یہ علاقہ گورے لوگوں کا ہے۔کوئی عرب فیملی تو دکھائی دے گی مگر باقی ایشیائی باشندے یہاں حسبِ ضرورت ہی آتے ہیں۔کل ایک لائبریری میں کچھ گوروں سے گفتگو کا موقع ملا۔ جن کا تعلق یورپی یونین سے تھا۔کہنے لگے ‘برطانیہ نے1945ء والے گورے ساتھیوں کو سرد جنگ کے بعد سخت مشکل حالات میں اکیلا چھوڑ دیا ہے۔ ایک بات کان کھڑے کردینے کے لیے کافی تھی۔یہی کہ اب کالے ہوں،یا رنگدار سب کو واپس آبائی ملکوں میں جانا ہو گا۔ایک گورے نے معقول اور دلائل سے بھرپور گفتگو کے آخر میں یہ جملہ کہا..."Its Only Question of Timings" ۔مطلب یہ تھا اب یہی فیصلہ ہونا باقی ہے کہ کون کب واپس جاتا ہے۔اگلے روز آکسفورڈ شہر کے کچھ دوستوں سے ملاقات طے تھی۔ان کے اصرار پر موٹر وے M40کے ذریعے کار سفر شروع ہوا۔آپ یہ جان کر حیران ہوں گے موٹر وے نمبر40پر نہ ملکہ کے نام کی تختی تھی۔نہ ہی افتتاح کے عرصے میں برطانیہ کے وزیراعظم کی انگلی والا کتبہ۔نہ کسی شہزادے کا بینر یا پوسٹر۔

وجہ صاف ظاہر تھی۔یہ کسی حکمران کے خاندانی مال،سے تعمیر ہونے والی شاہراہ نہیں ۔بلکہ اس پر برطانیہ کے عوام کے ٹیکسوں کا پیسہ لگا۔مجھے یاد آیا میرے پیارے وطن کی ہر گلی،ہر سکول تمام پبلک پارک،سرکاری ہسپتال پر کسی نہ کسی''حاتم طائی‘‘ کے نام کا طغریٰ سجا ہو ا ہے۔یوں لگتا ہے ہر پل کا جنگلہ کسی شریف آدمی نے اپنے ہاتھوں سے لوہا کوٹ کوٹ کر تیار کیا۔جبکہ کنکریٹ میں چھپا ہوا بے تحاشا سریا اس سے بھی بڑے شریف کاری گر کی ذاتی ملکیت کا پھل فروٹ ہے۔یہاں ایک سوال ضرور اٹھتا ہے۔کیا یہ نظام جو برطانیہ میں ہے جہاں سے اس طرز حکمرانی یعنی جمہوریت کا خمیر اٹھا یہ اصلی جمہوریت ہے یا جعلی۔ کیونکہ اگر برطانیہ کی جمہوریت اصلی ہے تو پھر ہمارے ہاں اربوں، کھربوںروپے سے چلنے والا نظامِ حکمرانی کیا ہے۔۔۔؟اور پاکستان میں جمہوریت اصلی ہے جعلی نہیں تو پھر برطانیہ کے نظام کو ڈیموکریسی کی بجائے گلّو کریسی کہنا پڑے گا۔یہی وہ نقطہ ہے جس سے اس سوال کا جواب ملتا ہے کہ لندن پلان کا نتیجہ ہے کیا...؟

انشا جی نے معلوم نہیں کس کے لیے کہا تھا ۔ ؎

سچ اچھا پر اس کے لیے

کوئی اور مرے تو اور اچھا...

میں اتنے سالوں بعد فیملی کے ساتھ چھٹی پر نکلا ہوں۔نہیں چاہتا اتنا سچ لکھوں کہ اگلی دفعہ امیگریشن کاؤنٹر سے ہی واپس آنا پڑجائے۔ہیتھرو ائیر پورٹ کے امیگریشن کاؤنٹر پر میری بیگم صاحبہ ایک صاحبزادی اور عبداللہ کے ساتھ میرے اور عبدالرحمن کے آنے کے دو دن بعد پہنچے۔اس کاؤنٹر سے وہ فاسٹ ٹریک کے ذریعے آئے۔ساتھ والے کاؤنٹر پر میر پور سے تعلق رکھنے والی ایک بزرگ برطانوی شہری پوٹھوہاری زبان میں زور زور سے چیخ رہی تھیں۔گوری کاؤنٹر کلرک کو کچھ سمجھ نہ آیا۔ساتھ والے کاؤنٹر سے سکھ کو بلایا گیا۔جس نے پوچھا ماں جی یہ کیا ہے۔اماں بولیں ، چھوٹا تندور ۔اگر کسی نے اسے توڑنے کی کوشش کی تو میںاس کا سر توڑ دوں گی۔سکھ نے گوری کو بتایا یہ مٹی سے بنا خالی اوون ہے۔CLAY HOLLOW OVENَََََُ ۔پھر پوچھا اماں کتنے عرصے سے انگلینڈ میں ہو۔جواب ملا 42سال سے۔۔۔سکھ بولا 4لفظ انگریزی کے سیکھ لیے ہوتے۔

یہ واقعہ سن کرمجھے قوم کے نجات دہندہ یاد آ گئے۔لندن میں ڈالروں کے کنٹینر پارک کرنے والوں نے برطانوی سامراج سے کاش جمہوریت کے دو بنیادی اصول ہی سیکھ لیے ہوتے۔

عوام کی حکومت۔عوام کے لیے...(جاری)

روزنامہ دنیا ایپ انسٹال کریں