سعیدہ وارثی کی اخلاقی جرأت

فلسطینی عوام پر اسرائیل کی جارحیت اور بربریت کو کتنے ہی دن گزر گئے‘ بمباری ہوتی رہی‘ معصوم فلسطینی مرتے رہے‘ ساری دنیا اور دنیا کی وہ طاقتیں جن کے اشارے پر جنگیں شروع ہوتیں اور جن کے اشارے پر جنگ بندی ہوتی ہے‘ بڑے سکون اور خاموشی سے انسانوں کا قتل عام دیکھتے رہے۔ ننھے بچوں کی کٹی پھٹی‘ بریدہ لاشیں‘ دنیا بھر کے اخبارات اور الیکٹرانک میڈیا پر دکھائی جاتی رہیں مگر کوئی دل نہیں پسیجا۔ اقوام متحدہ اور اس کے ذیلی ادارے اس قتل عام پر یوں خاموش رہے جیسے وہ اس سارے کھیل کا حصہ ہوں‘ امریکہ سے لے کر برطانیہ تک اور دوسرے یورپی ملکوں تک سب کے سب ایک مجرمانہ خاموشی کا شکار رہے۔ امریکی پالیسیوں کو امریکہ کی Weapon industry(جنگی ہتھیار بنانے والے کارخانے) کنٹرول کرتی ہے اور اس جنگ میں اسرائیل امریکی گولہ بارود استعمال کر رہا ہے۔ صرف امریکہ ہی نہیں برطانیہ بھی اسرائیل کو‘ سالانہ 12 بلین ڈالر کے جنگی ہتھیار فروخت کرتا ہے۔ گولہ بارود بم کی صورت میں‘ موت کا سامان اگر استعمال نہیں ہوگا تو مزید خریدنے کی طلب کیسے ہوگی سو‘ اگر اسرائیل معصوم فلسطینیوں پر یہ جنگی ہتھیار استعمال کر رہا ہے تو پھر اس سے زیادہ امریکہ اور برطانیہ کے لیے خوشی اور اطمینان کی بات کیا ہو سکتی ہے‘ ظاہر ہے ان کے کارخانوں میں بننے والے جنگی سامان کی طلب بڑھے گی۔ اسرائیل کی صورت میں ایک خریدار موجود ہے اور وہ اس جنگ کی مذمت کر کے‘ اپنے کاروباری حلیف کو ناراض نہیں کرنا چاہتے۔ بلکہ شاید وہ تو اس جنگ کی طوالت کے متمنی ہوں۔ اگر معصوم فلسطینی بچے اور عورتیں اس جنگ میں مارے جا رہے ہیں تو ایسی کون سی قیامت ہے‘ جنگ میں تو ایسا ہوتا ہی ہے۔ اسی سوچ کا پردہ ان عالمی طاقتوں کے ضمیر پر پڑا ہے‘ یہی وجہ ہے کہ اس نام نہاد مہذب دنیا میں جہاں ایک کتے کی موت پر جانوروں کے حقوق کے لیے کام کرنے والی تنظیمیں ہنگامہ برپا کر سکتی ہیں‘ وہاں بچوں کے معصوم جسموں کو بارود سے اڑایا جاتا ہے مگر اس کی مذمت میں کوئی آواز بلند نہیں ہوتی۔

خاموشی کے ایسے صحرا میں‘ سعیدہ وارثی نے ڈیوڈ کیمرون کی کابینہ سے استعفیٰ اس بنیاد پر دیا کہ انہیں غزہ میں مسلمانوں کے قتل عام پر برطانوی حکومت کی پالیسی سے شدید اختلاف ہے۔ اپنے استعفیٰ میں مس وارثی نے لکھا کہ ''انسان کو زندگی اپنے اصولوں کے مطابق گزارنے کا حق ہے۔ جبکہ غزہ میں معصوم لوگوں کا قتل عام اور دوسری جانب خود کو برطانوی کابینہ کا حصہ ہونے کی اس صورت حال میں مجھے لگتا ہے کہ میں اپنے اس حق سے محروم ہو چکی ہوں۔ میں انتہائی افسوس کے ساتھ اپنا استعفیٰ پیش کرتی ہوں‘‘۔

ڈیوڈ کیمرون کی کابینہ میں سعیدہ وارثی مسلمان اقلیت کی قابل قدر آواز سمجھی جاتی تھیں۔ استعفیٰ دینا یقینا ایک اخلاقی جرأت ہے جس کا اظہار کر کے انہوں نے تمام دنیا کے مسلمانوں خصوصاً برطانوی مسلمانوں اور پاکستانی مسلمانوں کا سر فخر سے بلند کردیا ہے۔ ایسے وقت میں جب عرب دنیا پر ایک موت جیسی خاموشی طاری ہے‘ وہاں سعیدہ وارثی کی جرأت انکار نے انہیں ایک بہادر اور صاحبِ ضمیر خاتون ثابت کیا ہے ؎

یہ کلی بھی اس گلستانِ خزاں منظر میں تھی

ایسی چنگاری بھی یا رب اپنی خاکستر میں تھی

غزہ کے مسلمانوں کے ساتھ ہمدردی اور اظہار یک جہتی پر استعفیٰ دینے والی سعیدہ وارثی کو پوری دنیا سلام پیش کر رہی ہے اور دلچسپ بات یہ ہے کہ صرف مسلمان ہی ان کی اس اخلاقی جرأت کو سلام پیش نہیں کر رہے بلکہ برطانوی سیاست کے اہم افراد بھی سعیدہ وارثی کی جرأت کو سراہ رہے ہیں۔ برطانوی اخبارات بشمول مشہور روزنامہ ٹیلی گراف ے لکھا کہ سعیدہ وارثی نے اخلاقی جرأت کا ثبوت دیا۔ کنزرویٹو پارٹی کے سابق رکن کابینہ نکولس سومز (Nicholas Soames) نے اپنے ٹویٹر پر لکھا کہ حکومت کو سعیدہ وارثی کے استعفیٰ سے سیکھنا چاہیے۔ اہم انسانی مسئلے (غزہ) پر سعیدہ وارثی کا استعفیٰ دینا صائب قدم ہے۔

مس وارثی کے لیے یہ پذیرائی یقینا ایک کامیابی ہے۔ اس سے پہلے وہ افغان وار کے حوالے سے برطانوی مسلمانوں کے جارحانہ رویے کا سامنا کر چکی ہیں۔ ایک بار ان پر انڈے اور ٹماٹر اس لیے برسائے گئے کہ وہ اس حکومت کا حصہ ہیں جس نے اپنی فوجیں افغان وار میں بھیج رکھی ہیں۔ آخر وہ مسلمان ہو کر امریکی اور برطانوی جارحیت کے خلاف آواز کیوں نہیں اٹھاتیں۔ ایسا ہو سکتا ہے کہ مس وارثی کسی سیاسی مصلحت کے تحت اس ایشو پر آواز نہ اٹھا سکی ہوں وگرنہ ان کے سیاسی کیریئر پر نگاہ ڈالیں تو بیشتر موقعوں پر انہوں نے برطانوی مسلمانوں کے حقوق کا تحفظ کیا اور وہ اس میں کامیاب رہیں۔ جیسے 2006ء میں ہائوس آف کامنز (دارالعوام) کے لیڈر مسٹر جیک سٹرا نے پارلیمنٹ میں مسلمان خواتین کے نقاب لینے کے حوالے سے ایک ڈبیٹ کا آغاز کیا۔ جیک سٹرا نے پردے کے لیے نقاب اوڑھنے کی مخالفت میں ایک مقامی روزنامے میں آرٹیکل لکھا‘ اس نے ایک فقرے میں کہا کہ

"He would like to see the veil abolished in United Kingdom"

اس کے بعد برطانیہ کے مختلف اخبارات میں مزید آرٹیکل چھپنا شروع ہو گئے کہ مسلمان خواتین کو برطانیہ میں پردے کے لیے چہرہ ڈھانپنے کی اجازت نہیں دینی چاہیے۔ ایسے موقع پر سعیدہ وارثی نے مسلم خواتین کے پردے کے حق میں موثر آواز اٹھائی اور پارلیمنٹ کے اندر اور باہر اس حق کو منوایا کہ لباس کے انتخاب میں فرد کے اختیار کو ختم کرنا اس کی آزادی پر قدغن لگانے کے مترادف ہے۔ جیسے اگر کوئی مجھے یہ حکم دے کہ میں سکرٹ پہنوں یا پھر میں اپنا چہرہ ڈھانپوں تو مجھے یہ قابلِ قبول نہیں ہوگا۔ برطانوی معاشرے میں رہتے ہوئے مس وارثی نے پاکستانی شلوار قمیض پہن کر اپنی الگ شناخت بنائی ہے۔ ایک برطانوی میگزین نے مس وارثی کا انٹرویو شائع کیا تو اس گلابی شلوار قمیض دوپٹے کی الگ سے نمایاں تصویر چھاپی‘ جو انہوں نے حکومتی آفس جوائن کرنے کے پہلے روز زیب تن کیا تھا۔

گوجر خان کے صفدر حسین کی چوتھی بیٹی‘ سعیدہ وارثی کو اس وقت پوری دنیا سلام پیش کر رہی ہے۔ کچھ حلقے یہ سوال بھی اٹھاتے ہیں کہ آخر ایک شخص کے استعفیٰ دینے سے کیا فرض پڑے گا! تو اس کا جواب یہ ہے کہ سعیدہ وارثی نے وہی کچھ کیا جو ایک فرد کی حیثیت سے وہ کر سکتی ہیں اور ایک فرد کے کردار کا اندازہ اسی سے لگایا جا سکتا ہے کہ جن اصولوں کی خاطر وہ مخالف ہوائوں کے سامنے کھڑا رہتا ہے۔ سعیدہ وارثی نے عالمی طاقتوں کی بہیمانہ بربریت اور انتہائی بے حسی کے مقابل‘ انسانیت کا ساتھ دینے کا فیصلہ کیا۔ کل تک وہ برطانیہ میں صرف مسلم اقلیت کی نمائندگی کر رہی تھیں مگر آج انہوں نے اخلاقی جرأت کا اظہار کر کے اور فلسطینی مظلوموں کے ساتھ کھڑا ہو کر‘ دنیا بھر میں انسانی حقوق کے لیے کام کرنے والی تنظیموں کے دل جیت لیے ہیں۔ یوں سعیدہ وارثی کے اس قدم نے ظلم کی تاریکی میں ایک شمع روشن کی ہے اور اندھیرے کو چیرنے کے لیے روشنی کی ایک ننھی کرن بھی کافی ہوتی ہے۔

شکوۂ ظلمتِ شب سے تو کہیں بہتر تھا

اپنے حصے کی کوئی شمع جلاتے جاتے

نبی رحمتﷺ کا فرمان ہے ظلم اور برائی کو دیکھو تو اسے طاقت سے روکو‘ اگر نہیں تو اسے زبان سے بُرا کہو اور اگر یہ بھی نہیں کر سکتے تو دل میں ہی اسے بُرا بھلا کہو اور یہ ایمان کا کمزور ترین درجہ ہے۔

سعیدہ وارثی نے تو ظلم کے خلاف آواز اٹھا کر صاحبِ ایمان ہونے کا ثبوت دیا۔

عرب ملکوں کے وہ حکمران جو ظلم کرنے والی عالمی طاقتوں کے دہلیز نشین ہیں‘ چپ چاپ فلسطینی بچوں کو مرتا دیکھتے ہیں۔ کیا وہ ایمان کے کمزور ترین درجے پر بھی فائز نہیں؟

روزنامہ دنیا ایپ انسٹال کریں