مسعود احمد کی مزید شاعری

اقربا پروری وہ واحد فن ہے جو ہم نے موجودہ حکومت سے سیکھا ہے اور جس کے تحت ہم نے اوکاڑہ سے مسعود احمد کی تازہ شاعری منگوائی ہے۔ ظاہر ہے کہ یہ کوئی توپ قسم کی شاعری نہیں ہے اور نہ ہی مسعود احمد کوئی توپ شاعر ہیں۔ اگرچہ ان کا ڈیل ڈول اور شخصیت کسی توپخانے سے کم بھی نہیں ہے۔ املا کی غلطیوں میں ان کے مصاحب اور ہمارے شاعر دوست اے جلیل اُن کا ہاتھ بٹاتے ہیں‘ اگرچہ موصوف خود بھی اس میں کافی طاق واقع ہوئے ہیں یعنی زبان کو کچھ زیادہ خاطر میں نہیں لاتے البتہ الفاظ ان کے آگے دست بستہ ضرور رہتے ہیں اور رحم و رعایت کے طلبگار بھی۔

چنانچہ اس تمام تر لااُبالی پن کے باوجود موصوف شعر کو شعر بنانے کی کوشش ضرور کرتے ہیں جبکہ یارلوگ تو بالعموم اتنا تردد بھی روا نہیں رکھتے۔ سادہ اور سلیس زبان میں شعر کہتے ہیں اور قاری کو کسی امتحان میں ڈالنے کی کوشش نہیں کرتے اور نہ ہی خود کسی امتحان میں پڑنا پسند کرتے ہیں۔ چنانچہ ہمارے قرب و جوار میں جس طرح کی شاعری عام طور سے اور کثیر مقدار میں تخلیق کی جا رہی ہے‘ اس سے یہ شاعری آپ کو یقینا بہتر لگے گی اور آپ محسوس کریں گے کہ یہ شاعری پڑھتے ہوئے آپ کسی مشقت سے نہیں گزر رہے جبکہ یہ اپنی شاعری کو اپنی شخصیت ہی کی طرح مزیدار بنانے کی بھی سعی کرتے ہیں۔ یہ شاعری پڑھ کر آپ کو غصہ نہیں آئے گا اور اگر آیا بھی تو زیادہ سے زیادہ اتنا ہوگا کہ آپ اُسے آسانی سے پی جائیں۔ جبکہ غصہ کھانا ویسے بھی کوئی اچھی بات نہیں ہے۔ لیجیے‘ اب آپ کا امتحان شروع ہوتا ہے:

دل میں اتنا دھواں بھرا ہوا ہے

آنکھ تک یہ کنواں بھرا ہوا ہے

دل کسی وقت پھٹ بھی سکتا ہے

اس میں آتش فشاں بھرا ہوا ہے

میرے دریا سوال کرتے ہیں

ان میں پانی کہاں بھرا ہوا ہے

اک خوشی دوڑ رہی ہے مرے آگے پیچھے

پیچھا کرتا ہے کوئی خوف لگاتار مرا

سانس اُجڑے ہوئے خیموں کی طرح اکھڑی تھی

راستہ روکتی کیسے کوئی دیوار مرا

یہ اچانک گر بھی سکتا ہے زمیں کے ہاتھ سے

آسماں سارے کا سارا خاک کی مٹھی میں ہے