سرخیاں، متن، منصور محبوب چودھری اور متفرقات

پیچھے نہیں ہٹوں گا، جیل جائوں تو ساتھی ہمت نہ ہاریں: نواز شریف

مستقل نااہل اور سابق وزیر اعظم میاں نواز شریف نے کہا ہے کہ ''پیچھے نہیں ہٹوں گا، جیل جائوں تو ساتھی ہمت نہ ہاریں‘‘ اور میری مراد ان چند ساتھیوں سے ہے جو بالآخر باقی رہ جائیں گے کیونکہ جس رفتار سے ساتھی داغ مفارقت دے رہے ہیں کچھ برائے نام ساتھی ہی باقی رہ جائیں گے اور جہاں تک پیچھے ہٹنے کا تعلق ہے تو اگر اب پیچھے ہٹوں بھی تو کوئی فائدہ نہیں ہو گا، اس لئے میرے جیل جانے پر بھی ساتھی یعنی بچے کھچے ساتھی ہمت نہ ہاریں اور ملاقات کیلئے آنے والے کھانے پینے کی اشیاء بھی ساتھ لیتے آئیں کیونکہ ظاہر ہے جیل میں ہریسا دستیاب ہو گا نہ پائے اور نہ''کُنّہ‘‘وغیرہ یعنی خالی منہ اٹھا کر نہ آئیں اور میں جیل والوں سے کہہ دوں گا کہ خالی ہاتھ آنے والوں کو ملاقات نہ کرنے دیں، ہیں جی ؟ انہوں نے کہا کہ ''آج تک نیب میں میری طرح کا کیس نہیں آیا‘‘ کیونکہ آج تک کسی نے میرے جتنی خدمات بھی اکٹھی نہ کی ہوں گی اور کوئی اس ریکارڈ کو توڑ کر تو دکھائے۔ آپ اگلے روز وال سٹریٹ جرنل کو انٹرویو دے رہے تھے۔

ہم نے عدالتی فیصلوں پر عوام کو مشتعل نہیں کیا: شیری رحمن

قائد حزب اختلاف سینیٹ شیری رحمن نے کہا ہے کہ ''ہمارے خلاف بھی عدالتی فیصلے آئے، لیکن ہم نے عوام کو مشتعل نہیں کیا‘‘ حالانکہ ہمارے خلاف بھی ایسے کارناموں پر ہی فیصلے آئے تھے اور اگر کوشش کرتے بھی تو عوام نے مشتعل ہونا ہی نہیں تھا جیسا کہ اب مشتعل نہیں ہوئے اور آرام سے گھروں میں بیٹھے ہوئے ہیں۔ انہوں نے کہا کہ ''ہمارے دور میں یوسف رضا گیلانی کو نااہل کیا گیا لیکن ہم نے شور نہیں مچایا‘‘ بلکہ گیلانی صاحب نے خود بھی شور نہیں مچایا کیونکہ وہ اپنے حصے کے کارنامے سرانجام دے رہے تھے بلکہ زرداری صاحب سے بھی آگے نکل گئے تھے اس لئے ان کی نااہلی پر پارٹی نے احتجاج کرنے کی بجائے اطمینان کا سانس لیا تھا کیونکہ راجہ اشرف صاحب کو بھی چانس دینا ضروری تھا جنہوں نے تھوڑے عرصے میں ہی اپنا ٹارگٹ آسانی سے پورا کر لیا تھا۔ آپ اگلے روز پارلیمنٹ میں صحافیوں سے گفتگو کر رہی تھیں۔

خواجہ آصف کی نااہلی کا دن ہمیشہ یادگار رہے گا: فردوس عاشق

پاکستان تحریک انصاف کی رہنما فردوس عاشق اعوان نے کہا ہے کہ ''خواجہ آصف کی نااہلی کا دن تاریخ میں ہمیشہ یادگار رہے گا‘‘ جس طرح پیپلز پارٹی کو میرا چھوڑنے کا دن یادگار رہے گا جبکہ پچھلے دنوں میری تحریک انصاف کو چھوڑنے کی بات چلی تھی اور وہ میرا دوسرا یادگار دن ہوتا لیکن یہ یادگار دن بوجوہ منسوخ کرنا پڑا۔ انہوں نے کہا کہ ''وزیر خارجہ کا عہدہ رکھنے والے کو غیر ملک میں نوکری کرنے پر شرم آنی چاہئے‘‘ اور کیا ہی اچھا ہوتا اگر وہ ارکان اسمبلی کو شرم اور حیا کرنے کا درس دیتے ہوئے تھوڑی شرم و حیا اپنے لئے بھی رکھ لیتے۔ انہوں نے کہا کہ ''خواجہ آصف کے بعد اب وزیر داخلہ احسن اقبال کی باری ہے‘‘ جبکہ میں حساب لگا کر بتائوں گی کہ احسن اقبال کے بعد کس کی باری ہے کیونکہ روحانیت کے ماحول میں رہنے سے میرے اندر بھی اتنی اہلیت پیدا ہو گئی ہے کہ آنے والے واقعات سے باخبر ہو سکوں۔ آپ اگلے روز لاہور میں ایک پریس کانفرنس سے خطاب کر رہی تھیں۔

اور اب حسب معمول شعر و شاعری ، سب سے پہلے ریاض سے منصور محبوب چودھری کی غزل:

کبھی نہ لہر بن سکا، بہائو میں گزر گیا

سکوں کی آرزو لئے تنائو سے گزر گیا

گزر گئی تمام عمر جس کی آرزو لئے

وہ لمحۂ وصال رکھ رکھائو میں گزر گیا

ستم کہ بحر عشق میں کبھی نہ میں اتر سکا

مرا سفر تو حسرتوں کی نائو میں گزر گیا

تمام عمر جس سبب گھمنڈ تجھ کو تھا بہت

وہ مال و زر ترے ہی بچ بچائو میں گزر گیا

میں اجنبی کے ہاتھ تیرے سامنے ہی بک گیا

ترا تمام وقت بھائو تائو میں گزر گیا

نہ ہم سفر املامجھے نہ راستہ ملا کوئی