سُرخیاں متن اور شعر و شاعری

میڈیا حکومت گرانے کیلئے ہمارا ساتھ

دے، ہم اُن کا دیں گے: آصف زرداری

سابق صدر اور پاکستان پیپلز پارٹی کے شریک چیئرمین آصف علی زرداری نے کہا ہے کہ ''میڈیا حکومت گرانے میں ہمارا ساتھ دے، ہم اُن کا دیں گے‘‘ اور، اس بات کو مذاق نہ سمجھا جائے کیونکہ میں کوئی بات یا کام مذاق کے طور پر نہیں کرتا ورنہ یہ بھی کہا جا سکتا ہے کہ جعلی اکاؤنٹس والا کام بھی میں نے مذاق کے طور پر کیا تھا، کیونکہ اگر میں نے اسے مذاق کے طورپر کیا ہوتا تو حکومت میرے خلاف ایکشن لینے کی جگہ ہنس ہنس کر پاگل ہو جاتی اور یہ اس پاگل پن کا ہی نتیجہ ہے کہ حکومت ڈیل کے بدلے ساری جمع پونجی واپس کرنے کا مطالبہ کر رہی ہے یعنی ہم اس کے بعد فاقہ کشی پر مجبور ہو جائیں اور یہی جھگڑا شریف برادران کے ساتھ بھی ہے؛چنانچہ بات کو بنتے دیکھ کر برخوردار حمزہ شہباز لندن روانہ ہو گئے ہیں کہ وہاں کے اثاثے بیچ کر حکومت اور نیب وغیرہ کا حساب چکتا کر دیں کہ روپیہ پیسہ تو ہاتھ کا میل ہے، پھر کبھی موقع ملا تو ہاتھ دوبارہ میلے کیے جا سکتے ہیں آپ اگلے روز اسلام آباد میں کشمیر کانفرنس سے خطاب کر رہے تھے۔

بلدیاتی نظام میں ہر شہر میں نئے قبرستان بنائیں گے: علیم خان

پنجاب کے سینئر وزیر علیم خان نے کہا ہے کہ بلدیاتی نظام میں ہر شہر میں نئے قبرستان بنائیں گے‘‘ کیونکہ بھوک ننگ اور مفلسی کے ہاتھوں عوام جس تعداد اور رفتار سے اللہ کو پیارے ہو رہے ہیں، موجودہ قبرستان بہت کم پڑ جائیں گے اور حالات ہمیشہ ایک جیسے نہیں رہتے، اگرچہ موجودہ بھی ایک جیسے نہیں رہیں گے بلکہ اس سے بھی زیادہ خراب ہوں گے کیونکہ جب تک ہم نے کام سیکھنا ہے، تب تک آدھی آبادی سدھار جائے گی کیونکہ ملک کے سُدھار کا کام مشکل کم اور ناممکن زیادہ نظر آتا ہے ورنہ نظر تو یہی آ رہا ہے کہ ہم واقعی کام کر رہے ہیں اور ہم اس سے پرہیز اس لیے کر رہے ہیں کہ انجان آدمی کام کو ہاتھ لگائے تو وہ خراب بھی ہو سکتا ہے، اس لیے کام کو خراب ہونے سے بچانے کے لیے ہم اسے ہاتھ ہی نہیں لگاتے اور یہ بجائے خود کام کرنے ہی کے مترادف ہے کہ آخر ہم کچھ تو کر ہی رہے ہیں۔ آپ اگلے روز لاہور میں ایک اجلاس میں ہدایات دے رہے تھے۔

نواز شریف کو کچھ ہوا تو ذمہ دار عمران خاں ہوں گے: حمزہ شہباز

نواز لیگ کے مرکزی رہنما اور قائد حزب اختلاف حمزہ شہباز نے کہا ہے کہ ''اگر نواز شریف کو کچھ ہوا تو ذمہ دار عمران خاں ہوں گے‘‘ اگرچہ زندگی اور موت اللہ کے اختیار میں ہے ‘لیکن اس کے اسباب تایا جان خود بھی پیدا کرنے میں مصروف ہیں یعنی سیخ کباب، سموسے اور شامی کباب وغیرہ دل کے مریض ہوتے ہوئے بھی ذوق و شوق سے جیل اور ہسپتال میں بھی تناول فرما رہے ہیں تو پھر اللہ ہی حافظ ہے جبکہ ہمارا اللہ حافظ تو ویسے بھی ہونے والا ہے کہ ہر روز کوئی نہ کوئی نیا کیس نکل آتا ہے، اور اوپر سے ڈیل کی شرائط بھی اس قدر سخت ہیں کہ آئی ایم ایف کی بھی کیا ہوں گی۔ آپ اگلے روز لاہور میں ایک پریس کانفرنس سے خطاب کر رہے تھے۔

حکومت وعدے پورے نہیں کر رہی: سراج الحق

امیر جماعت اسلامی سینیٹر سراج الحق نے کہا ہے کہ ''حکومت وعدے پورے نہیں کر سکی، عوام مایوس ہو رہے ہیں‘‘ کیونکہ وعدے پورے کرنے کے لیے پانچ ماہ کی مدت بہت ہوتی ہے، اس لیے حکومت اگر ہمارے حوالے کر دی جائے تو سارے وعدے پانچ ماہ میں پورے کر کے دکھا سکتے ہیں کیونکہ وہ وعدے ہی ایسے ہوں گے جو پانچ ماہ میں آسانی پورے کیے جا سکیں اس لیے عوام کو کبھی عقل نہیں آئے گی کہ دوسروں کی طرح ہمیں بھی آزما کر دیکھیں، اگرچہ اس صورت میں بھی نتیجہ ایسا ہی نکلنا تھا کیونکہ یہ سسٹم ہی ایسا ہے، اس لیے ہم نے برسراقتدار آنے کے لیے کبھی سنجیدگی سے کوئی کوشش ہی نہیں کی بلکہ اس بات کو ہنسی مذاق میں ہی ٹال دیا کرتے ہیں جبکہ ہنسی اس قوم کے لیے بیحد ضروری ہے لیکن اصل بات یہ ہے کہ ہنستے ہوئے بھی ایسا لگتا ہے کہ رو رہی ہے۔ اس لیے بہتر ہے کہ یہ شوق اپنی قسمت کو رونے سے ہی پورا کرتی رہے کیونکہ شوق کا تو کوئی مول ہی نہیں ہوتا۔ آپ اگلے روز کراچی میں جمعیت کے طلبہ سے خطاب کر رہے تھے۔

اور، اب کچھ شعر و شاعری ہو جائے:

کسی کسی کو ہے تہذیبِ دشت آرائی

کئی تو خاک اُڑاتے ہوئے نکلتے ہیں

دگرگوں سب سفینوں اور جزیروں کا مقدر لگ رہا تھا

وہ اتنی خوبصورت تھی کہ اُس سے اس قدر ڈر لگ رہا تھا

دل کی دھڑکن بھی ہے تشویش کا باعث بابر

یہ دھماکے سے ذرا قبل کی ٹِک ٹِک ہی نہ ہو

ہمیں وہ جو اک دوسرے سے نہیں

محبت سمجھ لو وہی چیز ہے

تیری آنکھوں پہ مرا خوابِ سفر ختم ہوا

جیسے ساحل پہ اُترجائے سفینہ مرے دوست

یہ نہر اُس کی ہے، اِس پر کنارے اُس کے ہیں