سرخیاں، متن، ’’ایک خرابہ اور‘‘ اور تازہ غزل

ووٹ کو عزت دو کا نعرہ سن کربے حد خوشی ہو رہی ہے: نواز

مستقل نا اہل ، سزا یافتہ مجرم، مفرور اور اشتہاری سابق وزیراعظم میاں نواز شریف نے کہا ہے کہ ''سکردو کے شیروں سے ووٹ کو عزت دو کا نعرہ سن کر بے حد خوشی ہو رہی ہے‘‘ لیکن یہ اُس خوشی کا عشر عشیر بھی نہیں ہے جو میرے بیانیے پر دوسرے ممالک میں منائی جا رہی ہے ،پاکستان آنا اب تو ایک ڈرائونا خواب ہو کر رہ گیا ہے اور برطانوی حکومت بھی مجھے واپس نہ بھیجنے پر کچھ ڈانواں ڈول سی ہو رہی ہے جبکہ میں ووٹ کو عزت دلا کر ہی یہاں سے جانا چاہتا ہوں۔آپ اگلے روز لندن میں وہاں کے صحافیوں سے گفتگو کر رہے تھے۔

جتنے ووٹوں کی لیڈ ملی اتنے ہی پُل بنائیں گے: علی گنڈاپور

وفاقی وزیر برائے کشمیر و گلگت بلتستان علی امین گنڈا پور نے کہا ہے کہ ''جتنے ووٹوں کی لیڈ ملی اتنے ہی پُل بنائیں گے‘‘ اور اگر مطلوبہ پُلوں کی تعداد کم نکلی تو پلوں کے اوپر بھی پُل بنا دیں گے۔ اس لیے پلوں پر سے گزرنے کے شائقین افراد سے امید ہے کہ وہ ووٹ ہمیں ہی دیں گے کیونکہ اس علاقے کو صرف پلوں کی ضرورت ہے جس کا ہمیں فائدہ یہ ہو گا کہ پل بنا کر ہم وہاں کے دیگر مسائل سے الگ رہ کر موج مستی کریں گے کیونکہ باقی سارا ملبہ دوسری جماعتوں پر گر انے کے لیے کافی ہو گا اور جہاں جہاں پلوں کی ضرورت نہیں ہو گی وہاں بھی احتیاطاً پل بنا دیں گے تا کہ اگر مستقبل میں وہاں پلوں کی ضرورت ہو تو کافی تعداد میں موجود ہوں۔ آپ اگلے روز غذر کے علاقے اشکومن میں جلسہ عام سے خطاب کر رہے تھے۔

ووٹ چوری ہوا تو تماشا دنیا دیکھے گی: مریم نواز

مستقل نا اہل، سزا یافتہ اور اشتہاری سابق وزیراعظم میاں نواز شریف کی سزا یافتہ صاحبزادی مریم نواز نے کہا ہے کہ ''ووٹ چوری ہوا تو تماشا دنیا دیکھے گی‘‘ کیونکہ جلسوں کی صورت میں جو تماشا ہم نے پہلے لگا رکھا ہے اس سے بھی ایک دنیا لطف اندوز ہو رہی ہے کیونکہ اس میں ایسے ایسے لوگ شامل ہیں کہ تماشا گری ہی جن کا طرۂ امتیاز ہے جبکہ ہمارے بیانیے کی گونج اب امریکا میں بھی سنائی دے رہی ہے۔ کاش ہم بھی وہاں ہوتے اور ان مناظر کا نظارہ اپنی آنکھوں سے کرتے۔ آپ اگلے روز استور میں جلسۂ عام سے خطاب کر رہی تھیں۔

ن لیگ کو کرپشن کی نئی فرنچائز قائم نہیں کرنے دیں گے: شبلی

وفاقی وزیر اطلاعات و نشریات سینیٹر سید شبلی فراز نے کہا ہے کہ ''نون لیگ کو کرپشن کی نئی فرنچائز قائم نہیں کرنے دیں گے‘‘ اگرچہ ان کے لیے پہلے والی فرنچائز ہی کافی ہے جس نے ہماری بھی مت مار رکھی ہے اور اگر وہ نئی فرنچائز قائم کریں گے تو محض ہمیں پریشان کرنے کے لیے جبکہ ہمیں پریشان کرنے کے نتائج قوم کے لیے کچھ اچھے نہیں ہوں گے، اگرچہ ہمیں پریشان نہ کرنے کے نتائج بھی قوم کے لیے اچھے نہیں ہوتے اور جس طرح حکومت کی ہدایت پر ہم نے گھبرانا چھوڑ دیا تھا، اسی طرح اگر ہمیں کہا جائے گا تو ہم پریشان ہونا بھی چھوڑ دیں گے جس کے لیے شاید مناسب وقت کا انتظار کیا جا رہا ہے کیونکہ ابھی تو سب کو اپنی اپنی ہی پڑی ہوئی ہے۔ آپ اگلے روز اسلام آباد سے ٹویٹ پر ایک بیان نشر کر رہے تھے۔

گلگت بلتستان الیکشن کا نتیجہ عمران خان کی

رخصتی کا آغاز ہو گا: قمر زمان کائرہ

پاکستان پیپلز پارٹی وسطی پنجاب کے صدر قمر زمان کائرہ نے کہا ہے کہ ''گلگت بلتستان الیکشن کا نتیجہ عمران کی رخصتی کا آغاز ہو گا‘‘ اور دو تین سال کے اندر اندر یہ معاملہ اپنے انجام کو پہنچ جائے گا۔ اس لیے صاحبِ موصوف کو چاہیے کہ اپنا بوریا بستر باندھنا شروع کر دیں، جس کے لیے دو اڑھائی سال کا وقفہ کافی ہوتا ہے‘ اگر اس میں سستی کا مظاہرہ نہ کیا جائے لیکن اس حکومت کا کوئی بھروسا نہیں کہ مقررہ مدت میں وہ یہ کام کر گزرے گی جس کا مطلب یہ ہو گا کہ ہمیں پھر سے اس کا آغاز کرنا پڑے گا جبکہ اس وقت تک ہم بھی تازہ دم ہو چکے ہوں گے، اور دو تین سال کے لیے پھر اس کارِ خیر میں مصروف ہو جائیں گے۔ آپ اگلے روز لاہور سے اپنا معمول کا بیان جاری کر رہے تھے۔

ایک خرابہ اور

یہ ہمارے سینئر شاعر خاور جیلانی کا مجموعۂ غزل ہے جسے مثال پبلشرز فیصل آباد نے شائع کیا ہے۔ انتساب والدہ محترمہ اور برادرِ خورد رانا شہزاد احمد کے نام ہے۔ دیباچے پرویز ساحر اور ظفر نجمی نے تحریر کیے ہیں۔ پسِ سرورق سویامانا‘ پروفیسر اوساکا یونیورسٹی جاپان اور ڈاکٹر سہیل عباس کی تحسینی تحریریں درج ہیں جبکہ اندرونِ سرورق آفتاب احمد (ایڈیشنل ڈپٹی کمشنر ریونیو فیصل آباد) کی رائے درج ہے۔ اشعار بے عیب ہیں اور پختہ کاری سے مملو۔ نمونۂ کلام:

کام کرتا رہا نشتر والا

دل کے اندر مرے اندر والا

ساتھ ہی اپنے مری بینائی

لے گیا آنکھ سے منظر والا

دے مجھے داد مری ہمت کی

اُڑ رہا ہوں میں کٹے پَر والا

اور‘ اب آخر میں یہ تازہ غزل:

مل رہا ہے مجھے جتنا بھی زمانہ خالی

میں بیاں کرتا ہوں اپنا ہی فسانہ خالی

رائگانی کے کرشمے ابھی ہوں گے ظاہر

رفتہ رفتہ ابھی ہونا ہے خزانہ خالی

ہے توجہ بھی تغافل ہی کی صورت کوئی