سرخیاں ’ میں سناتا ہوں قصۂ درویش‘ اور افضال نوید

کسی کو کچھ پتا نہیں حکومتی معاملات کون چلا رہا ہے: سراج الحق

امیر جماعت اسلامی پاکستان سینیٹر سراج الحق نے کہا ہے کہ ''کسی کو کچھ پتا نہیں حکومتی معاملات کون چلا رہا ہے‘‘ جو کہ میں تو ہرگز نہیں چلا رہا اور میں اس پر کافی غور و خوض کے بعد یہ بات کہہ رہا ہوں کیونکہ آدمی کو سب سے پہلے اپنی خبر لینی چاہیے۔ اس لیے میں اپنے آپ کو اس سے بری الذمہ قرار دیتا ہوں کہ میں اس کا ذمہ دار ہرگز نہیں ہوں؛ تاہم میرا اندازہ یہ ہے کہ حکومت کو اپوزیشن‘ خاص طور پر پی ڈی ایم چلا رہی ہے کیونکہ اسی کی وجہ سے حکومتی حلقوں میں کچھ ہلچل نظر آتی ہے اور مجھے افسوس ہو رہا ہے کہ ہم اگر پی ڈی ایم میں شامل ہوتے تو کچھ حکومت کا مزہ بھی چکھ رہے ہوتے۔ آپ اگلے روز تیمرگرہ میں عوامی وفد سے ملاقات کر رہے تھے۔

پی ڈی ایم میں پھوٹ پڑ چکی، یہ استعفے نہیں دیں گے: بزدار

وزیراعلیٰ پنجاب سردار عثمان بزدار نے کہا ہے کہ ''پی ڈی ایم میں پھوٹ پڑ چکی، یہ استعفے نہیں دیں گے‘‘ البتہ ضمنی الیکشن میں اکٹھے ہو کر ہمارے لیے بدمزگی پیدا کر سکتے ہیں اور اسی شرارت کے تحت نواز لیگ نے اعلان کیا ہے کہ جہاں پیپلز پارٹی کا امیدوار ہو گا‘ وہاں وہ اپنا امیدوار کھڑا نہیں کرے گی اور جنگل میں اگر سارے چھوٹے جانور مل کر شیر کو گرا لیں تو یہ بات سمجھ میں آتی ہے بلکہ خود ہمیں اس سے بہت کچھ سمجھ میں آ جائے گا اور ہم پی ڈی ایم میں پھوٹ پڑنے پر تالیاں بجاتے رہ جائیں گے حالانکہ تالیاں بجا کر بچے اپنی خوشی کا اظہار کرتے ہیں اور ہمارے کام بھی معصومیت میں بچوں جیسے ہیں، البتہ بظاہر ہم پختہ کار نظر آتے ہیں۔ آپ اگلے روز لاہور میں سیٹھ عابد کے انتقال پر اظہارِ افسوس کر رہے تھے۔

وزیراعظم کوئٹہ جا کر بھی این آر او کا

راگ الاپتے رہے: مریم اورنگزیب

نواز لیگ کی ترجمان مریم اورنگزیب نے کہا ہے کہ ''وزیراعظم کوئٹہ جا کر بھی این آر او کا راگ الاپتے رہے‘‘ حالانکہ ہمیں کافی عرصہ پہلے سے یہ یقین ہو چکا تھا کہ وہ این آر او نہیں دیں گے اور وہ ہمارے زخموں پر صرف نمک چھڑک رہے تھے جبکہ انہیں چاہیے تھا کہ وہ لواحقین کے ساتھ ہمارے زخموں پر بھی مرہم رکھتے‘ یہ تو مرے کو مارے شاہ مدار والا معاملہ ہے؛ اگرچہ اس بات کا پتا آج تک نہیں چل سکا کہ یہ شاہ مدار صاحب کون تھے اور مرے کو مارنے کی انہیں کیا ضرورت پیش آئی تھی‘ اس لیے ضروری ہے کہ محاوروں کی کتابوں میں ان کا مطلب بھی کھل کر بیان کیا جائے۔ آپ اگلے روز اسلام آباد میں میڈیا سے گفتگو کر رہی تھیں۔

نادان اپوزیشن مفاد پرست سیاست کر رہی ہے: فردوس عاشق

وزیراعلیٰ پنجاب کی معاونِ خصوصی برائے اطلاعات فردوس عاشق اعوان نے کہا ہے کہ ''نادان اپوزیشن مفاد پرست سیاست کر رہی ہے‘‘ کیونکہ حکومت کو گرانے کی کوششوں سے زیادہ مفاد پرست سیاست اور کیا ہو سکتی ہے‘ بھلے حکومت جتنے بھی متنازع حالات میں معرضِ وجود میں آئی ہو۔ یہ امر واضح رہے کہ ہماری حکومت بھی انہی حالات میں برسر اقتدار آئی ہے جن حالات میں اب تک دوسری حکومتیں آتی رہی ہیں اور ان شاء اللہ ہماری اگلی حکومت بھی ایسے ہی وجود میں آئے گی کیونکہ آئی ہمیشہ آ کر ہی رہتی ہے اس کے آگے جتنے بھی بند باندھنے کی کوشش کی جائے‘ لکھی ہوئی کو کوئی نہیں موڑ سکتا ۔آپ اگلے روز مقامی ہوٹل میں ہمدرد فائونڈیشن کے تحت ہونے والی تقریب سے خطاب کر رہی تھیں۔

میں سناتا ہوں قصۂ درویش

یہ محمد نوید مرزا کا مجموعۂ نظم و غزل ہے جسے رحمانیہ کتاب مرکز لاہور نے چھاپا ہے۔ انتساب والدِ محترم جناب بشیر رحمانی کے نام ہے۔ پس سرورق احمد ندیم قاسمی، ڈاکٹر انور سدید اور اظہار شاہین کی تحسینی آرا شاعر کی تصویر کے ساتھ درج کی گئی ہیں۔ دیباچہ نگاروں میں ڈاکٹر سعادت سعید، شیخ فرید اور اللہ دتہ چودھری شامل ہیں جبکہ پیش لفظ شاعر کا قلمی ہے۔ احمد ندیم قاسمی کے بقول نوید مرزا کو اجتماعی اور انفرادی صورتحال کی ہو بہو عکاسی کا فن آتا ہے اس مجموعے میں سے چند شعر دیکھیے:

سر پہ ہو آسمان تھوڑا سا

کاش ہو سائبان تھوڑا سا

زلزلہ تو ابھی نہیں آیا

ہل گیا ہے مکان تھوڑا سا

جانے کیوں روز ہی سرکتا ہے

یہ مرا خاکدان تھوڑا سا

اور، اب آخر میں افضال نویدؔ کی تازہ غزل:

نوالہ ہوکے سیاست کا آہ مارے گئے

ہزاروں لوگ یہاں بے گناہ مارے گئے

جنونِ نسل کُشی کے شکنجے میں آ کر

جہاں بھی مارے گئے بے پناہ مارے گئے

رنگے ہوئے ہیں لہو سے دکھائی دیتے نہیں