سرخیاں، متن اور تازہ غزل

آبادی اسی طرح بڑھتی ر ہی تو بھوک کا

سامنا کرنا پڑ سکتا ہے: عمران خان

وزیراعظم عمران خان نے کہا ہے کہ ''آبادی اسی طرح بڑھتی ر ہی تو بھوک کا سامنا کرنا پڑ سکتا ہے‘‘ اس لیے سردست شادیوں کے سلسلے کو معطل کرنا پڑے گا کیونکہ آدمی شادی کے بغیر تو گزارہ کر سکتا ہے، روٹی کے بغیر نہیں اور جونہی آبادی میں کمی کے آثار نمودار ہوں، فوراً بیاہ رچایا جا سکتا ہے، اور شادی تو ٹل نہیں سکتی اور ایک نہ ایک دن ہوتی ہی ہے کیونکہ جوڑے آسمان پر بنتے ہیں؛ چنانچہ جیسا کہ آٹے کی مہنگائی روکنے کے لیے عوام کو مشورہ دیا گیا تھا کہ وہ کھانا اگر ختم نہیں کر سکتے تو کم ضرور کر دیں اور امید ہے کہ عوام اس تجویز پر بھی عمل کریں گے تاکہ آبادی کا بم پھٹنے سے بچایا جا سکے جبکہ شادی نہ کرنے کے ساتھ گھبرانا بھی ترک کرنا ہو گا۔ آپ اگلے روز اسلام آباد میں ای سی سی اجلاس کی صدارت کر رہے تھے۔

ویکسین کا حکومتی ریکارڈ جعلی اور ناقص ہے: مریم نواز

نواز لیگ کی نائب صدر مریم نواز نے کہا ہے کہ ''ویکسین کا حکومتی ریکارڈ جعلی اور ناقص ہے‘‘ جس کا سب سے بڑا ثبوت لندن بیٹھے والد صاحب کی ویکسی نیشن ہو جانا ہے، اگرچہ ان کے لیے یہ کام مشکل نہیں بلکہ بائیں ہاتھ ہی کا کرتب تھا لیکن اس سے بھی حکومت کی نا اہلی ظاہر ہوتی ہے؛ اگرچہ اُن کے بھی بعض کام اصلی نہیں تھے لیکن وہ کسی نہ کسی مجبوری کے عالم میں کیے گئے تھے جن میں پلیٹ لیٹس میں کمی بیشی کا معاملہ سرفہرست ہے اور جس کے لیے ان کے ذہنِ رسا کی داد دینا پڑے گی، اور اگر ایسی ہنر مند شخصیت کو خدمت کا دوبارہ موقع دیا جائے تو یہ ملک کہیں کا کہیں پہنچ سکتا ہے۔ آپ اگلے روز اسلام آباد میں میڈیا سے گفتگو کر رہی تھیں۔

قیدیوں کی گاڑیوں میں پنکھے لگوا دیے: عثمان بزدار

وزیراعلیٰ پنجاب سردار عثمان بزدار نے کہا ہے کہ ''قیدیوں کی گاڑیوں میں سیٹیں اور پنکھے لگوا دیے‘‘ اور قیدیوں کے لیے اس سے بڑی عیاشی اور کیا ہو سکتی ہے اور چونکہ میاں شہباز شریف کے ایسی گاڑی میں آنے پر ناراضی کا اظہار کیا گیا تھا اس لیے یہ ایک نہایت ضروری اقدام کیا گیا ہے کیونکہ مستقبل قریب میں انہیں بار بار ایسی گاڑی میں سفر کرنے کی سعادت حاصل ہونے والی ہے اس لیے محض ان کی خوشنودیٔ طبع کی خاطر یہ کام کیا گیا ہے جس سے دوسرے قیدی بھی بھرپور فائدہ اٹھا سکیں گے، اور اگر سردیاں شروع ہو گئیں اور مطالبہ کیا گیا تو ان میں ہیٹر لگوانے کا بھی اہتمام کیا جا سکتا ہے کیونکہ ہمیں قیدیوں کے آرام و آسائش سے بڑھ کر کوئی چیز عزیز نہیں۔ آپ اگلے روز سی پیک مشترکہ تعاون کمیٹی کے اجلاس کی صدارت کر رہے تھے۔

قوم کی بددعائیں حکومت کو لے ڈوبیں گی: رانا ثنا

مسلم لیگی رہنما اور سابق وزیر قانون پنجاب رانا ثناء اللہ نے کہا ہے کہ ''قوم کی بددعائیں حکومت کو لے ڈوبیں گی‘‘ کیونکہ حکومت کو گرانے کے لیے ہمارا سارا زور اب بددعائوں پر ہی رہ گیا ہے کیونکہ باقی ہر حربہ اس سلسلے میں ناکام ہو چکا ہے، اس لیے ایک الگ شعبہ پی ڈی ایم میں قائم کر دیا گیا ہے جو قوم سے یہ اپیل کرنے کی تحریک چلائے گا کہ وہ حکومت کے خلاف زیادہ سے زیادہ بددعائیں کریں تا کہ اس حکومت سے چھٹکارا حاصل ہو؛ اگرچہ ہم نے خود بھی تھوک کے حساب سے ایسی دعائیں مانگی تھیں مگر وہ تاحال منظور نہیں ہوئیں‘ اس لیے اب قوم ہی ہماری مشکلیں آسان کر سکتی ہے کیونکہ تحریکوں اور مارچوں سے تو ہم ویسے بھی بہت تنگ آ چکے ہیں۔ آپ اگلے روز فیصل آباد جلسے کے انتظامات کے حوالے سے ساتھیوں سے مشورہ کررہے تھے۔

نیوزی لینڈ‘ انگلینڈ کی ٹیموں کے جانے پر صرف

مریم نواز نے شادیانے بجائے: فیاض چوہان

پنجاب حکومت کے ترجمان اور وزیر جیل خانہ جات فیاض الحسن چوہان نے کہا ہے کہ ''نیوزی لینڈ اور انگلینڈ کی ٹیموں کے جانے پر صرف مریم نواز نے شادیانے بجائے‘‘ اور وقت کاٹنے کا یہ بھی ایک بہت اچھا ذریعہ ہے کیونکہ اپوزیشن کے پاس کرنے کو اور تو کچھ ہے ہی نہیں ، بات بات پر شادیانے نہ بجائے گی تو اور کیا کرے گی، اگرچہ ہمارے پاس بھی کرنے کو کچھ نہیں ہے اور ہم نے بھی شادیانوں کی خریداری کے لیے آرڈر دے رکھا ہے کیونکہ ہم اپوزیشن کے لیے یہ میدان بھی خالی نہیں چھوڑیں گے، اور ہم نے شادیانے بجانے کی تربیت حاصل کرنے کا بھی معقول انتظام کر رکھا ہے اس لیے یہ مقابلہ بہت جلد شروع ہونے کی امید ہے کیونکہ ہمیں صرف ڈھول پیٹنا آتا ہے مگر اب اس کا بھی پول کھل چکا ہے۔ آپ اگلے روز لاہور میں پریس کانفرنس سے خطاب کر رہے تھے۔

فیک نیوز پر پابندی لگی تو حکومت

ختم ہو جائے گی: مریم اورنگزیب

نواز لیگ کی ترجمان مریم اورنگزیب نے کہا ہے کہ ''فیک نیوز پر پابندی لگی تو حکومت ختم ہو جائے گی‘‘ اس لیے متعلقہ اداروں سے درد مندانہ درخواست ہے کہ یہ پابندی جلد از جلد لگائیں تا کہ اس حکومت کا خاتمہ ہو کیونکہ اس ضمن میں فیک نیوز پر پابندی ہی امید کی آخری کرن نظر آ رہی ہے، اگرچہ اس سلسلے میں ہم نے حکومت کے خاتمے کے لیے قوم سے بھی بددعائوں کا سلسلہ شروع کرنے کی اپیل کر رکھی ہے لیکن ان کی منظوری کی بھی امید کم ہی ہے کیونکہ قوم بھی ہماری طرح جن کاموں میں پڑی ہوئی ہے‘ اسے اس مکمل ناکامی ہی کا منہ دیکھنا پڑے گا، اور اب فیک نیوز کے خاتمے کا یہ آخری سہارا بھی جاتا رہا تو ہماری ساری امیدیں دم توڑ جائیں گی۔ آپ اگلے روز لاہور میں صحافیوں سے بات چیت کر رہی تھیں۔

اور‘ اب آخر میں یہ تازہ غزل:

تیز ہوا کو جہاں گزرتے دیکھتا رہتا ہوں

خاک بھی اپنی وہاں بکھرتے دیکھتا رہتا ہوں

کبھی تو میں کچھ بھی نہیں ہوتا اور کبھی سب کچھ

خود کو خالی ہوتے‘ بھرتے دیکھتا رہتا ہوں

میری سوچ کی سیڑھی فارغ رہتی نہیں کبھی

اس کو چڑھتے اور اترتے دیکھتا رہتا ہوں

اس کے پانیوں کی حد ہی نہیں کوئی‘ اپنا آپ

جن میں ڈوبتے اور ابھرتے دیکھتا رہتا ہوں

جو میں دیکھنا ہی نہیں چاہتا ہوں اس منظر میں

آخر وہ بھی جیتے مرتے دیکھتا رہتا ہوں

جہاں گزر جانا ہوتا ہے مجھے تیزی کے ساتھ