سرخیاں، متن اور تازہ غزل

معیشت کے حوالے سے اچھی خبر ہے: حماد اظہر

وفاقی وزیر حماد اظہر نے کہا ہے کہ ''معیشت کے حوالے سے اچھی خبر ہے‘‘ اگرچہ اس کی تفصیلات نہیں بتائی جا سکتیں کیونکہ تفصیلات کا ہمیں بھی کوئی علم نہیں ہے اور اچھی خبر کا اچھا ہونا ہی کافی ہوتا ہے، اس کی تفصیلات کے چکر میں نہیں پڑنا چاہیے کیونکہ چکر میں پڑنے سے آدمی ہر وقت چکراتا ہی رہتا ہے؛ نیز حکومت نے بہت ساری اچھی خبریں جمع کر رکھی ہیں جنہیں وہ وقتاً فوقتاً چھوڑتی رہتی ہے جس سے عوام بھی مطمئن رہتے ہیں اور حکومت کا کام بھی چلتا رہتا ہے حتیٰ کہ حکومت کو اچھی خبریں دینے اور عوام کو اچھی خبریں سننے کی اتنی عادت پڑ چکی ہے کہ جس دن کسی اچھی چیز کی اطلاع نہ دی جائے‘ عوام فکرمند ہونے لگتے ہیں کہ حکومت کو کیا ہو گیا ہے۔ آپ اگلے روز اسلام آباد میں پریس کانفرنس سے خطاب کر رہے تھے۔

شہزاد اکبر فارغ ہونے والے ہیں‘ ایک شخص

انٹرویو بھی دے چکا ہے: عطا تارڑ

مسلم لیگ نواز کے رہنما عطا اللہ تارڑ نے کہا ہے کہ ''شہزاد اکبر فارغ ہونے والے ہیں‘ ایک شخص انٹرویو بھی دے چکا ہے‘‘ اور جس کا مطلب ہے کہ حکمرانوں نے فارغ ہونا شروع کر دیا ہے اور اب جلد باقی کی حکومت کی باری آ جائے گی اور شاہد خاقان عباسی صاحب نے بتایا ہے کہ اس کے لیے انٹرویو بھی لیا جا چکا ہے کیونکہ عباسی صاحب کو ساری سرگرمیوں کا علم ہوتا رہتا ہے اوراپنے حکومت سنبھالنے کے بارے میں بھی وہ پُرامید ہیں بلکہ ان کی جگہ جسے آئندہ وزیراعظم مقررکیا جانا ہے‘ اس کا انٹرویو بھی ہو چکا ہے کیونکہ جمہوریت کی گاڑی کو تیزی سے چلانے کا فیصلہ ہو چکا ہے اور آئندہ سے اسی سلسلے کے جاری رہنے کا امکان ہے۔ آپ اگلے روز احتساب عدالت کے باہر میڈیا سے گفتگو کر رہے تھے۔

وزیراعظم کی حکمت عملی نے تباہ حال

معیشت کو پاؤں پر کھڑا کر دیا: شہزاد اکبر

وزیراعظم عمران خان کے معاونِ خصوصی شہزاد اکبر نے کہا ہے کہ ''وزیراعظم کی حکمت عملی نے تباہ حال معیشت کو پاؤں پر کھڑا کر دیا ہے‘‘ لیکن وہ آگے پیچھے ہونے سے قاصر ہے اور کھڑے کھڑے اس کے پاؤں بھی سُوج گئے ہیں کیونکہ اس کا بیٹھ جانا سراسر خطرناک ہے لہٰذا اس کے پاؤں کی سوجن دور کرنے کے لیے مختلف ذرائع استعمال کیے جا رہے ہیں جن میں گھیا کدو کی مالش بطورِ خاص شامل ہے؛ اگرچہ اس کی وجہ سے بازار میں گھیا کدو کی قلت پیدا ہو گئی جس کی وجہ سے وہ مزید مہنگا ہو گیا؛ تاہم اس کو آگے بڑھانے کے لیے وہیل چیئر کا بھی انتظام کر دیا گیا ہے جس سے مثبت نتائج نکلنے کی اُمید ہے، بصورتِ دیگر دوسرے ذرائع بھی استعمال کیے جائیں گے۔ آپ اگلے روز اسلام آباد سے معمول کا بیان جاری کر رہے تھے۔

ڈیل کے بغیر آئین میں رہ کر حکومت

گرائیں گے: رانا ثناء اللہ

سابق وزیر قانون پنجاب رانا ثنا اللہ خاں نے کہا ہے کہ ''ڈیل کے بغیرآئین میں رہ کر حکومت گرائیں گے، اگرچہ ڈیل کے حوالے سے بھی ہم مکمل طور پر نااُمید نہیں ہیں‘ کیونکہ مختلف سطحوں پر ہمارے رابطے قائم ہیں اور قائدِ محترم لندن میں ہمت ہار کر نہیں بیٹھے بلکہ وہاں سے متعلقہ لوگوں کے ساتھ رابطے میں ہیں کیونکہ یہ اُن کے لیے کوئی نئی بات نہیں ہے ا ور وہ ممکنہ شرائط پر تبادلۂ خیال کر رہے ہیں جن میں سابقہ تنخواہ پر کام کرنا بھی مشکل ہے اور اس سلسلے میں کافی پیش رفت ہو بھی چکی تھی لیکن بیانِ حلفی والے معاملے نے سارا کام خراب کر دیا جبکہ معافی تلافی کے سلسلے میں بھی بات آگے بڑھی ہے جس کے مثبت نتائج برآمد ہونے کی پوری پوری امید ہے۔ آپ اگلے روز لاہور میں صحافیوں سے بات چیت کر رہے تھے۔

حکومت اپنی مدت پوری کرے گی، میں

وزارتِ عظمیٰ کا امیدوار نہیں ہوں: اسد عمر

وفاقی وزیر توانائی اسد عمر نے کہا ہے کہ ''حکومت اپنی مدت پوری کرے گی، میں وزارتِ عظمیٰ کا امیدوار نہیں ہوں‘‘ اور ہو بھی سکتا ہوں کیونکہ اس ملک میں سب کچھ ہو سکتا ہے اور یہ پسند کرنے والوں کے اپنے حسنِ نظر پر منحصر ہے؛ البتہ جب تک ایسا نہیں ہوتا، میں وزیراعظم عمران خان کا زبردست حمایتی ہوں اور رہوں گا کیونکہ وزارت سے ہاتھ نہیں دھونا چاہتا جبکہ ویسے بھی کورونا کی نئی لہر کے بعد سے ہم سب روزانہ بیس‘ بیس بار صابن کے ساتھ مل مل کر ہاتھ دھوتے ہیں جس سے ہاتھوں کا میل بھی صاف ہوتا رہتا ہے یعنی ایک ٹکٹ میں دو مزوں کا لطف اٹھایا جاتا ہے۔ آپ اگلے روز ایک نجی ٹی وی چینل کے ایک پروگرام میں اپنے خیالات کا اظہار کر رہے تھے۔

اور‘ اب آخر میں یہ تازہ غزل:

جہاں چاہیں وہیں گزرتی ہے

عمر پھر بھی نہیں گزرتی ہے

گھومتا ہے یہ آسمان کبھی

کبھی سر سے زمیں گزرتی ہے

ہے اُسی پر گزر بسر اپنی

جو بھی اپنے تئیں گزرتی ہے

کچھ گزرتی ہے قبل ازیں جیسے

ویسی ہی بعد ازیں گزرتی ہے

چھوڑ جاتی ہے کچھ نہ کچھ اپنا

دل سے جو نازنیں گزرتی ہے

اُس کے در سے کہیں نہیں جاتے