سرخیاں، متن اور تازہ غزل

تحریک عدم اعتماد عوام کے لیے اصل

ریلیف ثابت ہو گی: شہباز شریف

قومی اسمبلی میں قائدِ حزب اختلاف‘ مسلم لیگ نواز کے صدراور سابق وزیراعلیٰ پنجاب شہباز شریف نے کہا ہے کہ ''تحریک عدم اعتماد عوام کے لیے اصل ریلیف ثابت ہو گی‘‘ اگرچہ اصل ریلیف عوام کو ہماری عدم اعتماد کی تاریخ دینے کی غلطی کی صورت میں ہی مل چکا ہے اور مزید اس کے ناکام ہونے کی صورت میں حاصل ہو گا اور یہ بات یقین سے اس لیے کہی جا سکتی ہے کہ ہمارے نمبرز ابھی تک پورے نہیں ہوئے اور نہ ہی کوئی اُمید نظر آ رہی ہے کیونکہ عوام کو اپوزیشن کا تعارف پہلے ہی اچھی طرح سے ہو چکا ہے اور ارکانِ اسمبلی کو تو یہ حفظ ہو گا جبکہ ملکِ عزیز کو ہر برائی سے بچانے کے لیے خدا تعالیٰ کی رحمت ہر وقت شاملِ حال ہے۔ آپ اگلے روز لاہور میں صحافیوں سے بات چیت کر رہے تھے۔

اس سال برآمدات میں تاریخی اضافہ ہوگا: فرخ حبیب

وزیر مملکت برائے اطلاعات و نشریات فرخ حبیب نے کہا ہے کہ ''اس سال برآمدات میں تاریخی اضافہ ہوگا‘‘ اور اسے تاریخی اس لیے کہا ہے کہ ہو سکتا ہے ان برآمدات میں ہم بھی شامل ہوں کیونکہ یہ ایک ایسا ملک ہے کہ اس میں کسی وقت کچھ بھی ہو سکتا ہے؛ اگر ہماری درآمد ہو سکتی ہے تو برآمد بھی ہو سکتی ہے اور اس میں کسی کے حیران یا پریشان ہونے والی کوئی بات نہیں ہے لیکن یہ برآمدات ایسی ہوں گی کہ ان میں فائدہ بھی ہو سکتاہے اور نقصان بھی جبکہ ہمارا فائدہ تو یہ ہو گا کہ ہمارے سر سے فالتو بوجھ اُتر جائے گا‘ ہمارے لیے اپنا آپ ہی کافی ہے اسی پر اکتفا کرنا چاہیے۔ آپ اگلے روز اسلام آباد سے سماجی رابطے کی ویب سائٹ سے ایک بیان جاری کر رہے تھے۔

قاف لیگ مفت میں ساتھ نہیں

دے گی‘ اچھی آفر کرنا ہوگی: بلاول بھٹو

چیئرمین پاکستان پیپلز پارٹی بلاول بھٹو زرداری نے کہا ہے کہ ''قاف لیگ مفت میں ساتھ نہیں دے گی‘ اچھی آفر کرنا ہوگی‘‘ کیونکہ اچھی آفر کے بغیر کہیں بھی کامیابی حاصل نہیں کی جا سکتی جبکہ مارچ میں بھی ہم اچھی آفر کے بعد ہی لوگوں کو گھروں سے نکالنے میں کامیاب ہوئے ہیں اورتعاون حاصل کرنے کا یہی سنہری اصول ہے جبکہ ہم جن اصولوں پر عمل کرتے ہیں وہ سارے کے سارے ہی سنہری ہیں؛ چنانچہ ہم ہمیشہ اچھی آفر کرتے ہیں اور قبول بھی اچھی بلکہ بہت اچھی آفر ہی کرتے ہیں؛ چنانچہ حکومت کو بھی قاف لیگ کو وزارتِ عظمیٰ کی آفر کرنی چاہیے جس سے ان کا پتا بھی صاف ہو جائے گا جو بہت امیدیں وابستہ کیے ہوئے ہیں کیونکہ ہمارے اصل حریف وہی ہیں اور الیکشن کا اعلان ہوتے ہی وہی پرانے‘ پیسے وصول کرنے اور سڑکوں پر گھسیٹنے کے اعلانات شروع ہو جائیں گے۔ آپ اگلے روز ایک نجی ٹی وی چینل کے ایک پروگرام میں شریک تھے۔

چوروں کا ہر صورت‘ ہر میدان میں

مقابلہ کیا جائے گا: شہباز گل

وزیراعظم کے معاونِ خصوصی برائے سیاسی روابط شہباز گل نے کہا ہے کہ ''چوروں کا ہر صورت‘ ہر میدان میں مقابلہ کیا جائے گا‘‘ کیونکہ نتیجہ خیز بھی یہ تبھی ہو گا اگر ان کا ہر شعبے میں مقابلہ کیا جائے اور کسی بھی میدان میں انہیں کھل کھیلنے کا موقع نہ دیا جائے جبکہ مقابلے کا اصول بھی یہی ہے اور ہم اصولوں کے بہت پکے ہیں اور بہت جلد یہ ثابت بھی کر دیں گے کہ ہم ان سے کسی میدان میں پیچھے نہیں ہیں بلکہ ان سے آگے نکلنے کی کوشش کریں گے تو ہی اپنے مقصد میں کامیاب ہوں گے جبکہ یہ ہمارے لیے ایک چیلنج ہے جس پر پورا اترنے کے لیے ہم ایڑی چوٹی کا زور لگا دیں گے۔ آپ اگلے روز اسلام آباد سے ٹویٹ پر ایک بیان جاری کر رہے تھے۔

وزیراعظم کا ہر اعلان اقتدار بچانے

کے لیے ہے: مریم اورنگزیب

نواز لیگ کی ترجمان مریم اورنگزیب نے کہا ہے کہ ''وزیراعظم کا ہر اعلان اقتدار بچانے کے لیے ہے‘‘ اور یہ کوئی اچھی بات نہیں ہے کیونکہ اقتدار تو آنی جانی چیز ہے، آنے کے وقت آتا ہے اور جانے کے وقت چلا جاتا ہے اس لیے اسے بچانے کی کوشش وقت ضائع کرنے کے مترادف ہے اور ہماری رائے میں حکومت کو اِدھر اُدھر بھاگنے اور اقتدار بچانے کی کوشش نہیں کرنی چاہیے کیونکہ اُن کا کِلّہ قائم ہے اور جو تحریک عدم اعتماد کے حالات ہیں‘ لگتا ہے کہ یہ آئندہ بھی قائم رہے گا۔ آپ اگلے روز اسلام آباد سے ٹویٹ پر ایک بیان جاری کر رہی تھیں۔

اور‘ اب آخر میں یہ تازہ غزل:

میرا نہیں کیا کہ تمہارا نہیں کیا

دل نے کوئی بھی کام ہمارا نہیں کیا

میں نے کہ اپنے آپ سے تھا کام کچھ مجھے

کچھ اس لیے بھی خود سے کنارہ نہیں کیا

بس ایک بار ہی جو تسلی ہوئی بہت

پھر چاہتے ہوئے بھی دوبارہ نہیں کیا

تم نے بھی کرنا تھا نظر انداز ہی اسے

کچھ اس لیے بھی میں نے اشارہ نہیں کیا

حق تو یہ ہے کہ دونوں ہی کچھ کچھ تھے ذمہ دار

اب کیا کہیں کہ کس نے گزارہ نہیں کیا

کچھ دیکھتے کہ نفع و ضرر کیا ہے عشق میں