سرخیاں، متن اور ہڈالی سے گل فراز

عوام فیصلہ کریں خدمت کا ساتھ

دینا ہے یا فریب کا: شہباز شریف

وزیراعظم شہباز شریف نے کہا ہے کہ ''عوام فیصلہ کریں خدمت کا ساتھ دینا ہے یا فریب کا‘‘ البتہ پہلے ہم نے ایسے کسی فیصلے سے پہلے ہی پورے زور و شور سے خدمت شروع کر دی تھی اور اب بھی اس کا آغاز ہونے والا ہے کیونکہ پہلے اس بات کا جائزہ لینا ضروری ہوتا ہے کہ زیادہ سے زیادہ خدمت کن کن اطراف سے ہو سکتی ہے اور اس کے لیے کون کون سا طریقِ کار استعمال کرنا پڑتا ہے لیکن وہ سارے طریقے ہمیں پہلے ہی آتے ہیں حتیٰ کہ ہماری خدمت کے حدود و قیود کا کوئی اندازہ یا مقابلہ بھی نہیں کر سکتا‘ چند ایک سیاسی خاندانوں کے‘ جو صحتمندانہ مقابلے کی ایک روشن مثال ہے۔ آپ اگلے روز پارٹی رہنماؤں سے ملاقات کر رہے تھے۔

غیور عوام نے امپورٹڈ حکومت کو مسترد کر دیا: حسان خاور

پی ٹی آئی کے رہنما حسان خاور نے کہا ہے کہ ''غیور عوام نے امپورٹڈ حکومت کو مسترد کر دیا‘‘ جبکہ سازشیں ہماری حکومت کے خلاف بھی بہت ہوئیں مگر اسے عوام نے نہیں بلکہ اس کے اتحادیوں نے ختم کیااور اسی لیے اب عمران خان نے آئندہ اتحادیوں کے ساتھ گٹھ جوڑ سے توبہ کرلی ہے اور جس کی سمجھ انہیں ذرا تاخیر سے ہی آئی ہے کیونکہ کچھ چیزیں واقعی ایسی ہوتی ہیں کہ انسان چاہے کتنا بھی ذہین و فطین کیوں نہ ہو‘ ان کی سمجھ اسے دیر سے آتی ہے لیکن آضرور جاتی ہے۔ آپ اگلے روز سماجی رابطے کی ویب سائٹ پر ٹویٹ کے ذریعے ایک بیان جاری کر رہے تھے۔

پی ٹی آئی کو صرف جھوٹ بولنا آتا ہے: مفتاح اسماعیل

وفاقی وزیر خزانہ مفتاح اسماعیل نے کہا ہے کہ ''پی ٹی آئی کو صرف جھوٹ بولنا آتا ہے‘‘ جبکہ ہم اس طرح کے جملہ فنونِ لطیفہ سے مکمل طور پر فیضیاب ہیں، اس لیے اسے اس فراخدلی پر ناز کرنے کا کوئی حق نہیں ہے اور انسان کے اندر ہر طرح کی ورائٹی ہونی چاہیے کیونکہ ورائٹی ہی تو زندگی کا مزہ ہے اور آلو گوشت آپ کو کتنے بھی پسند ہوں‘ آپ ہر روز آلو گوشت نہیں کھا سکتے جبکہ ویسے بھی قدرت کی عطا کردہ سب نعمتوں سے استفادہ کرنا چاہیے لہٰذا اس اکیلے ہنر پر پی ٹی آئی کو فخر کرنے کے بجائے پشیمان ہونے کی ضرورت ہے۔ آپ اگلے روز سابق وفاقی وزیر حماد اظہر کے بیان کاجواب دے رہے تھے۔

پی ٹی آئی نے پرویز الٰہی کے لیے

بزدار کو قربان کر دیا: دوست مزاری

ڈپٹی سپیکر پنجاب اسمبلی دوست محمد مزاری نے کہا ہے کہ ''پی ٹی آئی نے پرویز الٰہی کے لیے بزدار کو قربان کر دیا‘‘ جن کی اپنی قربانیاں بھی بے مثال ہیں مثلاً وہ اسمبلی میں اپنا ٹوٹا ہوا بازو لہرا لہرا کر اپنے ارکان کو ہلہ شیری دے رہے تھے حالانکہ ڈاکٹر انہیں بار بار منع کر رہے تھے کہ ٹوٹے ہوئے بازو کو اس طرح نہ لہرائیں، جبکہ ان کے خیال میں ٹوٹے ہوئے بازو سے بھی کام لیا جا سکتا ہے بلکہ اس سے زیادہ کام لیا جا سکتا ہے اور انہوں نے کوئی لوٹا وغیرہ میری طرف نہیں پھینکا حالانکہ وہ ٹوٹے ہوئے بازو سے یہ کام بھی لے سکتے تھے۔ آپ اگلے روز عثمان بزدار سے ملاقات کے بعد ٹویٹ کر رہے تھے۔

وزیراعظم شہباز شریف قوم کا

حقیقی سرمایہ و اثاثہ ہیں: لیگی رہنما

مسلم لیگ وزیر آباد کے رہنما مقصود ڈار نے کہا ہے کہ ''وزیراعظم شہباز شریف قوم کا حقیقی سرمایہ و اثاثہ ہیں‘‘ کیونکہ ان کا سارا سرمایہ اور سارے اثاثے بھی قوم ہی کی ملکیت ہیں کیونکہ اتنا سرمایہ انہوں نے خود کیا کرنا ہے بلکہ اس طرح میاں نواز شریف اور دیگر رہنماؤں کے اثاثے بھی قوم کی ملکیت ہیں حتیٰ کہ جنہوں نے ایک بار بیان دیا کہ میری نہ کوئی جائیداد ملک کے اندر ہے نہ باہر، ان کے اثاثے بھی ملک و قوم کے ہیں کیونکہ انہیں یاد ہی نہیں تھا کہ ایسے اثاثے بکثرت موجود ہیں اور یہ محض ان کی سادگی کی وجہ سے ہوا جبکہ یہ سبھی ایک دوسرے سے بڑھ کر سادہ ہیں۔ آپ اگلے روز وزیر آباد میں میڈیا سے گفتگو کر رہے تھے۔

اور‘ اب ہڈالی سے گل فراز کی غزل:

ظاہراً ایک اچھا آدمی ہوں

جانتے سب ہیں کیسا آدمی ہوں

نہیں کرتا کبھی زبردستی

میں کوئی ایسا ویسا آدمی ہوں

بول کر جھوٹ میں مکرتا نہیں

کہ جدا طرح سچا آدمی ہوں

فائدہ سا بھی ہوں کہیں کہیں پر

مگر اکثر خسارہ آدمی ہوں

آپ کو جس طرح کا چاہیے تھا

ہُو بہو اُس طرح کا آدمی ہوں

فکر اوروں کو سیدھا کرنے کی ہے