ہفتہ رفتہ:اسٹاک ایکسچینج 21پوائنٹس تیز،55کروڑمنافع
کراچی (بزنس رپورٹر)اسٹاک ایکسچینج میں گزشتہ ہفتے معمولی تیزی رہی ۔کے ایس ای 100انڈیکس21پوائنٹس کے اضافے سے 40471 پوائنٹس پر بند ہواجب کہ سرمایہ کاروں کو55کروڑ روپے کا منافع ہوا۔
تفصیلات کے مطابق اسٹاک مارکیٹ میں گزشتہ ہفتے ریفائنری، فوڈز ،ٹیلی کام ،توانائی ،بینکنگ،پٹرولیم ،سیمنٹ، آئل اینڈ گیس اور دیگر سرگرم شعبوں میں کاروباری سر گرمیاں دیکھی گئیں۔گزشتہ ہفتے پرافٹ ٹیکنگ کی خاطر بعض اسٹاکٹس میں فروخت کا دباؤ بڑھنے سے بار بار مارکیٹ تنزلی کا شکار بھی ہوئی تاہم کاروباری سرگرمیاں مسلسل اتارچڑھاؤ کا شکار رہیں، البتہ منگل31جنوری کو آئی ایم ایف وفد کی پاکستان آمد اور وزارت خزانہ کے ساتھ مذاکرات کامیاب ہونے پر قرض کے اجراء سمیت سعودی عرب اور چین سے بھی قرض ملنے کے امکانات روشن ہونے اور ملک میں معاشی بہتری آنے کی توقعات پر اسٹاک مارکیٹ میں منگل کو زبردست تیزی کا رجحا ن بھی دیکھا گیا لیکن اس سے اگلے ہی روز مارکیٹ پھر دباؤ میں آگئی۔ہفتہ واررپورٹ کے مطابق کے ایس ای30انڈیکس15109پوائنٹس سے بڑھ کر15162 پوائنٹس پر بند ہوا تاہم آل شیئرز انڈیکس 26973پوائنٹس سے گھٹ کر26921پوائنٹس پر بند ہوا ۔انڈیکس کی ہفتہ وار کم ترین سطح 39842 رہی جب کہ انڈیکس کی ہفتہ وار بلند ترین سطح 40986 رہی ۔مارکیٹ کا مجموعی سرمایہ بڑھ کر63کھرب 52ارب روپے ہوگیا۔گزشتہ ہفتے 65 کروڑ 39 لاکھ حصص کے سودے ہوئے اور ہفتہ وار کاروبار کی مالیت 29 ارب روپے رہی ۔
