تولہ سونا 800روپے مہنگا،ڈالر کی قدر میں مزید 3پیسے کمی
کراچی(خبر ایجنسیاں)ڈالر کی قدر میں کمی کا رجحان جاری ہے ۔ جمعرات کو انٹربینک میں امریکی کرنسی کی قدر3پیسے کی کمی سے۔۔
284 روپے 11 پیسے رہی۔خام تیل کی عالمی قیمتوں میں کمی کے رحجان ، معاشی شعبوں میں اصلاحات سے اشاریے بہتر ہونے اور طلب و رسد میں یکسانیت کے باعث جمعرات کو بھی ڈالر کی نسبت روپیہ تگڑا رہا۔کاروباری دورانیے کے دوران انٹربینک مارکیٹ میں ڈالر کی قدر ایک موقع پر 44پیسے کی کمی سے 284روپے سے بھی گھٹ کر 283روپے 70پیسے کی سطح پر آگئی تھی لیکن رسد میں بہتری کے باوجود وقفے وقفے سے طلب بڑھنے پر ڈالر کی قدر میں اتارچڑھا کا رحجان رہا۔کاروبار کے اختتام پر انٹربینک مارکیٹ میں ڈالر کی قدر صرف 3پیسے کی کمی سے 284روپے 11پیسے پر بند ہوئی، اس کے برعکس اوپن کرنسی مارکیٹ میں بھی ڈالر کی قدر بغیر کسی تبدیلی کے 285 روپے کی سطح پر مستحکم رہی۔آئی ایم ایف کی جانب سے پاکستان کی معیشت بہتری کی جانب گامزن ہونے کی پیش گوئی اور عالمی مالیاتی اداروں اور دوست ممالک کی سرمایہ کاری میں دلچسپی سے ڈالر کی نسبت روپیہ تگڑا رہا۔دوسری جانب ملک بھر میں سونے کی قیمت میں جمعرات کومعمولی اضافہ ریکارڈ کیا گیا۔مسلسل 2 روز کمی کے بعدملک بھر میں سونے کی قیمت میں 800 روپے کا اضافہ دیکھا گیا ۔آل پاکستان جیمز اینڈ جیولرز ایسوسی ایشن کے مطابق ملک بھر میں سونے کی فی تولہ قیمت 800 اضافے کے بعد 2 لاکھ 18 ہزار 900 روپے ہوگئی ہے ۔ایسوسی ایشن کے مطابق 10 گرام سونے کی قیمت میں 685 روپے کا اضافے ہوا ، جس کے بعد مارکیٹ میں دس گرام سونا ایک لاکھ 87ہزار 671 روپے میں فروخت ہورہا ہے ۔عالمی بازار میں سونا بھاؤ میں 2 ڈالر اضافے کی وجہ سے 2030 ڈالر فی اونس ہے۔
