انٹرنیشنل پیکیجنگ فلمز آئی پی او سے 1.47ارب اکھٹے کریگی
کراچی(کامرس ڈیسک)انٹرنیشنل پیکیجنگ فلمز لمیٹڈاسٹاک مارکیٹ میں لسٹنگ کے ذریعے 1.47ارب روپے اکھٹے کرے گی۔
اس سلسلے میں آئی پی او کا انعقاد 8اور 9مئی کو کیاجائے گا۔بک بلڈنگ کا آغاز 21روپے فی حصص کی فلور پرائس سے کیا جائے گا۔ کمپنی کا 70.1ملین شیئرز جاری کرکے 1.47ارب روپے جمع کرنے کا منصوبہ ہے ۔ آئی پی او سے حاصل ہونے والی آمدنی کو کمپنی اپنے توسیعی منصوبوں BOPPاور BOPET filmsفلمز کی مینوفیکچرنگ سہولتوں کے قیام کیلئے حاصل کیے گئے طویل المدّتی قرض کی جلد ادائیگی کے لیے استعمال کرے گی۔ انٹرنیشنل پیکیجنگ فلمز فلیکسیبل پیکیجنگ فلمز بنانے والا سب سے بڑا گروپ ہے اور مجموعی طورپر پیکجنگ سلوشنز کا مضبوط پورٹ فولیوپیش کرتا ہے جس میں سی پی پی، بی او پی پی اور بی او پی ای ٹی فلمیں تیار کی جاتی ہیں۔ملک کے 3اہم مقامات پر واقع یہ پاکستان کا پہلا گروپ ہے جو ون ونڈو فلیکسیبل پیکیجنگ سلوشنز فراہم کرتا ہے۔ انٹرنیشنل پیکیجنگ فلمز لمیٹڈ نے 2023میں 19.9ارب روپے کی نیٹ سیلز ریکارڈ کی جبکہ مالی سال2023 کیلئے کمپنی کا مجموعی مارجن 27فیصدرہا۔2023میں کمپنی نے 2.9ارب روپے کا مجموعی منافع اور1.6ارب روپے کا بعد از ٹیکس منافع حاصل کیا۔چیف ایگزیکٹو آفیسر نوید گوڈیل نے کہاکہ ان کی کمپنی آئندہ مالی سال برآمدات کے ذریعے 15سے 20ملین ڈالر کا زرِ مبادلہ حاصل کرے گی۔ عارف حبیب لمیٹڈ کے چیف ایگزیکٹو شاہد حبیب نے کہاکہ سرمایہ کاروں کے پاس انٹرنیشنل پیکیجنگ فلمز میں سرمایہ کاری کرنے کا ایک بہترین موقع ہے جو پاکستان میں فلیکسیبل پیکیجنگ فلموں کی سب سے بڑی مینوفیکچرر ہے۔
