ڈالر کی قدر میں اضافہ،سونے کی قیمت ریکارڈ بلندی پر
کراچی(بزنس رپورٹر)زرمبادلہ کی دونوں مارکیٹوں میں ڈالر کی قدر میں معمولی نوعیت کا اضافہ ہوا۔ادھرسونے کی قیمتوں میں اضافے کا سلسلہ تھمنے کا نام نہیں لے رہا۔۔۔
جس کے نتیجے میں سونے کی قیمتیں آئے روز نئے ریکارڈ بنارہی ہیں۔اسٹیٹ بینک کے مطابق انٹربینک میں ڈالر 2پیسے کے اضافے سے 280 روپے 23 پیسے پر جاپہنچا،اسی طرح اوپن کرنسی مارکیٹ میں بھی ڈالر01پیسے کے اضافے سے 282روپے 07پیسے پر بند ہوا ۔دوسری جانب عالمی بلین مارکیٹ میں سونا 12 ڈالر کے اضافے سے پہلی بار 3050 ڈالر فی اونس کا ہوگیا۔بین الاقوامی مارکیٹ میں سونے کے نرخ میں اضافے کے باعث مقامی سطح پر بھی فی تولہ سونا ایک ہزار 800 روپے کے نمایاں اضافے سے ملکی تاریخ میں پہلی بار 3 لاکھ 20 ہزار 800 روپے کی بلند ترین سطح پر جاپہنچا۔اسی طرح دس گرام سونے کی قیمت ایک ہزار 543 روپے کے بڑے اضافے سے 2 لاکھ 75 ہزار 34 روپے ہوگئی۔یاد رہے کہ بدھ کو سونے کی فی تولہ قیمت 1650 روپے کے بڑے اضافے سے 3 لاکھ 19 ہزار روپے پر جاپہنچی تھی ۔
