ٹیکسٹائل ایکسپورٹرز کا علاقائی تجارت پر توجہ دینے کا مطالبہ
فیصل آباد (آئی این پی)پاکستان ٹیکسٹائل ایکسپورٹرز ایسوسی ایشن کے ترجمان نے کہا ہے کہ دنیا میں اس وقت60 فیصدکے قریب علاقائی تجارت ہو رہی ہے اس لئے پاکستان کو بھی برآمدات کے فروغ کیلئے علاقائی تجارت پر توجہ دینا ہوگی۔
گزشتہ روز اپنے بیان میں ترجمان پاکستان ٹیکسٹائل ایکسپورٹرز ایسوسی ایشن نے کہا کہ اس وقت دنیا بھر میں 60فیصد کے قریب علاقائی تجارت پاکستان کے لئے باعث تقلید ہے اور ہمیں بھی اپنے ہمسایہ اور علاقائی ممالک کے ساتھ تجارتی سفارتکاری پر توجہ دینا ہوگی۔ انہوں نے کہاکہ ہمارے خطے کے دیگر ممالک روس، ازبکستان، ترکمانستان، ایران وغیرہ میں برآمدی مصنوعات کے لئے بہت زیادہ صلاحیت موجود ہے جس سے ہمیں استفادہ کرنا چاہیے ۔ ترجمان نے مزید کہاکہ تجارتی سرگرمیوں میں اضافہ کے لئے ہمیں بھی دیگر ممالک کی طرح تجارتی ڈپلومیسی پر توجہ مرکوز کرنا ہوگی کیونکہ اصل میں تجارت کے ذریعے ہی تعلقات کی بہتری اورزرمبادلہ کا حصول ممکن ہوسکتا ہے۔
