جسٹس علی باقر نجفی کی سپریم کورٹ تعیناتی:ریٹائرڈجج مقبول باقر،شوکت صدیقی،نذیر لانگو،شاکر اللہ جان کو جوڈیشل کمیشن کارکن بنانیکی منظوری
اسلام آباد(کورٹ رپورٹر)چیف جسٹس پاکستان یحیی آفریدی کی زیرصدارت جوڈیشل کمیشن نے لاہور ہائیکورٹ کے جسٹس علی باقر نجفی کی سپریم کورٹ تعیناتی اور 4ریٹائرڈ جج مقبول باقر ، شوکت صدیقی ،نذیر لانگو ، شاکراللہ جان کو جوڈیشل کمیشن کا رکن بنانے کی منظوری دے دی۔
جوڈیشل کمیشن اجلاس ڈھائی گھنٹے تک جاری رہا جس میں سپریم کورٹ میں دو ججز تعینات کرنے کیلئے غور کیا گیا اس سلسلے میں لاہور ہائی کورٹ کے پانچ سینئر ججز کے ناموں پر غور ہواتاہم اجلاس میں لاہور ہائی کورٹ سے صرف ایک جج جسٹس باقر نجفی کے نام پر اکثریتی ووٹ سے فیصلہ کیا گیا، جسٹس علی باقر نجفی کی بطور جج سپریم کورٹ تقرری کی منظوری 9 ممبران کی اکثریت سے کی گئی جبکہ 4 ممبران نے مخالفت میں ووٹ دیا، پی ٹی آئی کے دو ممبران نے بھی جسٹس علی باقر نجفی کی تقرری کی حمایت میں ووٹ دیا ۔جوڈیشل کمیشن نے جسٹس شجاعت علی خان سے متعلق ریمارکس حذف کرنے کی متفقہ طورپرمنظوری دے دی۔اجلاس میں ہائیکورٹس کے قائم مقام چیف جسٹس کی جگہ جوڈیشل کمیشن کے نئے ممبران کے تقرر کا فیصلہ کیا گیا۔اس سلسلے میں جسٹس ریٹائرڈ مقبول باقر کو سندھ ہائیکورٹ ، جسٹس ریٹائرڈ نذیر لانگو کو بلوچستان ہائیکورٹ ،جسٹس ریٹائرڈ شوکت عزیز صدیقی کو اسلام آباد ہائیکورٹ اور جسٹس ریٹائرڈ شاکر اللہ جان کو پشاور ہائی کورٹ سے ممبر جوڈیشل کمیشن تعینات کرنے کی منظوری دی گئی۔
