مریم نواز اناطولیہ پہنچ گئیں،عالمی کانفرنس میں شرکت،آج خطاب کریں گی
لاہور(دنیا نیوز، مانیٹرنگ ڈیسک)وزیر اعلیٰ پنجاب مریم نواز شریف ترکیہ کے دورے پر اناطولیہ پہنچ گئیں۔ اناطولیہکے ڈپٹی گورنر پروفیسر ڈاکٹر سعد سید اوغلو نے ہوائی اڈے پر وزیراعلیٰ مریم نواز شریف کا استقبال کیا۔
ترکیہ کی خاتون اول محترمہ ایمنہ اردوان کی دعوت پر وزیراعلیٰ مریم نواز شریف ترکیہ کا دورہ کر رہی ہیں۔ وزیراعلیٰ مریم نواز شریف نے ڈپلومیسی فورم 2025کے تحت منعقدہ بین الاقوامی کانفرنس میں شرکت کیجہاں ترکیہ کے صدر رجب طیب اردوان نے کانفرنس میں شریک مہمانوں کا خیر مقدم کیا۔مریم نواز سے ترکیہ کے سابق نائب صدر اور اے کے پارٹی کے نائب چیئرمین فواد اُقطائے نے ملاقات کی ۔اس موقع پر مریم نواز نے کہا پاکستان اور ترکیہ کے تعلقات محض سفارتی نہیں بلکہ عقیدت، محبت اور اعتماد پر مبنی ہیں۔فواد اُقطائے نے کہا برادر ملک پاکستان کی پہلی خاتون وزیراعلیٰ کی اہم ڈپلومیسی کانفرنس میں شرکت کو اعزاز سمجھتے ہیں۔مریم نواز آج کانفرنس سے خصوصی خطاب کریں گی۔ ڈپلومیسی کانفرنس کا عنوان تقسیم دنیا میں مستقبل کی تعمیر، تعلیم تبدیلی لانے کی ایک طاقت رکھا گیا ہے ۔ وزیر اعلیٰ مریم نواز صوبہ پنجاب میں تعلیم کے فروغ کے لیے اپنی حکومت کے اقدامات اور اپنی جماعت کے منشور پر روشنی ڈالیں گی۔
پنجاب کی سینئرصوبائی وزیر مریم اورنگزیب بھی وزیر اعلیٰ کے ہمراہ ہیں۔ دریں اثنا صوبے کی تاریخ میں پہلی مرتبہ ٹرانس جینڈرز کمیونٹی کے لئے باعزت اور باوقار زندگی گزارنے کے راستے کھل گئے ۔ وزیراعلیٰ مریم کی ہدایت پر ٹرانس جینڈرزکمیونٹی کے لئے ٹیکنیکل سکلز کی ٹریننگ کا جامع پروگرام شروع کر دیا گیا جس سے ٹرانس جینڈرز بھیک نہیں باعزت روزگارکمائیں گے ۔وزیراعلیٰ کے ویژن کے تحت ٹیکنیکل سکلز ٹریننگ پروگرام سے 1600 ٹرانس جینڈرز کو پہلے مرحلے میں خصوصی طورپر پنجاب سکلز ڈویلپمنٹ فنڈپروگرام کے تحت مختلف فنون سکھائے جائیں گے ۔ باعزت روزگار کمانے کیلئے ٹرانس جینڈرز کو ٹیلرنگ اور فیشن ڈیزائنگ بھی سکھائی جائے گی۔ ٹرانس جینڈر کمیونٹی کو الیکٹریکل ورک،سولر ٹیکنالوجی، بیوٹی سروسز اور کُلنری آرٹس کی ٹریننگ دی جائے گی۔ وزیراعلیٰ مریم نواز کا کہنا ہے ٹرانس جینڈر کے ساتھ بے رحمانہ رویہ افسوسناک ہے ۔یہ سماجی بائیکاٹ اورمناسب روزگار نہ ملنے کی وجہ سے بھیک مانگنے پر مجبور ہیں، سکل سکھا کر ثابت کریں گے کہ ٹیلنٹ کا کوئی جینڈر نہیں۔وزیراعلیٰ کا کہنا تھا ٹرانس جینڈرز کی ٹریننگ ہی نہیں بلکہ معاشرے میں باوقار مقام دینے کی جدوجہد کررہے ہیں۔ انقلابی ووکیشنل ٹریننگ پروگرام سے ٹرانس جینڈر کی زندگیاں بدلیں گی۔
