تاجربرادری کا 19 جولائی کو ملک گیر پرُامن ہڑتال کا اعلان
کراچی(بزنس رپورٹر)پاکستان کی تاجر برادری نے فیڈرل بورڈ آف ریونیو کے بڑھتے ہوئے اختیارات کے خلاف شدید تحفظات کا اظہار کرتے ہوئے 19 جولائی 2025 کو ملک گیر پرامن ہڑتال کا اعلان کردیا۔
یہ فیصلہ کراچی چیمبر کے صدر جاوید بلوانی کی زیر قیادت ہونے والے مشاورتی اجلاس کے بعد کیا گیاجس میں ملک کے تمام بڑے چیمبرز نے شرکت کی۔ ملک بھر کے تمام تمام بڑے چیمبرز ایک پیج پر جمع ہو گئے جن میں لاہور، فیصل آباد، سیالکوٹ، پشاور، کوئٹہ اور راولپنڈی چیمبر سمیت کاروباری برادری کی تمام بڑی تنظیمیں ایف بی آر کے خلاف اس مشترکہ موقف پر متفق ہوگئی کہ آئندہ کسی قسم کے اضافی اختیارات، بالخصوص ٹیکس قوانین کی دفعات 37A، 37B اور سیکشن 21، کسی صورت قبول نہیں کیے جائیں گے۔ کراچی چیمبر کے صدر جاوید بلوانی نے اعلان کیا ہے کہ شہر کے ساتوں صنعتی زونز 19 جولائی کو مکمل طور پر بند رہیں گے اور کاروباری سرگرمیاں معطل رہیں گی۔ ان کے مطابق یہ ایک روزہ پرامن ہڑتال ہوگی جس کے بعد اگر حکومت نے بزنس کمیونٹی کے خدشات دور نہ کیے تو مرحلہ وار ہڑتالوں کا سلسلہ شروع کیا جائے گا۔جاوید بلوانی نے الزام عائد کیا کہ وزارت خزانہ نے ایف بی آر کو اضافی اختیارات دینے سے قبل ملک کی تاجر برادری سے کوئی مشاورت نہیں کی جو کہ مشاورتی عمل اور جمہوری تقاضوں کے خلاف ہے۔ ملک بھر کی تاجر برادری نے مطالبہ کیا ہے کہ حکومت فوری طور پر ایف بی آر کو دیے گئے اختیارات واپس لے، خاص طور پر وہ دفعات جو ادارے کو بلاجواز چھاپے مارنے، کھاتوں تک رسائی حاصل کرنے اور کاروباری افراد کو ہراساں اور گرفتار کرنے کے اختیارات دیتی ہیں۔ کراچی چیمبر نے خبردار کیا ہے کہ اگر حکومت نے ان کے جائز مطالبات پر فوری ایکشن نہ لیا تو احتجاج کا دائرہ کار بڑھایا جائے گا جس سے ملک کی معاشی سرگرمیوں پر شدید اثرات مرتب ہوں گے۔
