ڈی پی او چنیوٹ کی جامعہ مسجد امیر حمزہ میں کھلی کچہری
چنیوٹ(ڈسٹرکٹ رپورٹر )حکومتی ہدایات پر کمیونٹی پولیسنگ کے فروغ کیلئے اقدامات جاری ،ڈسٹرکٹ پولیس آفیسرچنیوٹ عبداﷲاحمدنے جمعۃ المبارک کے موقع پر جامعہ مسجد امیر حمزہ لاہور روڈ چنیوٹ میں کھلی کچہری لگائی۔
جس میں ڈی ایس پی سٹی،ڈی ایس پی ہیڈکوارٹر،ایس ایچ او تھانہ سٹی،انچارج کمپلینٹ سیل اوردیگر پولیس افسران اور نمازیوں کی کثیر تعداد موجود تھی ۔ڈی پی او نے شہریوں کے مسائل سنے اورحل کی یقین دہانی کروائی۔ڈی پی او نے متعلقہ افسران کو دادرسی یقینی بنانے کی ہدایت کر دی۔اس موقع پر ڈی پی او نے پنجاب پولیس کی مختلف سروسز سے متعلق شرکاء کو بریفنگ دی اور انہیں محرم الحرام میں مذہبی رواداری و فرقہ وارانہ ہم آہنگی کے فروغ میں کردار ادا کرنے کی بھی ہدایت کی۔ڈی پی او عبداﷲاحمدنے شرکاء سے خطاب میں کہا کہ مسجد میں کھلی کچہری لگانا حضرت محمد ؐ کی سنت ہے تاکہ آپ کے مسائل آپ کے پاس آکر سن کر حل کئے جائیں اور کمیونٹی پولیسنگ کو فروغ دیا جائے ۔شہری معاشرتی،اخلاقی برائیوں و جرائم پیشہ عناصر سے متعلق اطلاع دے سکتے ہیں ،انکی شکایات پر دادرسی بھی یقینی بنائی جائے گی۔ڈی پی او چنیوٹ نے مزید کہا کہ لوگوں کی جان و مال کی حفاظت،امن و امان کا قیام اولین ترجیح ہے ،تمام وسائل بروئے کار لاتے ہوئے پبلک سروس ڈلیوری میں بہتری کیلئے اقدامات جاری ہیں،شہری کسی بھی مسئلے ،پریشانی یا جرائم پیشہ عناصر سے متعلق ڈی پی او چنیوٹ کے نمبر 0323-7543444پر دے سکتے ہیں، شہریوں نے مساجد میں کھلی کچہریوں کے اقدام کو سراہاہے ۔
