ڈپٹی کمشنر جھنگ کا ڈی ایچ کیو ہسپتال کاپھر اچانک دورہ
جھنگ (ڈسٹرکٹ رپورٹر )ضلعی انتظامیہ کے شہریوں کو صحت کی سہولیات کی فراہمی کے حوالے سے اقدامات جاری ،اس ضمن میں ڈپٹی کمشنر جھنگ علی اکبر بھنڈر نے گزشتہ روز پھر ڈسٹرکٹ ہیڈ کوارٹر ہسپتال کا اچانک دورہ کیا۔۔۔
انہوں نے مختلف شعبہ جات کا معائنہ کرکے محکمانہ سروسز اوران کی کارکردگی کا جائزہ لیا۔ڈپٹی کمشنر نے ڈاکٹر وسٹاف سے ملاقات کرکے مریضوں کے علاج معالجہ، طبی سہولیات اور ہیلتھ سروسز بارے دریافت کیا اورمزید بہتری کیلئے موقع پر احکامات جاری کئے ۔ ڈپٹی کمشنر نے ہسپتال کے مختلف شعبوں کے معائنہ کے دوران حاضری،مریضوں کے ریکارڈ، صفائی ستھرائی، فارمیسی میں ادویات کی دستیابی و سٹاک کا جائزہ لیا اور مریضوں و لواحقین سے علاج معالجہ اور طبی سہولیات کی فراہمی بارے میں دریافت کیا۔ اس موقع پر ڈپٹی کمشنر نے گفتگو کرتے ہوئے کہا کہ شہریوں کو بہترین طبی سہولیات فراہم کرنے کا عزم رکھتے ہیں،دورے کا مقصد اس بات کو یقینی بنانا ہے کہ ہسپتال انتظامیہ شہریوں کو صحت کی معیاری خدمات فراہم کرے اور مریضوں کی بہترین دیکھ بھال اور علاج معالجے کو یقینی بنائیں۔یاد رہے ایک روز قبل بھی ڈی سی جھنگ نے ڈی ایچ کیو ہسپتال کا دورہ کیا تھا۔
