سیالکوٹ ایئر پورٹ پر جہاز کو لگی آگ پر قابو پانے کی مشق
مشق کے دوران آگ بجھا کر مسافروں کو نکالا گیا ،ز خمی ہسپتال منتقل کر دئیے گئے
سیالکوٹ،سمبڑیال (نمائندہ دنیا ، ڈسٹرکٹ رپورٹر، نامہ نگار ، سٹی رپورٹر)ہوائی جہاز کوآگ لگنے جیسی ہنگامی صورت حال سے نمٹنے کیلئے سیالکوٹ انٹرنیشنل ائیرپورٹ پر مشق کا انعقاد کیا گیا۔ مشق میں دبئی سے آنے والے فرضی جہاز XYZ 621 کے انجن میں آگ لگنے کے بعد سیالکوٹ ائیرپورٹ پر ایمرجنسی لینڈنگ کرائی گئی تو چیف فائر اینڈ ریسکیو آفیسر طارق محمود کی قیادت میں ائیرپورٹ کے فائر بریگیڈ کے عملے نے پھرتی اور ذمہ داری کا مظاہرہ کرتے ہوئے چند ہی لمحوں جہاز پر لگی آگ کو بجھا کر 31 مسافروں کو بحفاظت نکال لیا۔ مشق کے دوران 3 مسافر معمولی زخمی اور 3 شدید زخمی ہوئے ، مسافروں کو سمبڑیال اور سیالکوٹ کے سرکاری ہسپتالوں میں پہنچایا گیا، اس حادثے میں 3مسافر جان کی بازی بھی ہار گئے ۔ مبینہ حادثے کا شکار ہونے والے مسافر طیارے میں عملے سمیت40 مسافر سوار تھے ۔ائیرپورٹ ایمرجنسی پلان کے تحت ہر دوسال بعد منعقد ہونے والی اس میں باہمی تعاون کو مبصروں نے انتہائی مو ثر قرار دیا ہے اور ائیر پورٹ کے عملے اور ایمرجنسی سے متعلقہ محکموں سے رابطوں کو بھی سراہا ہے ۔ آزمائشی مشق کے دوران ائیرپورٹ سکیورٹی فورس، ایف آئی اے ، ر یسکیو 1122 اور ایدھی ایمبولینس سروسز اور دیگر محکموں کا تعاون بھی مثالی رہا۔
