ٹرک سٹینڈ کا منصوبہ نظر انداز،گڈز ٹرانسپورٹرز مایوس
گوجرانوالہ (نیوز رپورٹر)نگران وزیر اعلی ٰ محسن نقوی کی جانب سے گوجرانوالہ میں بے شمار منصوبوں کا اعلان کیا گیا۔۔
لیکن ٹرک سٹینڈ کے منصوبے کو نظر انداز کر دیا گیا جس سے گڈز ٹرانسپورٹرز مایوسی کا شکار ہیں اور شہری حدود میں قائم گڈز ٹرانسپورٹ اڈے سموگ اور ٹریفک مشکلات کا سبب بن رہے ہیں۔تفصیلات کے مطابق گوجرانوالہ میں شہری حدود کے اندر 150گڈز ٹرانسپورٹ اڈے ہیں جہاں سے روزانہ ہزاروں مال برادر گاڑیوں کی آمدو رفت ہوتی رہتی ہے ،ان گاڑیوں کی وجہ سے شہر کی بیشتر سڑکیں ٹوٹ پھوٹ کا شکار ہیں اور ماحولیاتی آلودگی میں بھی اضافہ ہو رہا ہے ۔ گاڑیوں سے نکلنے والا دھواں سموگ میں اضافہ کا سبب بن رہا ہے ۔ان اڈوں کے باہر سڑک پر پڑا سامان اور بڑے بڑے کنٹینرز کھڑے ہونے کی وجہ سے ٹریفک کی روانی متاثر ہوتی ہے ۔گڈز ٹرانسپورٹرز نے متعدد بار ان اڈوں کو شہر سے باہر منتقل کرنے کیلئے کہا لیکن یہ اڈے شہر سے باہر منتقل نہ ہوسکے ۔نگران وزیر اعلیٰ نے گوجرانوالہ آمد کے موقع پر بے شمار منصوبوں کا اعلان کیا لیکن شہر سے باہر ٹرک سٹینڈ کا اعلان نہیں ہو سکا۔ صدر گڈز ٹرانسپوٹرز ایسوسی ایشن گوجرانوالہ طیب نذیر بٹ کا کہنا ہے کہ گڈز ٹرانسپورٹرز نے ٹرک سٹینڈ کے قیام کیلئے 1994 میں بطور پہلی قسط تقریباُ80 لاکھ روپے کارپوریشن کو جمع کروا ئے تھے لیکن اسکے باوجود یہ منصوبہ مکمل نہیں کیا جا سکا جو انتظامیہ کی نااہلی کا منہ بولتا ثبوت ہے ، گوجرانوالہ میں صنعتکاروں کیلئے تین انڈسٹریل اسٹیٹ بنائے جا چکے ہیں لیکن ٹرانسپورٹرز کیلئے ایک بھی ٹرک سٹینڈ نہیں بن سکا جو ٹرانسپورٹرز کیساتھ سراسر زیادتی ہے ،اگر ٹرک سٹینڈ شہر سے باہر ہوگا تو ٹریفک کے مسائل بھی نہیں ہونگے ۔ہمارامطالبہ ہے کہ گوجرانوالہ میں فوری طور پر ٹرک سٹینڈ کا منصوبہ شروع کیا جائے ۔
