وزیر بلدیات نے آلائشوں کیلئے پلاسٹک بیگز تقسیم کیے
سیالکوٹ (نمائندہ دنیا )صوبائی وزیر بلدیات پنجاب میاں ذیشان رفیق نے عید الاضحی کے سلسلہ میں میونسپل کمیٹی ڈسکہ میں قائم کنٹرول روم کا دورہ کیا اور مین بازار، گلی تار والی۔۔۔
میلاد چوک اور ماڈل ٹاون کے علاوہ ڈسکہ کے مختلف علاقوں میں قربانی کے جانوروں کی آلائشوں اور باقیات کو ڈالنے کے لئے پلاسٹک بیگز تقسیم کیے اس موقع پر اسسٹنٹ کمشنر ڈسکہ محمد علی کانجو، سی او بلدیہ عبدالحئی، میونسپل آفیسر عزیر ارشد،سابق چیئرمین رسالت گجر، سرفراز احمد چیمہ، عرفان علوی کے علاوہ لیگی رہنما نصراﷲ چیمہ ایڈووکیٹ، شہباز عارف چیمہ بھی موجود تھے ، صوبائی وزیر نے عید الاضحیٰ کیلئے سپیشل ڈیوٹی انجام دینے کیلئے غلطیوں سے پاک ڈیوٹی روسٹر جاری کیا جائے اور اس امر کو یقینی بنایا جائے کہ ڈیوٹی روسٹر کے مطابق متعلقہ اہلکار اپنی ڈیوٹی پر موجود ہو۔ انہوں نے کہا کہ صفائی ستھرائی اور غفلت ہر گز برداشت نہیں کی جائے گی صوبہ بھر کی طرح ڈسکہ کے عوام کو عید الاضحیٰ پر تعفن سے پاک ماحول دیا جائے گا۔ انہوں نے کہا کہ وزیر اعلیٰ پنجاب مریم نواز عید الاضحی کے موقع پر عوام کو سہولیات یقینی بنانے کیلئے اقدامات کررہی ہیں۔ عید کے تینوں دن جن افراد کی ڈیوٹیاں لگائی جارہی ہیں وہ اپنی ڈیوٹیاں ٹھیک طرح سے نبھائیں۔
