نمائشیں کاروبار کی تشہیر میں کردار ادا کرتی ہیں:بابر علائوالدین
گجرات(سٹی رپورٹر ،نامہ نگار)چیئرپرسن وزیر اعلیٰ پنجاب ڈائریکٹوریٹ برائے ایوالیوایشن، فیڈ بیک، انسپکشن اینڈ مانیٹرنگ بریگیڈیئر بابر علاؤالدین نے گجرات چیمبر آف کامرس میں جیمز اینڈ جیولری ایکسپو اور ڈرائیونگ ٹیسٹ سینٹر کا افتتاح کر دیا ۔
ڈپٹی کمشنر صفدر حسین ورک،سابق ایم پی اے حاجی عمران ظفر، ڈی پی او گجرات مستنصر عطا باجوہ، صدر چیمبر آف کامرس اینڈ انڈسٹری سکندر اشفاق رضی، حاجی ناصر محمود، محمد اسد بھٹی، معصوم قمر،چوہدری قمر عباس ٹوانہ سابق صدر پاک ناروے فورم، سیٹھ قمر خورشید، باؤ منیر پشاوری، ترک پاک بزنس کونسل کی صدر ہولیا خانم ، ڈی ایس پی ٹریفک و دیگر بھی اس موقع پر موجود تھے ۔چیئرپرسن بریگیڈیئر بابر علاؤالدین نے گفتگو کرتے ہوئے کہا کہ گجرات گولڈن ٹرائی اینگل کا حصہ ہے اور یہاں کی انڈسٹری زر مبادلہ کے حصول میں اہم کردار ادا کر رہی ہے ۔ گجرات کی تاجر برادری محنت اور لگن سے کام کر رہی ہے اور عوامی فلاح و بہبود کے منصوبوں میں بھی بڑھ چڑھ کر حصہ لے رہی ہے ۔ جیولری نمائش کا انعقاد گجرات چیمبر آف کامرس اینڈ انڈسٹری کا ایک بہترین اقدام ہے ، جس سے مقامی صنعت کو فروغ ملے گا۔ نمائشیں کاروبار کی تشہیر میں اہم کردار ادا کرتی ہیں۔ قبل ازیں انہوں نے گجرات چیمبر آف کامرس اینڈ انڈسٹری میں ڈرائیونگ ٹیسٹ سینٹر کا افتتاح کیا اور کہا کہ اس سینٹر کے قیام سے گجرات چیمبر آف کامرس کے ممبران اور کاروباری حضرات کو ڈرائیونگ لائسنس کے حصول میں آسانی ہوگی ۔
