تعمیراتی سامان ترپال نہ ڈھانپے والی ٹرالیوں کیخلاف کاررو ائی
سمبڑیال(سٹی رپورٹر)اسسٹنٹ کمشنر سمبڑیال غلام فاطمہ کے سموگ کی روک تھام کے سلسلے میں بغیر ترپال سے ڈھانپی ٹریکٹر ٹرالیوں کے خلاف کارروائی، جرمانے عائد کئے ،انتظامی امور کا جائزہ لینے کے حوالے سے بنیادی مراکز صحت بدوکے چیمہ اور ورسالکے کا بھی دورہ، شہر میں تجاوزات کے خلاف بھی کارروائی، تجاوز کنندگان کے سامان ضبطی سمیت 50ہزار جرمانہ بھی عائد کیا۔
اسسٹنٹ کمشنر سمبڑیال غلام فاطمہ نے سموگ کی روک تھام کے سلسلے میں ٹریفک پولیس کے ہمراہ ٹرالی پر بلڈنگ مٹیریل نہ ڈھانپنے والے ڈرائیورز کے خلاف کاروائی کی اور متعدد خلاف کنندگان کو جرمانے عائد کئے ۔اسسٹنٹ کمشنر نے بنیادی مرکز صحت بدوکے چیمہ اور ورسالکے کا بھی دورہ کیا۔انہوں نے ڈاکٹر اور سٹاف کی حاضری سمیت دیگر انتظامی امور کا جائزہ لیا۔ انہوں نے بنیادی مرکز صحت میں جاری تعمیراتی کام کا بھی جائزہ لیا اور بلڈنگ ڈیپارٹمنٹ کے متعلقہ حکام کو ہدایت کی کہ وہ بروقت تعمیراتی کام کو پایا تکمیل تک پہنچائیں۔دریں اثنا اسسٹنٹ کمشنر سمبڑیال غلام فاطمہ نے سموگ کی روک تھام کے سلسلے میں ٹریفک پولیس کے ہمراہ ناجائز تجاوزات کے خلاف آپریشن کیا۔
