ریجن میں سخت سکیو رٹی میں کرسمس کی 1100 تقریبات
گوجرانوالہ (نیوز رپورٹر) ریجن بھر میں سخت سکیورٹی میں کرسمس کے سلسلہ میں 1100تقریبات منعقد ہوئیں ، 600 گرجا گھروں میں عبادات کی گئیں۔ گوجرانوالہ، سیالکوٹ، گجرات، منڈی بہائوالدین، حافظ آباد اور نارووال میں کرسمس پروگرامزکی سکیورٹی کیلئے گرجا گھروں میں واک تھرو گیٹس ،میٹل ڈیٹیکٹر اورسی سی ٹی وی کیمرے نصب کیے گئے ۔
پولیس اور ایلیٹ کمانڈوز نے چرچز سے ملحقہ اہم چوکوں میں ناکہ بندی کی اور مشکوک گاڑیوں اور اشخاص کی چیکنگ کی جاتی رہی۔ گوجرانوالہ ،سیالکوٹ ،گجرات ،حافظ آباد ،منڈی بہاؤ الدین اور نارووال کے تمام گرجاگھروں کو خوبصورتی سے سجایا گیا ۔تمام چرچز میں عباداتی تقاریب منعقد ہوئیں جن میں گیت گائے گئے اور ملکی سلامتی ، استحکام اور وطن عزیز کیلئے خصوصی دعائیں کی گئیں۔گرجاگھروں میں عبادات کے لیے آنے والوں کو سخت چیکنگ کے بعد داخل ہونے دیا جاتارہا۔دعائیہ تقریبات میں ملک سے دہشت گردی کے خاتمہ اور افواج پاکستان کے شہدا کے لیے خصوصی دعائیں کی گئیں۔
