شٹل ٹرین سروس4سال سے بند:ٹرن اوور کوزنگ کھانے لگا
گوجرانوالہ(نیوز رپورٹر) گوجرانوالہ سے لاہور جانے والی شٹل ٹرین سروس 4 سال سے بند، ٹرین کے ٹرن اوور کیلئے لاکھوں روپے سے بنایا جانے والا ٹرن اوور زنگ آلودہ ہو کر خستہ ہونا شروع ہو گیا ۔
فروری2020 میں گوجرانوالہ سے لاہور کیلئے شٹل ٹرین سروس کا آغاز کیا گیا ،گوجرانوالہ سے شٹل ٹرین روزانہ تین دفعہ روانہ ہوتی تھی جو 5چھوٹے چھوٹے سٹاپس پر رکتے ہوئے لاہور پہنچتی تھی۔گوجرانوالہ سے صبح ساڑھے آٹھ بجے پہلی ٹرین روانہ ہو تی تھی اس کے بعد 3 بجے اور پھر رات نو بجے جاتی تھی۔شٹل ٹرین کا گوجرانوالہ سے لاہور تک کرایہ اس وقت سو روپے رکھا گیا تھا۔شہری اس سروس کے شروع ہونے پر بہت خوش تھے کیونکہ لاہور نوکری اور کاروبار کے سلسلہ میں جانے والے مسافر بروقت اپنی منزل مقصود تک پہنچ جاتے تھے اس کے علاوہ طالبعلم بھی وقت پر تعلیمی اداروں میں پہنچ جاتے تھے لیکن کچھ عرصہ بعد شٹل ٹرین سروس کو بند کر دیا گیا تھا جو ابھی تک بحال نہیں ہو سکی ۔شٹل ٹرین سروس سے محکمہ ریلوے کو کافی ریونیو مل رہا تھا۔شٹل ٹرین کے لیے جو ٹرن اووربنایا گیا تھا وہ عدم توجہی کے باعث زنگ آلودہ ہو چکا ہے اور خستہ ہونا شروع ہو گیا ہے ۔شہریوں کا کہنا ہے کہ شٹل ٹرین سروس فوری طور پر بحال کی جائے ،شٹل ٹرین سروس سے لاہور سے گوجرانوالہ جی ٹی روڈ پر ٹریفک کالوڈ کم ہو جائے گا جبکہ پبلک ٹرانسپورٹ میں انہیں بہت تنگ ہو کر سفر کر نا پڑتا ہے اور کرایہ بھی زیادہ ہوتا ہے ۔شہریوں نے مطالبہ کیا ہے کہ فوری طور پر شٹل ٹرین سروس بحال کی جائے۔
